الماتىدا قۇرىلىس زاتتارىن ساتاتىن دۇكەن وتقا وراندى. ءورت سوندىرۋشىلەر قىزىل جالىندى 20 مينۋتتىڭ ىشىندە ءسوندىردى، دەپ حابارلايدى Almaty-akshamy.kz.
الماتى قالالىق توتەنشە جاعدايلار دەپارتامەنتىنىڭ مالىمەتىنشە، بۇگىن 16:16 شاماسىندا ءورت ءسوندىرۋ بريگاداسى تۇركسىب اۋدانى «قايرات» ىقشام اۋدانى، تۇركىستان كوشەسى 27، مەكەنجايىنا جوعارى رانگ بويىنشا شىقتى.
«وقيعا ورنىنا 6 مينۋتتا كەلگەن ءورت سوندىرۋشىلەر قۇرىلىس ماتەريالدارىن ساتاتىن دۇكەن اۋماعىنىڭ 150 شارشى مەتر جەرى اشىق جالىنمەن جانىپ جاتقانىن انىقتادى. قابىلدانعان شارالارمەن 16:33-تە ءورتتى اۋىزدىقتاۋعا قول جەتكىزىلىپ، 16:42-دە جويىلدى»، دەپ حابارلادى دەپارتامەنتتەن.
قازىرگى ۋاقىتتا، ۇيىندىلەردى بولشەكتەۋ، تۇتانىپ تۇرعان قۇرىلىمدارعا سۋ توگۋ جۇمىستارى جۇرگىزىلۋدە.
اتقارىلعان شارالارمەن تاۋارلىق-ماتەريالدىق قۇندىلىقتارى بار كورشى ساۋدا نۇكتەلەرىنە وتتىڭ تارالۋىنا جول بەرىلمەدى.