«قايرات» فۋتبول كلۋبى جانە كوماندانىڭ باس باپكەرى قۇربان بەردىيەۆ كەلىسىمشارت مەرزىمىن ۋاقىتىنان بۇرىن اياقتاۋ تۋرالى كەلىسىمگە كەلگەن، دەپ حابارلايدى Almaty-akshamy.kz كلۋبتىڭ باسپا ءسوز قىزمەتىنە سىلتەمە جاساپ.
قۇربان بەكيۇلىمەن بىرگە كومەكشىلەرى يۆان دانيليانس، دميتريي كيريچەنكو، اندرەي ماسيۋرا جانە ەدۋارد كۋندۋحوۆ كلۋب ساپىنان كەتەدى. بەردىيەۆ ويىنشى رەتىندە دە الماتىلىق كلۋبتىڭ نامىسىن قورعاعان. جارتىلاي قورعاۋشى پوزيسياسىندا الماتىلىق كلۋب جەيدەسىندە 160 ويىن وتكىزگەن. 90-جىلداردىڭ باسىندا قۇربان بەكي ۇلى اسسيستەنت جانە باس باپكەر رەتىندە «قايراتتى» باپتادى، 1992 جىلى قازاقستان بىرىنشىلىگىنىڭ جەڭىمپازى اتاندى. 2021 جىلى بەردىيەۆ الماتىلىق كلۋبقا قايتا ورالدى، العاشىندا باقىلاۋ كەڭەسى ءتوراعاسىنىڭ كەڭەسشىسى قىزمەتىندە بولدى، كەيىن نەگىزگى كوماندانىڭ باس باپكەرى اتاندى. «سارى-قارالار» بەردىيەۆتىڭ باپتاۋىمەن العاش رەت ەۋروكۋبوكتىڭ توپتىق كەزەڭىندە ونەر كورسەتتى، سونىمەن قاتار قازاقستان كۋبوگىن جەڭىپ الدى.