قۇرىلىسشىلارعا – قۇرمەت!

14 تامىز – قۇرىلىسشىلار كۇنى

الماتى قالاسىنىڭ اكىمى ەربولات دوسايەۆ قۇرىلىس سالاسىنىڭ وكىلدەرىن كاسىبي مەرەكەسىمەن قۇتتىقتادى

الماتىقالاسىنىڭ اكىمى قۇتتىقتاۋ سوزىندە قۇرىلىس سالاسى قالا ەكونوميكاسىنىڭ نەگىزگى درايۆەرلەرىنىڭ ءبىرى ەكەنىن اتاپ ءوتتى. بۇگىندە قۇرىلىس سالاسىندا 100 مىڭنان استام ادام جۇمىس ىستەيدى. جىل سايىن قالادا ورتا ەسەپپەن 1،5 ملن شارشى مەتردەن استام تۇرعىن ءۇي پايدالانۋعا بەرىلەدى، الەۋمەتتىك جانە ونەركاسىپتىك نىساندار سالىنۋدا.

«سىزدەردىڭ جۇمىستارىڭىز بۇكىل قالانىڭ كەشەندى جانە ساپالى دامۋى ءۇشىن وتە ماڭىزدى. ءبىزدىڭ تۇرعىنداردىڭ ءومىر ءسۇرۋ ساپاسى مەن جايلىلىعى وسى سالاداعى جۇمىستىڭ ناتيجەلەرىنە تىكەلەي بايلانىستى»، – دەدى قالا اكىمى ەربولات دوسايەۆ.

سالتاناتتى شارا بارىسىندا شاھار باسشىسى قۇرىلىس سالاسى وكىلدەرىنىڭ جوعارى كاسىبيلىگىنە العىسىن ءبىلدىرىپ، كوپ جىلعى ەڭبەگى مەن ەرەن جەتىستىكتەرى ءۇشىن ولاردى العىس حاتتارمەن ماراپاتتادى. مەرەكەلىك شارا قۇرىلىسشىلار اراسىنداعى سپارتاكياداعا ۇلاستى.

مۇحيت ازىربايەۆ،  الماتى قالاسى اكىمىنىڭ ورىنباسارى

وتاندىق قۇرىلىس ماماندارىنىڭ مۇمكىندىگى جوعارى

قۇرىلىسشىلار كۇنى ايرىقشا مەيرام. وزدەرىڭىز بىلەتىندەي، قۇرىلىس ەلدىڭ يگىلىگىنە ىستەلەدى. مۇنىڭ ءوز ىشىندە قانشاما جاندار ەلگە قىزمەت ەتىپ ءجۇر. ناقتىراق ايتقاندا، تەك قانا قۇرىلىسشىلارمەن قاتار، ارحيتەكتور، جوبالاۋشى، قۇرىلىس ونىمدەرىن شىعارۋشى، ت.ب. ماماندار اتاپ وتەدى. بۇل سالادا جۇمىس اتقارۋشىلاردىڭ قالاعا ىستەپ جاتقان ىستەرى بارشىلىق. ءوز تاراپىمىزدان دا قالامىزدى دامىتىپ، جارقىراتىپ، ءاربىر نىسانعا ءوڭ بەرۋگە اتسالىسىپ كەلەمىز. مۇنىڭ بارلىعى تۇرعىندار مەن سىرتتان كەلەتىن قوناقتاردىڭ يگىلىگى ءۇشىن جاسالۋدا. ارينە، وسىنداي شارۋالاردىڭ بارلىعى قۇرىلىسقا تىكەلەي قاتىستى بولىپ تابىلادى. بۇل تۇرعىدان كەلگەندە وتاندىق قۇرىلىس ماماندارىنىڭ مۇمكىندىگى جوعارى. الداعى ۋاقىتتا اتقارىلاتىن ناقتى ىستەر جەتەرلىك. ويلاعان شارۋالارىمىزدىڭ ءبارى جۇزەگە اسادى دەپ سەنەمىز.

