قۇسبەگىلىكتەن جاستار اراسىندا قازاقستان چەمپيوناتى باستالدى

جارىسقا قاتىساتىن 100-گە جۋىق قۇستىڭ قاتارىندا يتەلگى، قارشىعا جانە بۇركىت بار

بۇگىن، 10 اقپان جەتىسۋ وبلىسىندا جاستار اراسىندا «قۇسبەگىلىك» ۇلتتىق سپورت تۇرىنەن قازاقستان رەسپۋبليكاسىنىڭ XIV چەمپيوناتى باستالدى. سپورتتىق ءىس-شارا 12 اقپانعا دەيىن جالعاسادى، دەپ حابارلايدى Almaty-akshamy.kz.  

چەمپيوناتقا قاتىسۋعا الماتى، قاراعاندى، جامبىل، شىعىس قازاقستان، تۇركىستان، ماڭعىستاۋ، اتىراۋ، اباي، جەتىسۋ وبلىستارىنىڭ، سونداي-اق استانا جانە الماتى قالالارىنىڭ جاستارى نيەت بىلدىرگەن. جارىسقا قاتىساتىن 100-گە جۋىق قۇستىڭ قاتارىندا يتەلگى، قارشىعا جانە بۇركىت بار.
 
ەستەرىڭىزگە سالا كەتەيىك، قۇسبەگىلىك ۇلتتىق سپورتى قازاق تاريحىندا تامىرى تەرەڭگە تاراعان ەلىمىزدىڭ ءتول مادەني قۇندىلىعى بولىپ سانالادى. قازاق ۇلتىنىڭ ءداستۇرلى سالت-ساناسىمەن ەتەنە بايلانىسىپ، بۇگىنگى تاڭدا بىزگە قاز-قالپىندا جەتكەن اتالعان ۇلتتىق سپورت ءتۇرىن بولاشاق ۇرپاققا جەتكىزۋ – ەلىم دەگەن ءاربىر ازاماتتىڭ مىندەتى ءارى بورىشى.

قۇسبەگىلىك ق ر سپورت جانە دەنە شىنىقتىرۋ ىستەرى كوميتەتىنىڭ بۇيرىعىمەن ۇلتتىق سپورت ءتۇرى رەتىندە تانىلعان ساتتەن باستاپ 7 مەملەكەتتىڭ قاتىسۋىمەن 1 رەت الەم چەمپيوناتى، 2 رەت ازيا چەمپيوناتى (5 مەملەكەت)، 40-قا جۋىق حالىقارالىق تۋرنير مەن 15 رەت قازاقستان رەسپۋبليكاسىنىڭ چەمپيوناتتارى ۇيىمداستىرىلدى. اتالعان سپورت ءتۇرى استانا، الماتى قالالارىندا جانە ەلىمىزدىڭ باسقا دا وڭىرلەرىندە تۇراقتى دامىپ كەلەدى.