31 تامىزدان باستاپ قازاقستاندا قۇرىلىس ءجۇرىپ جاتقان ۇيلەردەن باسپانا ساتىپ الۋ ءتارتىبىن وزگەرتەتىن تۇزەتۋلەر كۇشىنە ەنەدى، دەپ حابارلايدى aqshamnews.kz
بۇل شارالار ۇلەسكەرلەردىڭ قۇقىعىن قورعاۋعا باعىتتالعان. تۇزەتۋلەر 30 شىلدەدە مەملەكەت باسشىسى قول قويعان “قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي قۇرىلىسىنا ۇلەستىك قاتىسۋ، اۆتوموبيل جولدارى جانە مۇگەدەكتىگى بار ادامداردى تاسىمالداۋ قىزمەتتەرىن كورسەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى” زاڭعا ەنگىزىلدى.
جاڭا ەرەجەلەرگە سايكەس، كوپپاتەرلى تۇرعىن ءۇي نەمەسە جەكە تۇرعىن ۇيلەر كەشەنىنەن ۇلەس ساتىپ الۋعا بايلانىستى بارلىق تولەم تەك قانا بانكتەر ارقىلى قولما-قول اقشاسىز جۇرگىزىلۋى ءتيىس. ياعني، قۇرىلىس سالۋشىعا قولما-قول اقشا بەرۋگە بولمايدى، قاراجات ۋاكىلەتتى كومپانيانىڭ بانكتىك شوتىنا اۋدارىلادى. بۇل مامىلەلەردىڭ اشىقتىعى مەن قاۋىپسىزدىگىن ارتتىرادى.
ماڭىزدىسى، بانك تولەمدى تەك ۇلەستىك قاتىسۋ شارتى ءبىرىڭعاي اقپاراتتىق جۇيەدە تىركەلگەن جاعدايدا عانا وتكىزەدى. ەگەر شارت تىركەلمەسە، تولەم جاساۋ مۇمكىن بولمايدى.
ەندى ۇلەستىك قاتىسۋ تۋرالى زاڭ تالاپتارى ورىندالماسا، جاڭادان سالىنىپ جاتقان ۇيدەن باسپانا ساتىپ الۋعا بايلانىستى كەز كەلگەن شارت جاساۋعا تىيىم سالىنادى. زاڭدا:
جاڭا سالىنىپ جاتقان كوپپاتەرلى تۇرعىن ءۇي نەمەسە جەكە تۇرعىن ۇيلەر كەشەنىنەن پاتەرگە جانە (نەمەسە) تۇرعىن ەمەس ءۇي-جايعا، جەكە تۇرعىن ۇيگە نە ولاردىڭ ۇلەسىنە مەنشىك قۇقىعىن نەمەسە وزگە دە زاتتىق قۇقىقتاردى ساتىپ الۋعا بايلانىستى جەكە نەمەسە زاڭدى تۇلعامەن، سونداي-اق بىرلەسكەن قىزمەت تۋرالى شارت بويىنشا ارەكەت ەتەتىن تۇلعامەن (جاي سەرىكتەستىك، كونسورسيۋم) كەز كەلگەن شارت ۇلەستىك قاتىسۋ تۋرالى زاڭ تالاپتارى ساقتالماي جاسالمايدى، – دەپ كورسەتىلگەن.
بانكتەر مەن يپوتەكا بەرەتىن ۇيىمدارعا قۇرىلىس سالۋشىنىڭ ۇلەسكەرلەردىڭ اقشاسىن تارتۋعا رۇقساتى نەمەسە ۇلەستىك قاتىسۋ كەپىلدىگى بولماعان جاعدايدا، قۇرىلىس كەزەڭىندەگى باسپانا ساتىپ الۋدى نەسيەلەۋگە تىيىم سالىنادى.
سونىمەن قاتار ۋاكىلەتتى كومپانيالار حالىقارالىق رەيتينگى “B+”-تەن تومەن ەمەس بانكتەردە ۆاليۋتالىق شوت اشۋعا مىندەتتەلەدى.
ۇلەستىك قاتىسۋ ءتاسىلى رەتىندە ءبىرىڭعاي وپەراتور كەپىلدىگىن الۋ كوزدەلگەن جاعدايدا، ۋاكىلەتتى كومپانيا ەكىنشى دەڭگەيلى بانكتەن حالىقارالىق رەيتينگتىك اگەنتتىكتىڭ “B+”-تەن تومەن ەمەس رەيتينگى بار شەتەل ۆاليۋتاسىنداعى اعىمداعى شوت اشۋعا ءتيىس. ەگەر بىرنەشە اگەنتتىكتىڭ باعالاۋى بولسا، ەڭ تومەنگىسى ەسكەرىلەدى، – دەلىنگەن زاڭدا.
ينجينيرينگتىك كومپانيالار تۇرعىن ءۇي قۇرىلىسىنىڭ بارىسى تۋرالى ەسەپتى اي سايىن اقپاراتتىق جۇيەلەر ارقىلى ۋاكىلەتتى ورگان بەكىتكەن نىسان بويىنشا جەرگىلىكتى اتقارۋشى ورگانعا، سونداي-اق ءبىرىڭعاي وپەراتورعا نەمەسە ەكىنشى دەڭگەيلى بانككە تاپسىرىپ وتىرۋعا مىندەتتى.
كوپپاتەرلى ءۇيدى نەمەسە تۇرعىن ءۇي كەشەنىن تاپسىرۋ مەرزىمى جوبادا كورسەتىلگەن كۇننەن بەس ايدان ارتىق شەگەرىلمەۋى ءتيىس.
كەپىلدىك شارتى مەرزىمىنەن بۇرىن بۇزىلعان جاعدايدا، كەپىلدىك جارناسىنىڭ ءبىر بولىگى قۇرىلىس سالۋشىعا كەپىلدىك مەرزىمىنىڭ قالعان ۋاقىتىنا پروپورسيونالدى تۇردە قايتارىلادى.
كەپىلدىك بەرۋ شارتى تەك بارلىق ۇلەستىك قاتىسۋ شارتتارى بۇزىلىپ، ۇلەسكەرلەرگە اقشاسى قايتارىلعاننان كەيىن عانا بۇزىلۋى مۇمكىن، – دەلىنگەن قۇجاتتا.
سونىمەن قاتار ۇلەسكەرلەردىڭ قاراجاتىن تارتۋعا رۇقسات نەمەسە ۇلەستىك قاتىسۋ كەپىلدىگى بولماسا، كوپپاتەرلى ۇيلەر مەن تۇرعىن ءۇي كەشەندەرىن جارنامالاۋعا تولىق تىيىم سالىنادى. بۇعان جەكە تۇلعالاردىڭ دا، زاڭدى تۇلعالاردىڭ دا، سونداي-اق بىرلەسكەن قىزمەتكە قاتىسۋشىلاردىڭ (جاي سەرىكتەستىك، كونسورسيۋم) قاراجاتىن تارتۋعا باعىتتالعان كەز كەلگەن جارناما كىرەدى. سونىمەن بىرگە نىساندار بەكىتىلگەن جوباداعى تۇرعىن ءۇي جىكتەمەسىنە سايكەس بولۋى ءتيىس.