ءبىزدىڭ قالامىز «سەرۆيستىك قالا» ەكەنىن بىلەسىزدەر. اۋەلى قىزمەت كورسەتۋ دەگەنىمىز ازاماتتاردى باسپانامەن قامتۋ دەگەندى بىلدىرەدى. ارينە، يندۋستريالدى قۇرىلىس الاڭدارى دا بار. ونىڭ ءبىر پاراسى الاتاۋ اۋدانىندا بوي كوتەردى. سونىمەن بىرگە، بۇل باعىت بويىنشا شاعىن جانە ورتا كاسىپكە دە كوڭىل بولىنگەن. ونىڭ نىشانىن مەيرامحانالار، تاماقتانۋ ورىندارى، ساۋدا- ساتتىق ورتالىقتارىنان بايقاي الاسىزدار. وتكەن جىلعىمەن سالىستىرعاندا، الەۋمەتتىك نىسانداردىڭ سالىنۋ قارقىنى بەلسەندىرەك.

جۋىردا «ديزاين كود» دەگەن باعدارلاما قابىلدانادى. سول بويىنشا قالانىڭ كەلبەتىن ارلەۋدى جوبالاۋدامىز. ياعني قازاقي ۇلتتىق ناقىشتارداعى دۇنيەلەر، زاماناۋي ستيلدەر – ءبارى- ءبارى قامتىلادى. وزدەرىڭىز بايقاعانداي، جارنامالاردى بىرەۋلەر جوعارى، ەندىگىسى مۇلدەم تومەنىرەك ءىلىپ قويعان. سونىمەن قوسا، اعاش وتىرعىزۋ، جولدىڭ جايى قارالاتىن بولادى. وسىنىڭ بارشاسىن وسى جوبا اياسىندا ىسكە اسىرۋدى جوسپارلاۋدامىز. ونىڭ ىشىندە جوعارىدا ايتقانىمداي، قۇندىلىقتارىمىزدى كورسەتەتىن ويۋ-ورنەك، باسقاسى دا كىرىگەدى دەگەن ويدامىز.

قۇرىلىس سالاسىنا كەلەتىن جاستارعا ايتار اقىل-كەڭەسىمىز بىرەۋ عانا. ەڭ باستىسى، وقۋ كەرەك. جاقسى ءبىلىم السا، ءتاۋىر مامان رەتىندە جۇمىسقا ورنالاسادى. مۇمكىندىك بولسا، شەتەلدىك تاجىريبەدەن ءوتىپ، بىلىكتىلىگىن ارتتىرسا، نۇر ۇستىنە نۇر بولار ەدى. ايتپەسە، ءوزىمىزدىڭ ەلدە دە بىلىكتىلىكتى ارتتىرۋعا بار جاعداي جاسالعان. ءوزىمىزدىڭ ارحيتەكتور، قۇرىلىس سالاسىنىڭ مايتالماندارى بار، سول كىسىلەردىڭ تاجىريبەسىنە سۇيەنىپ، قاجەتتى دۇنيەنى ۇيرەنىپ الۋلارىنا دا بولادى. قازىرگى تاڭدا قۇرىلىس سالاسىندا كوپتەگەن جاستار ەڭبەك ەتىپ ءجۇر. قاراكوزدەرىمىزدى ءبىلىم الىپ، تابىستى ءىس اتقارۋعا شاقىرامىز. بويىندا قابىلەت-قارىمى بار جان جەردە قالمايدى دەگىمىز كەلەدى. ەڭ باستىسى، ەڭبەك ەتۋدەن ايانباۋ كەرەك. سودان كەيىن ومىرلىك جيناعان تاجىريبەسى وزدەرىنە قاجەت بولادى. سونىڭ ارقاسىندا ۇلكەن-ۇلكەن جۇمىستاردى اتقارادى.

جالپى، سوڭعى ەكى جىلداعى احۋال وزدەرىڭىزگە ءمالىم. مۇنداي اۋقىمدى شارا وتكىزىپ، مەيرامدى اتاپ وتۋگە مۇمكىنشىلىك كەلمەدى. پاندەميا ويعا العان ىستەرگە تەجەۋ بولدى. دەگەنمەن، بيىلعى جىل ەرەكشە. سونىڭ ارقاسىندا وزدەرىڭىز كورىپ وتىرعانداي، اشىق الاڭدا مەيرامدى 1 اپتادان بەرى اتاپ ءوتىپ كەلەمىز. ءبىز «ۇزدىك قۇرىلىسشى» بايقاۋىن جاريالاعان ەدىك. دالىرەك ايتقاندا، «ۇزدىك ماليار»، «ۇزدىك دانەكەرلەۋشى»، «ۇزدىك ارماتۋرشى»، ت.ب. دەپ جىكتەدىك. مۇنىڭ ءبارى ىنتالاندىرۋعا جاتادى. سونىمەن قاتار، ءارتۇرلى سپورتتىق شارالار – جۇگىرۋ، فۋتبول جارىستارىن قوسا ۇيىمداستىردىق. وزىمىزشە، سپارتاكيادا دەپ اتاۋ بەردىك. ولار جەكە-جەكە كوماندا، ءارقايسىسىنان سايىسكەرلەر شىعىپ، جەڭىل اتلەتيكادان 100 مەتر قاشىقتىققا جۇگىرىپ تە جارىستى. اراسىنان جەڭىمپازدار دا انىقتالدى. دارابوزدارعا جۇلدەلەر بەرىلدى.

