تۇركىستان وبلىسىندا جىل باسىنان بەرى 6000-عا جۋىق تۇرعىن جانۋارلاردان جاراقات العان، دەپ حابارلايدى اlmaty-akshamy.kz قازاقپاراتقا سىلتەمە جاساپ.
تۇركىستان وبلىسىندا جىل باسىنان بەرى 5968 ازامات جانۋارلاردان جاراقات الىپ، مەديسينالىق كومەككە جۇگىنگەن. ونىڭ ىشىندە 5 190-ى يتتەن، 479-ى مىسىقتان، 72ء-ى جىلقىدان، 13ء-ى ءىرى قارادان، 15ء-ى ۇساق مالدان، 199-ى باسقا دا جانۋارلار مەن كەمىرگىشتەردەن زارداپ شەككەن.
دەگەنمەن، بۇل كورسەتكىش بىلتىرعى جىلمەن سالىستىرعاندا جاراقات الۋشىلاردىڭ 2،3% ازايعانىن كورسەتەدى. جالپى، تۇركىستان وبلىسى اسا ءقاۋىپتى جۇقپالى اۋرۋلار بويىنشا ەندەميالىق ايماققا كىرەدى. سونىمەن بىرگە قۇتىرما اۋرۋىنىڭ ءقاۋپى جوعارى ايماقتار قاتارىنا جاتادى.
«وبلىستىق ۆەتەرينارلىق زەرتحانانىڭ دەرەگى بويىنشا، 51 پاتولوگيالىق ماتەريال قۇتىرما اۋرۋىنا تەكسەرىلىپ، ءبىر سىنامادان وڭ ناتيجە انىقتالدى. جەرگىلىكتى اتقارۋشى ورگانداردىڭ يەسىز يتتەر مەن مىسىقتاردىڭ كوزىن جويۋ، قۇتىرما اۋرۋىنىڭ الدىن الۋ جۇمىستارى ۇنەمى باقىلاۋدا»، - دەلىنگەن تۇركىستان وبلىسى سانيتارلىق-ەپيدەميولوگيالىق باقىلاۋ دەپارتامەنتىنىڭ باسپا ءسوز قىزمەتى تاراتقان اقپاراتتا.
ايتا كەتەيىك، جىل باسىنان بەرى وبلىستا دارىگەرگە ۋاقتىلى جۇگىنبەگەن ءبىر ازامات اۋرۋىنىڭ اسقىنىپ كەتۋىنە بايلانىستى قايتىس بولدى. ونى يت قاۋىپ العان.