قۇتقارۋشىلار تاۋدا جوعالىپ كەتكەن ءتورت جاسار بالانى تاپتى

اتا-انالارىنا تاپسىرىلدى.

الماتى وبلىسىندا تاۋدا جوعالعان ءتورت جاسار بالا التى ساعاتتان كەيىن تابىلدى. بالانى ىزدەۋگە 100-دەن اسا ادام جۇمىلدىرىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.

 «16 مامىر كۇنى ساعات 20:30-دا الماتى وبلىسى تجد كەربۇلاق اۋدانى دولانالى اۋىلىنىڭ ماڭىندا 2018 جىلى تۋعان بالانىڭ جوعالىپ كەتكەنى تۋرالى حابارلاما كەلىپ ءتۇستى. 

اتا-انالاردىڭ مالىمەتى بويىنشا، تۇسكى ۋاقىت شاماسىندا ولار ءتورت جاسار بالامەن بىرگە تاۋلى ايماققا ساڭىراۋقۇلاق تەرۋگە شىققان. ءبىر ساتتە اتا-انالار كولىكتىڭ جانىندا ويناپ جۇرگەن بالانىڭ جوق ەكەنىن بايقاعان. ءۇش ساعاتقا جۋىق اتا-انالار بالانى ءوز بەتىنشە ىزدەستىرگەن، سودان كەيىن تجد-دان كومەك سۇرادى. 

ىزدەستىرۋ-قۇتقارۋ جۇمىستارىنا الماتى وبلىسىنىڭ تجد قىزمەتكەرلەرى، پوليسيا، جەرگىلىكتى اتقارۋشى ورگاندار مەن جەرگىلىكتى تۇرعىندار، سانى 100-دەن استام ازاماتتار جانە 1 ىزدەستىرۋ ءيتى دەرەۋ كىرىستى. 

 ىزدەۋ ناتيجەسىندە ساعات 23:30-دا بالا جوعالعان جەردەن 3 كم قاشىقتىقتا تابىلدى جانە دارىگەرلەردىڭ تەكسەرىسىنەن كەيىن اتا-انالارىنا تاپسىرىلدى»،- دەلىنگەن الماتى وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتى تاراتقان حابارلامادا. 

ۆەدومستۆونىڭ اقپاراتىنا سايكەس، قازىرگى ۋاقىتتا بالانىڭ دەنساۋلىعىنا تونگەن ءقاۋىپ جوق.