قۇربان ايتتا الماتى وبلىسى تۇرعىندارى قاۋلى تالاپتارىن ساقتاۋى ءتيىس

قاۋلى 7 شىلدەدەن باستاپ كۇشىنە ەنەدى

الماتى وبلىسىنىڭ تۇرعىندارى اراسىندا سOVID-19 جانە ءجىتى ىشەك ينفەكسيالارىنىڭ تارالۋىنا جول بەرمەۋ ماقساتىندا ءوڭىردىڭ باس مەملەكەتتىك سانيتاريالىق دارىگەرى ەرعالي سىدىمانوۆتىڭ قاۋلىسى جاريالاندى، دەپ حابارلايدى Almaty-akshamy.kz قازاقپارات-قا سىلتەمە جاساپ.
قاۋلى تالاپتارى 8-11 شىلدە ارالىعىندا، ياعني قۇربان ايت كەزىندە ساقتالۋى ءتيىس. قاۋلى ءماتىنى بويىنشا، وبلىستىڭ قالالارى مەن اۋداندارىنىڭ اكىمدەرىنە، پوليسيا دەپارتامەنتى، ءدىن ىستەرى باسقارماسى، ۆەتەريناريالىق باقىلاۋ جانە قاداعالاۋ جونىندەگى اۋماقتىق ينسپەكسيا، سونداي-اق ايماقتىڭ باس يمامىنا كەلەسى تالاپتاردى قامتاماسىز ەتۋ مىندەتتەلەدى:

1) مالدى اۆتوماشينالاردان جانە جەكە مەنشىك ءۇي يەلىكتەرىنەن وتكىزۋگە تىيىم سالۋ؛

2) ۆەتەريناريالىق قىزمەتتىڭ رەسمي ۆەتەريناريالىق-سانيتاريالىق قورىتىندىسىن العان سويۋ پۋنكتتەرى مەن الاڭداردا (ۆەتەريناريالىق قىزمەت بەكىتكەن تىزبەگە سايكەس اۋداندارداعى سويۋ پۋنكتتەرى، الاڭدار) مال سويۋدى جانە وتكىزۋدى ۇيىمداستىرۋ؛

3) مال سويۋدى ۆەتەريناريالىق انىقتاما بولعان جاعدايدا عانا جۇرگىزۋ؛

4) وبلىستىڭ بارلىق اۋماعىنداعى سويۋ پۋنكتتەرىندە كۇشەيتىلگەن مەملەكەتتىك ۆەتەريناريالىق-سانيتاريالىق باقىلاۋ جانە قاداعالاۋ؛

5) Qurban2022.kz سايتقا ءوتىنىم بەرە وتىرىپ، ونلاين رەجيمدە قۇرباندىق شالۋدى ۇيىمداستىرۋ مۇمكىندىگى تۋرالى حالىقپەن ءتۇسىندىرۋ جۇمىسىن جۇرگىزۋ؛

6) توڭازىتقىش جابدىقتاردىڭ، رەفريجەراتورلاردىڭ جانە جەكە قورعانىس قۇرالدارىنىڭ قاجەتتى سانىن قامتاماسىز ەتە وتىرىپ، مۇقتاج ادامدارعا تەز بۇزىلاتىن ونىمدەردى (قۇرباندىققا شالىنعان مالدىڭ ەتىن) تاسىمالداۋ جانە ساقتاۋ جونىندەگى سانيتاريالىق-ەپيدەميولوگيالىق قاعيدالاردىڭ تالاپتارىن ساقتاۋ.

سونداي-اق، ءجىتى ىشەك ينفەكسيالارىنىڭ جانە تاماقتان ۋلانۋدىڭ الدىن الۋ ماقساتىندا الماتى وبلىسىنىڭ تۇرعىندارى مەن قوناقتارىنا ۇسىنىلادى:

1) قوعامدىق تاماقتانۋ وبەكتىلەرىندە (تويحانا، مەيرامحانالار، ءدامحانالار، اسحانالار، مەشىتتەر جانە ت.ب.) جانە سالتتىق ءىس-شارالاردى وتكىزۋ بويىنشا قىزمەت كورسەتەتىن وبەكتىلەردە ءارتۇرلى ءىس-شارالاردى وتكىزۋ كەزىندە ۇيدە دايىندالعان تاعامداردى پايدالانباۋ؛

2) تەز بۇزىلاتىن ونىمدەردى تەك سۋىق جاعدايدا عانا ساقتاۋ. ازىق-تۇلىك ونىمدەرىن، اسىرەسە ءسۇت، سالاتتار ساتىپ العاندا، جارامدىلىق مەرزىمىنە، شىعارىلعان كۇنىنە نازار اۋدارىڭىز، دايىندالعان تاعامدى بولمە تەمپەراتۋراسىندا 2 ساعاتتان ارتىق قالدىرماۋ؛

3) تەك تازا قاپتامانى (پوليەتيلەن، تاماق ونىمدەرىنە ارنالعان كونتەينەرلەر جانە ت.ب.) پايدالانۋ، قوقىس پەن تاماق قالدىقتارىن جيناماۋ، شىبىندار مەن تاراقانداردىڭ پايدا بولۋىنا جول بەرمەۋ؛

4) كەزدەيسوق ادامداردان نەمەسە سانكسيالانباعان ساۋدا ورىندارىنان تاماق ونىمدەرىن ساتىپ الماۋ؛ 5) جاڭا دايىندالعان تاعامدى الدىڭعى كۇننىڭ قالدىقتارىمەن ارالاستىرماۋ، ءبىراق ەگەر دايىن تاعام كەلەسى كۇنگە قالسا، وندا ونى قولدانار الدىندا تەرميالىق وڭدەۋدەن وتكىزۋ (قايناتۋ نەمەسە قۋىرۋ).

6) تۇرعىن ءۇيدى ۇنەمى تازا ۇستاۋ جانە جەكە گيگيەنا ەرەجەلەرىن ساقتاۋ، كىشكەنتاي بالالارعا قايناتىلماعان ءسۇت، شيكى جۇمىرتقا بەرمەۋ، تاماق دايىنداۋ ءۇشىن تەك جاڭا ونىمدەردى پايدالانۋ.