قۇرىلىسشىلار كۇنىمەن شىن جۇرەكتەن قۇتتىقتايمىز!

بەيبىت شاحانوۆ،  الماتى قالاسى قۇرىلىس باسقارماسىنىڭ باسشىسى

ادال كاسىپ

ەڭ الدىمەن، اتاۋلى مەيراممەن قۇتتىقتايمىز. قۇرىلىسشى دەگەن ادال ماماندىق دەپ بىلەمىز. بۇل دەگەنىمىز، حالىقتىڭ يگىلىگىنە جاسالىپ جاتقان ءىس. قانشاما مىڭداعان جۇرتقا ءۇي-جاي سالىپ جاتىر. قالانىڭ ىشىندە 40-تان استام الەۋمەتتىك نىساندار بوي كوتەرۋدە. سونىمەن بىرگە، 7500 وقۋشىعا ارنالعان جاڭا مەكتەپ سالىنادى. بۇلاردىڭ بارلىعى زاماناۋي نەگىزگە باعىتتالعان. ونىڭ ىشىندە قالاعا ەندى قوسىلعان، جاڭادان بوي تۇزەگەن ەلدىمەكەندەرگە باسا نازار اۋدارىلادى. بۇگىنگى تاڭداعى قۇرىلىسشىلاردىڭ ىستەپ جاتقان ىستەرىنە وڭ كوزقاراسپەن قارايمىز.

قۇرىلىس سالاسى ەلىمىزدىڭ دامۋىنا دا ءوز سەپتىگىن تيگىزۋدە. ناقتىراق جەتكىزگەندە، ەكونوميكاداعى ۇلەس-سالماعى 60%-عا جەتتى. ءار قۇرىلىستىڭ ماڭىندا شامامەن 5-6 جۇمىس ورنى قۇرىلادى. مۇنىڭ ناتيجەسىندە قۇرىلىسقا قاجەتتى زاتتار شىعارىلا باستايدى. سول ماتەريالدار وتاندىق ءوندىرىستىڭ قارقىنىن ۇدەتەدى. ءدوپ باسىپ ايتقاندا، ءوزىمىزدىڭ كاسىپكەرلەردىڭ ءىسى العا ورلەيدى دەگەندى اڭداتادى.

ءبىزدىڭ نەگىزگى تالاپ، ول – وتاندىق ونىمگە سۇرانىستى ارتتىرۋ. سول سەبەپتى دە، وسى باعىتتا جۇمىس اتقارىپ كەلەمىز. ياكي، سىرتتان اكەلىپ ەمەس، ءوزىمىزدىڭ ەلدە وندىرگەن ونىمدەردى پايدالانۋعا باسا نازار اۋدارامىز. بۇعان سۇرانىس كۇننەن-كۇنگە ارتۋدا. الگىندە ايتقانىمداي، وسىناۋ وتاندىق وندىرىستەرگە قولداۋ كورسەتۋدىڭ ارقاسىندا ءىس ىلگەرى باسۋدا.

ءۇيدىڭ قۇنىنا بايلانىستى ويىممەن ءبولىسۋدى ءجون سانايمىن. الەمدە قۇرىلىس ماتەريالدارىنىڭ باعاسى وسۋدە. جالپى، بارلىق نارسەدە ءوسۋ بايقالادى. الايدا، مۇنداي جاعداياتتارعا قاراماستان، مەملەكەت تاراپىنان جىل سايىنعى قولداۋ كۇشەيىپ جاتىر. قازاقستاندا تۇرعىن ءۇي قۇرىلىسى بۇرىن تاريحتا بولماعان دارەجەگە كوتەرىلدى. اسىرەسە، ءىرى مەگاپوليستەردە، الماتىنىڭ وزىندە جەردىڭ تىعىزدىعى، حالىق سانىنىڭ ارتۋىن ەسكەرۋدەمىز. سول ءۇشىن قوسىمشا جەكە كاسىپكەرلەرمەن ۋاعدالاستىق ورناتىپ، اتالعان ماسەلەلەرگە كوڭىل بولۋدەمىز. ونىڭ سىرتىندا باعاسى مەن ساپاسى نازاردا تۇر. مۇنىڭ بارلىعى حالىقتىڭ قامى ءۇشىن جاسالۋدا دەمەكپىن.

