وتكەن تاۋلىكتە ماماندار 372 ادامدى، ونىڭ ىشىندە 312 بالا قۇتقاردى جانە ەۆاكۋاسيالادى.
قازاقستاندىق قۇتقارۋشىلار اۋا رايىنا بايلانىستى مەملەكەت ازاماتتارىن قاۋىپسىزدىك شارالارىن ساقتاۋعا شاقىرادى، دەپ حابارلايدى Almaty-akshamy.kz.
30 ناۋرىزدا «قازگيدرومەت» مالىمەتتەرى بويىنشا ەلىمىزدىڭ شىمكەنت قالاسىنان باسقا وڭىرلەرىندە داۋىلدى ەسكەرتۋ جاريالاندى. وسى وڭىرلەردە قار جانە جاڭبىر جاۋىپ، جەلدىڭ ەكپىنى سەكۋندىنا 15-20 مەترگە كۇشەيۋى ىقتيمال.
تج مينيسترلىگىندە تج-نى جويۋ جونىندەگى رەسپۋبليكالىق شتاب قۇرىلدى. اقمولا، اقتوبە، پاۆلودار، قوستاناي، قاراعاندى، سولتۇستىك قازاقستان وبلىستارىندا وسىنداي شتابتار جۇمىس جۇرگىزۋدە. پسيحولوگيالىق كومەك جانە اقپاراتتىق قولداۋ كورسەتۋ ءۇشىن رەسپۋبليكالىق جانە اۋماقتىق شتابتاردا "جەدەل جەلى" تەلەفونى جۇمىس جاسايدى.
«وتكەن تاۋلىكتە قۇتقارۋ بولىمشەلەرى نۇر-سۇلتان قالاسى، اقمولا، اقتوبە، قاراعاندى، قوستاناي وبلىستارىندا 372 ادامدى، ونىڭ ىشىندە 312 بالا قۇتقارىلدى جانە ەۆاكۋاسيالاندى. اپاتتان قۇتقارۋ جۇمىستارىنا تجم، ءىىم، جەرگىلىكتى اتقارۋشى ورگاندار مەن جول قىزمەتتەرىنەن 539 ادام جانە 277 بىرلىك تەحنيكا جۇمىلدىرىلدى»،- دەلىنگەن تج مينيسترلىگىنىڭ باسپا ءسوز قىزمەتىنىڭ حابارلاماسىندا.
اقمولا، قاراعاندى، پاۆلودار، قوستاناي وبلىستارىنىڭ جىلىتۋ پۋنكتتەرىندە 89 ادام، ونىڭ ىشىندە 11 بالا بار.
اۆتوجولداردىڭ جابىق ۋچاسكەلەرىندە حالىقتى ەۆاكۋاسيالاۋ ءۇشىن 40 ۋاقىتشا جىلىتۋ پۋنكتى دايىندالدى. جول قىزمەتتەرى قاردى تازالاۋ جۇمىستارىن جۇرگىزۋدە.
حالىقتى ەسكەرتۋ ماقساتىندا اۋا رايىنىڭ ناشارلاۋى تۋرالى 74 سمس-حابارلاما جىبەرىلدى جانە «دارمەن» موبيلدىك قوسىمشاسى ارقىلى 56 حابارلاما جولداندى، 15 تەلەراديوەفيرمەن قارماۋ جۇرگىزىلدى.
قازىرگى ۋاقىتتا اقمولا، الماتى، اقتوبە، شىعىس قازاقستان، قاراعاندى، قوستاناي، پاۆلودار، سولتۇستىك قازاقستان وبلىستارىندا اۆتوجولداردىڭ 111 ۋچاسكەسى جابىلدى، ولاردىڭ 52ء-سى رەسپۋبليكالىق جانە 59-ى وبلىستىق ماڭىزى بار جولدار.
بلوك-بەكەتتەردە 1 434 بىرلىك تەحنيكا، ونىڭ ىشىندە 946 جەڭىل، 482 جۇك كولىگى جانە 6 اۆتوبۋس تۇر: اقمولا وبلىسىندا – 735 بىرلىك تەحنيكا (547 جەڭىل جانە 188 جۇك كولىگى)، قاراعاندى وبلىسىندا – 532 بىرلىك تەحنيكا (318 جەڭىل، 208 جۇك كولىگى جانە 6 اۆتوبۋس)، قوستاناي وبلىسىندا – 57 بىرلىك تەحنيكا (35 جەڭىل، 22 جۇك كولىگى)، پاۆلودار وبلىسى - 110 بىرلىك تەحنيكا (46 جەڭىل، 64 جۇك كولىگى).
وتكەن تاۋلىكتە نۇر-سۇلتان، الماتى قالالارىندا، اقمولا، الماتى، اقتوبە، اتىراۋ، جامبىل، قاراعاندى، قىزىلوردا، پاۆلودار جانە سولتۇستىك قازاقستان وبلىستارىندا قاتتى داۋىلدى جەلدىڭ سالدارىنان شاتىرلاردىڭ بۇزىلۋى مەن اعاشتاردىڭ قۇلاۋى، سونداي-اق ەلەكتر ەنەرگياسىنىڭ ءىشىنارا اجىراتىلۋى ورىن الدى. نۇر-سۇلتان، الماتى قالالارىندا جانە الماتى وبلىسىندا توتەنشە جاعدايلاردىڭ سالدارىنان 6 ادام، ونىڭ ىشىندە 3 بالا زارداپ شەكتى.
ق ر تجم قاۋىپسىزدىك شارالارىن ساقتاۋعا شاقىرادى! تج بولعان جاعدايدا 112 تەلەفونىنا حابارلاسىڭىز.
«ازاماتتاردى اۋا رايىنىڭ وزگەرۋىن باقىلاۋعا شاقىرامىز. داۋىل تۋرالى ەسكەرتۋ حابارلامالارىن ەسكەرىڭىز جانە قاجەتتى ساقتىق شارالارىن ساقتاڭىز. ەلدى مەكەندەر اراسىنداعى تاس جولدارىنا شىعۋدى جوسپارلاماس بۇرىن، الداعى قوزعالىس باعىتى بويىنشا اۋا رايى بولجامىن مىندەتتى تۇردە زەردەلەۋ قاجەت. اعاشتاردان، تۇراقسىز جانە سىنعىش قۇرىلىمداردان اۋلاق بولىڭىز»، - دەيدى ماماندار.