كوكشەنىڭ كوركەم بۋرابايىندا پرەزيدەنت قاسىم-جومارت توقايەۆتىڭ قاتىسۋىمەن ۇلتتىق قۇرىلتايدىڭ 4-وتىرىسى ءوتتى. قۇرىلتايدىڭ ءبىلىم جانە عىلىم سەكسياسىندا قوعامدى مازالاعان كوپ ماسەلە كوتەرىلدى. سونىڭ ىشىندە جاڭا قۇرىلعان پرەزيدەنت جانىنداعى ۇلتتىق عىلىم اكادەمياسىنىڭ بولاشاعى، قوعامداعى مەملەكەتتىك ءتىلدىڭ قولدانىسى، ءتىل ءبىلۋ دەڭگەيى مەن مادەنيەتىنە قاتىستى تالقىلاۋ قىزۋ ءجۇردى. سەكسيا قاتىسۋشىلارى ءار ماسەلە جونىندە ءوز ۇسىنىسىن ايتتى.
قۇرىلتاي الدى وتكەن كەڭەستەگى ۇسىنىستاردىڭ ورىندالۋ بارىسى، عىلىم مەن جوعارى ءبىلىم سالاسىن وزىق حالىقارالىق ءبىلىم بەرۋ جۇيەسىمەن قۇرمالاستىرۋ جولىنداعى باستامالار مەن قارقىندى ىستەر تۋرالى عىلىم جانە جوعارى ءبىلىم ءمينيسترى ساياسات نۇربەكتىڭ جان-جاقتى بايانداماسى قوعام بەلسەندىلەرىنىڭ كوڭىلىنەن شىقتى.
وسى وتىرىستان مەملەكەتتىك ءتىل تۋرالى پىكىرتالاسقا قاتىسىپ، عىلىمي-زەرتتەۋ ينستيتۋتتارىنىڭ الەۋەتىن نىعايتۋعا قاتىستى ۇسىنىسىمدى ايتتىم.
1. جوعارعى وقۋ ورىندارىنىڭ شەتەلدىك عالىمدار مەن عىلىمي ورتالىقتارمەن بايلانىسىن كۇشەيتۋ جۇمىستارى وتە قارقىندى ءجۇرىپ جاتىر. بۇل قۋانتادى. عىلىمي-زەرتتەۋ ينستيتۋتتارى جاڭا عىلىمي باعىتتاردى اشىپ، زەرتتەۋ جۇرگىزۋى ءۇشىن دە شەتەلدىك عىلىمي ورتالىقتارداعى قىسقامەرزىمدى تاعىلىمدامانىڭ، سونىمەن بىرگە شەتەلدىك عالىمداردى ارنايى كۋرستار وتكىزۋگە، ترەنينگتەر وتكىزۋگە ينستيتۋتقا شاقىرۋدىڭ ماڭىزى زور بولىپ تۇر. مىسالى، ءبىز ينستيتۋتتا پسيحولينگۆيستيكا ءبولىمىن اشتىق. ءبولىم ماماندارى وسى سالادا ءوز زەرتتەۋلەرىن تىڭنان باستاپ جۇرگىزىپ وتىر دەۋگە بولادى. ال بۇل باعىتتا ءبىراز جەتىستىككە جەتكەن شەتەلدىك عالىمداردى ۇجىمعا شاقىرىپ، نەمەسە ءبولىم ماماندارىن قىسقامەرزىمدى تاعلىمداماعا جىبەرسە - ءبىراز ءبىلىم، بىلىك، داعدىمىزدى جەتىلدىرەر ەدى. وسىعان وراي ناقتى تەتىكتەر مەن ماقساتتالعان قارجى كوزدەرى ويلاستىرىلسا جاقسى بولار ەدى. عىلىمي-زەرتتەۋ ينستيتۋتتارى وزدەرى كونكۋرستان ۇتىپ العان باعدارلامالىق-نىسانالىق قارجىلاندىرۋ جانە گرانتتىق زەرتتەۋ جوبالارى بويىنشا عانا وسىنداي مۇمكىندىككە بولا الادى، سوندىقتان ولاردىڭ كونكۋرستىق قۇجاتتاماسىندا اتالعان ماسەلەلەر ەسكەرىلسە دەگەن ۇسىنىس.
2. قانداي دا ءبىر كۇردەلى ماسەلەنى شەشەتىن مامانداندىرىلعان كوميسسيالاردى قۇرۋدا سول ماسەلەگە ارنالعان مونوگرافيالاردىڭ، عجبسسقك بازاسىنداعى جۋرنالداعى ماقالالالاردىڭ، سونىمەن بىرگە سكوپۋس، Web of Science بازاسىنداعى جۋرنالداعى ماقالالاردىڭ بولۋى نەمەسە باسقا دا عىلىمي باسىلىمدا عىلىمي جاريالانىمى، ماسەلە بويىنشا زەرتتەۋمەن اينالىسقانىن راستايتىن عىلىمي دايەكتى ەڭبەگى بولۋى سول مامانداندىرىلعان جۇمىس توبى مۇشەسىنىڭ باستى تالابى رەتىندە قارالۋى ۇتىمدى بولار ەدى. ولاي بولماعان جاعدايدا، سالالىق كوميسسيا جۇمىسى بىردەن كوزدەگەن ناتيجەگە جەتە الماي قالۋى ابدەن مۇمكىن.