ەربولات ەسكەندىروۆ،  Exclusive qurylys كومپانياسىنىڭ بولىمشە باسشىسى

ەكونوميكا لوكوموتيۆى

قۇرىلىسشىلار مەيرامى قارساڭىندا كوڭىل كۇي كوتەرىڭكى. سەبەبى، ءوزىمىز دە وسى سالادا ەڭبەك ەتۋدەمىز. ەگەر ەلىمىزدىڭ اۋماعىندا قۇرىلىس ءجۇرىپ، قايناعان تىرشىلىك بولىپ جاتسا، ول دەگەن ناعىز قۋانىش. تاۋبە، بۇل جاعىنان اتقارىلىپ جاتقان شارۋالار جەتەرلىك. بۇدان شىعاتىن قورىتىندى – قۇرىلىس بار جەردە ەكونوميكا ىلگەرى باسادى دەگەن ماعىنانى اڭعارتادى. دەمەك، قارجى، بىلىكتى ماماندار – ءبارى-بارى بار دەگەن ءسوز.

الماتى سەيسميكالىق ايماققا جاتادى. مۇنداعى عيماراتتار 9 بالدىق شكالاعا ەسەپتەلگەن. سوندىقتان دا 9-10 قاباتتان بيىك سالۋدىڭ قاجەتى جوق دەگەن ويدامىن. دەگەنمەن، قالانىڭ شىرايى ءۇشىن بىرلى-ەكىلى اسەم، كوزدىڭ جاۋىن الاتىن جاھانداعى بۋردج-حاليفا سىندى عيمارات سالۋعا بولادى. ونىڭ بارلىعى ارحيتەكتورلار، جوبالاۋشىلار، قۇرىلىس سالاسىنىڭ ماماندارىمەن كەڭەسىپ، پىشىلەتىن دۇنيە. ونداي جاعدايدا 4-5 قابات جەر دەڭگەيىنەن تومەن قاباتتار قوسا سالىنادى. ويتكەنى، سول ءۇيدىڭ ىرگەسى مىقتى بولۋى كەرەك. مۇنىڭ بارشاسى بولاشاقتىڭ ءىسى دەر ەدىم.

ەربول بەيسەنوۆ،  «رەمبۋس» ج ش س باس ديرەكتورى ينجەنەر-قۇرىلىسشى

ماڭداي تەر اقتالادى

قۇرىلىسشى دەگەن ەرەكشە ماماندىق. بىلاي قاراپ تۇرساڭىز، ءجاي جاتقان قارا جەردى قالاعا اينالدىرىپ، جان-جاعىن ادام تانىماستاي اباتتاندىرادى. 2-3 جىلدا ۇپ-ۇلكەن، اسەم عيماراتتار قاز-قاتار نەمەسە اينالدىرا بوي كوتەرەدى. ودان كەيىن شاعىن مولتەك اۋداندار پايدا بولادى. وسىنداي ىستەر قۋانتادى. قۇرىلىسشىعا بۇدان ارتىق شاتتىقتىڭ كەرەگى شامالى. جاس قۇرىلىسشىلارعا ادالدىق، تاباندىلىق، ەڭبەكقورلىق تىلەيمىن. سونىمەن بىرگە، ءبىلىم كەرەك.

وسى كۇنى ساپاعا بايلانىستى ماسەلە بارشىلىق. قۇرىلىستىڭ ساپاسى جاعىنا ءار مەكەمە ءوزى جاۋاپتى. بىلايشا ايتقاندا، اركىم ءوز ىسىنە ءوزى جاۋاپ بەرەدى. مەن بۇل ارادا ءوز جانىمداعى ازاماتتارعا ءبىر عانا نارسەنى شەگەلەپ ايتامىن. ءبىز سالعان ۇيلەردى الاتىندار قاراپايىم ءوز قازاعىمىز. قالتالىلار كەلە بەرمەيتىنى انىق. اقشالى ادامداردىڭ قاي جاقتاردان ءۇيلى بولاتىنىن بىلەسىزدەر. سوندىقتان شامامىز كەلگەنشە، مەملەكەتتىك ستاندارت بويىنشا بەرىلگەن باعانى ەسكەرىپ، جاقسى ساپامەن وتكىزۋگە تىرىسامىز. ءبىز سالعان ۇيلەردى وسى شارا ءوتىپ جاتقان الاتاۋ اۋدانىنان دا بايقاي الاسىزدار.

