ول ۇكىمدى تىڭداعاننان كەيىن بارشا مۇسىلمانداردان كەشىرىم سۇراعان.
گروزنىي سوتى 2023 جىلى 4 مامىردا قۇران كىتابىن ورتەگەن ۆولگوگراد تۇرعىنى نيكيتا جۋراۆەلگە ۇكىم شىعاردى. ول ەندى جازاسىن جالپى رەجيمدەگى تۇرمەدە وتەيتىن بولادى.
تاسس اگەنتتىگىنىڭ مالىمەتىنە سۇيەنسەك، ول سوت ۇكىمىن تىڭداعاننان كەيىن بارشا مۇسىلماننان كەشىرىم سۇراپ، سوت ۇكىمىن ءادىل دەپ سانايتىنىن مالىمدەگەن. بۇعان دەيىن ول يسلام ءدىنىن قابىلداعىسى كەلەتىنىن ايتقان. ءتىپتى، قۇران وقىپ العاشقى قادامدارىن جاساپ جۇرگەنىن جەتكىزىپتى.
دەسەكتە، جۋراۆەلدىڭ ادۆوكاتى يۋليا انتونوۆا ۇكىمگە شاعىم تۇسىرەتىنىن مالىمدەگەنىن جازدى ينتەرنەت باسىلىمى. قورعاۋشىنىڭ ايتۋىنشا، ۇكىمنىڭ قانشالىقتى زاڭدى ەكەنىن قىلمىستىق ىستەر بويىنشا سوت القاسى قاراۋى كەرەك.
ەسكە سالساق، نيكيتا جۋراۆەلگە قاتىستى ءىس ۆولگوگرادتاعى مەشىت ماڭىندا قۇران كىتابىن ورتەگەنى قوزعالعان بولاتىن. وسى ءىسى ءۇشىن ول 20-مامىردا ۇستالىپ، 22-مامىردا قاماۋعا الىندى.
تەرگەۋ بارىسىندا وزىنە تاعىلعان ايىپتى ءىشىنارا مويىنداعان. ايتا كەتۋ كەرەك، جۋراۆەلدىڭ مۇنداي كەلەڭسىز ارەكەتى شەشەنستاندا مىڭداعان ادامنىڭ ەرەۋىلگە شىعۋىنا سەبەپ بولعان.
ەسىڭىزدە بولسا، مەملەكەت باسشىسى قاسىم-جومارت توقايەۆ 2023 جىلى شىلدەدە ءبىرقاتار مەملەكەتتە بولعان قۇراندى ورتەۋ اكتىلەرىن قازىرگى الەمدەگى جاعدايدى شيەلەنىستىرۋگە، حالىقتار مەن مەملەكەتتەر اراسىنداعى سەنىمگە نۇقسان كەلتىرۋگە باعىتتالعان ارانداتۋشىلىق ارەكەت ەكەنىن ايتقان بولاتىن.