تۇركى حالىقتارىنىڭ العاشقى پاسپورتى تابىلدى
حالىقارالىق تۇركى اكادەمياسىنىڭ پرەزيدەنتى دارحان ءقىدىرالى موڭعوليا جەرىنەن تابىلعان قۇتلىق قاعاننىڭ كەشەنى تۋرالى ايتتى، دەپ حابارلايدى Almaty-akshamy.kz Baq.kz-كە cىلتەمە جاساپ.
"بۇل وتە ۇلكەن جاڭالىق. بىلگە قاعان مەن كۇلتەگىننىڭ اكەسى، ەكىنشى تۇرىك قاعاناتىن قايتا تىرىلتكەن قۇتلىق قاعاننىڭ كەشەنى تابىلدى. بۇل - بارشا تۇركى الەمى ءۇشىن، سونىمەن قاتار بۇكىل كوشپەلى جۇرت ءۇشىن كەرەمەت جاڭالىق. مۇنداي قۋانىشقا ءبىز جۇيەلى جۇمىستاردىڭ ناتيجەسىندە باۋىرلاس مەملەكەتتەردىڭ قولداۋىمەن جانە موڭعوليانىڭ جەكە قولداۋىمەن، ءوزارا دوستىقپەن قۇرالعان سەنىمنىڭ ناتيجەسىندە جەتىپ وتىرمىز. بۇل جۇمىستار ءارى قاراي جالعاسادى. سەبەبى ءبىز ءبىر عانا كەشەندى اشىپ وتىرمىز"، - دەدى دارحان ءقىدىرالى ورتالىق كوممۋنيكاسيالار الاڭىندا ءوتىپ جاتقان بريفينگتە.
سپيكەردىڭ ايتۋىنشا، مۇنداي ءالى 9 كەشەن بار.
"ءبىراز جىلعا جەتەر جۇمىس كۇتىپ تۇر. بۇل ۇلكەن كەشەندى تۇرىكتىڭ تاسقا باسىلعان العاشقى پاسپورتى دەپ ايتۋعا بولادى. ويتكەنى “تۇرىك” اتاۋى ءبىرىنشى رەت قۇتلىق قاعان جازباسىندا كەزدەسىپ وتىر. سوندىقتان بۇل كيىز تۋىرلىقتى حالىقتاردىڭ ورتاق پاسپورتى دەسەك بولادى"، - دەدى دارحان ءقىدىرالى.