ءبىز ءوز شاما-شارقىمىزعا قاراي حالىققا ساپالى، ءومىر سۇرۋگە ىڭعايلى، قازاقتىڭ تۇرمىس- سالتىن ەسەپتەپ، ءوز تاراپىمىزدان بار قولايلىلىقتى جاساۋعا تىرىسۋدامىز.

رۇستەمبەك جاقپانوۆ،  «شەبەر» كومپانياسىنىڭ ديرەكتورى

الماتى وركەندەۋدە

ءبىز قۇرىلىس سالاسىندا ءبىرقانشا جىلدار بوي ەڭبەك ەتۋدەمىز. 1996 جىلى ەلوردامىزدىڭ ىرگەتاسى قالانعان شاقتا دا ءوز ۇلەسىمىزدى تيگىزدىك. ول جەردە كوپتەگەن نىسانداردى سالدىق. اتىراۋدا، تالدىقورعاندا «جاستار» سپورت سارايىن، ت.ب. كوپتەگەن عيماراتتاردى تۇرعىزدىق. قازىرگى تاڭدا الماتىدا دا تۇرعىن ۇيلەر، مەكتەپتەر سالۋدامىز.

سونىمەن بىرگە، تاعى ءبىر ويىم بار. وزدەرىڭىز بىلەتىندەي، قالامىز گۇلدەنىپ جاتىر. وسىعان مەنىڭ ويىمشا، فۋتبول الاڭدارى كەرەك. جاقسى، ادەمى، ساۋلەتى مەن سالتاناتى كەلىسكەن سپورت كەشەندەرى بوي كوتەرسە، حالىقتىڭ بۇقارالىق سپورتقا دەگەن ىنتاسى ارتاتىن ەدى.

الماتىنىڭ دامۋ قارقىنىنا كوڭىلىمىز تولادى. ءدان ريزامىز. شاھارىمىز وركەندەپ، وسە بەرسىن. قالا گۇلدەنسە، ءبارىمىزدىڭ اجارىمىز بولماق.

زەمفيرا شاحمۇرات قىزى،  "Exclusive qurylys"  كومپانياسىنىڭ باس ديرەكتورى

قۇرىلىستا ىستەۋ ناعىز ەرلىك

شىنتۋايتىنا كەلگەندە، ءبىز دە قۇرىلىسشىمىز. ءاربىرىمىز ءوز وتباسىمىزعا، جاقىندارىمىزعا ءۇي سالىپ جاتىرمىز دەپ قاراعان ابزال. ازاماتتارىمىز كۇنى-تۇنى جۇمىس ىستەيدى. ولارعا وڭاي ەمەستىگىن تۇسىنەمىز. سول سەبەپتى، قاجىماۋعا، بويداعى بار قابىلەتتى ورتاعا سالۋعا شاقىرامىز. اراسىندا ىنتالاندىرۋ جاسايمىز. ويتكەنى، مۇنداي اۋقىمدى، قول مەن وي ەڭبەگى بىرلەسىپ جۇزەگە اسىرىلاتىن جەردە ادامعا تۇسەر سالماق تا وڭاي ەمەس. ءار ءىستىڭ ءوز جەمىسى بولۋى كەرەك. قالامىزدا بوي كوتەرىپ جاتقان ءار نىسان قۇرىلىسشىنىڭ قولىمەن جاسالادى.

شاھار وتە ۇلكەن جىلدامدىقپەن دامىپ جاتىر. بۇل جاعىنان العاندا ءسوزىمىز جوق. وسى ارادا بىرنارسەنى ايتايىق. ءاربىر الەۋمەتتىك قۇرىلىس نەمەسە تۇرعىن ۇيلەر ينفراقۇرىلىمدى اينالىپ وتپەيدى. سوندىقتان ءاربىر عيماراتتىڭ ساپاسىنا نازار اۋدارامىز. ونىڭ توڭىرەگىندە دۇكەن، جاياۋ جۇرگىنشىلەر جولى، بالالار وينايتىن الاڭدار – ءبارى-بارى بولعانى دۇرىس.