التىندى الماتى اۋەجايى ارقىلى بىرىككەن اراب امىرلىكتەرىنە زاڭسىز اكەتپەك بولعان.
كونتراباندا مەملەكەتتىك باقىلاۋدى اينالىپ ءوتىپ، كولىك پوليسياسىنىڭ لاۋازىمدى تۇلعالارىنا پارا بەرۋ ارقىلى جۇزەگە اسىرىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
ىشكى ىستەر مينيسترلىگىنىڭ ۇيىمداسقان قىلمىسقا قارسى كۇرەس جانە وزىندىك قاۋىپسىزدىك جونىندەگى بولىمشەلەرى الماتى قالاسىنىڭ حالىقارالىق اۋەجايى ارقىلى بىرىككەن اراب امىرلىكتەرىنە باعالى مەتالداردى زاڭسىز اكەتۋدى جۇزەگە اسىرماق بولعان قىلمىستىق توپ قىزمەتىنىڭ جولىن كەستى.
الماتى قالاسىنىڭ حالىقارالىق اۋەجايىندا كولىكتەگى پوليسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسىنىڭ قىزمەتكەرىنە كەدەندىك جانە شەكارالىق باقىلاۋ ايماعى ارقىلى «سالەمدەمەنى» الىپ ءوتۋى ءۇشىن 600 اقش دوللارى سوماسىندا پارا بەرۋ ارەكەتى كەزىندە قازاقستان رەسپۋبليكاسىنىڭ ازاماتى ۇستالدى. جەكە تەكسەرۋ بارىسىندا ودان 1200 اقش دوللارى تاركىلەندى.
جەدەل-ىزدەستىرۋ شارالارىن جۇرگىزۋ ناتيجەسىندە اۋەجاي عيماراتىندا قحر ازاماتى ۇستالدى، ول كۇدىكتىنىڭ سىبايلاسى بولا وتىرىپ، التىندى اۋە ارقىلى الماتىدان دۋبايعا جەتكىزۋى كەرەك بولعان. ونىڭ سومكەسىنەن پوليسيا قىزمەتكەرلەرى سالماعى 3 كگ 200 گر. بولاتىن التىن قۇيمالارىن تاپتى. ونىڭ قۇنى شامامەن 84 ملن تەڭگەدەن اسادى.
تەرگەۋ سوتىنىڭ سانكسياسىمەن قازاقستاندىق كۇدىكتىنىڭ تۇرعىلىقتى جەرى بويىنشا الماتىداعى كوتتەدجدەردىڭ بىرىندە ءتىنتۋ جۇرگىزىلدى. وندا قۇيمالارداعى التىن مەن مەتالدىڭ مولشەرىن انىقتايتىن ەلەكتروندىق تارازى مەن ارنايى قۇرىلعىلار تاركىلەندى. قازىرگى ۋاقىتتا كۇدىكتىلەردى ۋاقىتشا ۇستاۋ يزولياتورىنا قاماۋ تۋرالى ماسەلە شەشىلۋدە. تەرگەۋ قىمبات مەتالدىڭ شىعۋ كوزىن جانە قىلمىستىق توپتىڭ باسقا دا سىبايلاستارىن انىقتاۋدا.