ۇلتتىق كينونى قولداۋ مەملەكەتتىك ورتالىعى قۇقىق قورعاۋ ورگاندارىنداعى سىبايلاس جەمقورلىق تۋرالى ەكشن-فيلمدى جارىققا شىعارادى.
پروديۋسەرلەردىڭ ايتۋىنشا، «جازا» كينوكارتيناسى كينوتەاترلاردا عانا ەمەس، الەۋمەتتىك جەلى ارقىلى دا نارىقتى ءدۇر سىلكىندىرمەك. ءفيلمنىڭ رەجيسسەرى – دارحان تولەگەنوۆ، دەپ حابارلايدى Almaty-akshamy.kz.
ۇلتتىق كينونى قولداۋ مەملەكەتتىك ورتالىعىنىڭ باسقارما ءتوراعاسى قۇرمانبەك جۇماعالي كينونىڭ پروكاتى مەن حالىقارالىق دەڭگەيدە تانىمال ەتۋگە قاتىستى سۇراقتاردى پىسىقتاۋ ءۇشىن پروديۋسەر ماكسيم اكباروۆپەن كەزدەستى. ول باسقاراتىن Golden Man Media شىعارماشىلىق توبى فيلم وندىرىسىمەن اينالىسىپ جاتىر.
«بۇعان دەيىن فيلمدەردىڭ جارناماسىنا قاتىستى جۇمىستى تەك ءوزىمىز اتقاراتىنبىز. ءقازىر كينونى دامىتۋ ورتالىعى تارپىنان قولداۋ بار، بۇل – ءبىز ءۇشىن ۇلكەن كومەك. سەيلز اگەنت (sales agent) رەتىندە “نيەت” دەپ اتالاتىن قازاقستاندىق كومپانيانى جۇمىلدىردىق. ونداعى ماماندار امەريكاندىق QED International كينوديستريبيۋتورىمەن سەرىكتەستىك ورناتىپ، برەد پيتت ويناعان «قاھار» جانە اتاقتى «№9 اۋدان» فيلمدەرىنىڭ ساتىلىمىمەن اينالىسقان بولاتىن. ەندى QED International ءبىزدىڭ فيلمگە قىزىعۋشىلىق تانىتىپ وتىر. ءقازىر بارلىق مۇمكىندىكتەردى پايدالانا وتىرىپ، Netflix، Amazon، HBO جانە Peacock سىندى الەمدەگى نەگىزگى ستريمينگتىك پلاتفورمالارمەن كەلىسسوزدەر جۇرگىزىپ جاتىرمىز. ءبىزدىڭ فيلم جارىققا شىققان سوڭ، ەكى تاراپتىڭ قاۋقارىن كورسەتە الاتىنداي نارىقتى ءدۇر سىلكىندىرۋى كەرەك»، – دەدى ماكسيم اكباروۆ.
كورەرمەندەر كينوكارتينانى ۇلكەن ەكرانداردان بيىل كۇزدە تاماشالايتىن بولادى. ءقازىر ساۋندترەكتەردى تانىمال ارتيستەر جازىپ جاتىر، ولاردىڭ ەسىمدەرى ءفيلمنىڭ پروكاتى قارساڭىندا جاريالانادى.
«فيلمدەر تابىستارعا جەتىپ، قارجى اكەلۋى كەرەك. وكىنىشكە وراي، شىعارماشىلىق توپتاردىڭ كەيبىرى ءتۇسىرىلىم جۇمىستارى اياقتالعاننان كەيىن كينونى قالاي جارنامالاپ، جارىققا شىعارۋ قاجەت ەكەنىن نەمەسە ستريمينگتىك پلاتفورمالارعا قالاي ۇسىنۋعا بولاتىنىن بىلمەيدى. سوندىقتان پيچينگتەن كەيىن ءبىز پروكاتقا شىعارۋ تەتىكتەرى مەن حالىقارالىق نارىققا قالاي شىعۋعا بولاتىنىن ءتۇسىندىرۋ ءۇشىن كينەماتوگرافيستەرگە ارنالعان ترەنينگتەر ۇيىمداستىرۋدى جوسپارلاپ وتىرمىز. نارىقتا كينوپروديۋسەرلەردىڭ تاپشىلىعى سەزىلەدى»، – دەپ اتاپ ءوتتى قۇرمانبەك جۇماعالي.