كونە جادىگەر مەشىتكە تاپسىرىلادى
قارقارالىداعى قۇنانباي قاجى مەشىتىنىڭ العاشقى ايشىعى تابىلدى، دەپ حابارلايدى Almaty-akshamy.kz
1930 جىلدارى قىزىل ۇكىمەتتىڭ جەندەتتەرى مەشىتتى قيراتۋ كەرەك دەگەن بۇيرىق شىعارىپ، يماش ەسىمدى كىسى ايشىعىن مىلتىقپەن اتىپ تۇسىرگەن ەكەن. ءبىراق ول سول جەردە ءجانتاسىلىم ەتكەن دەيدى. بۇل سۇمدىققا كۋا بولعان جۇرت جان-جاققا قاشا جونەلگەندە، ءسادۋاقاس ءشارىپقاجى ۇلى جەرگە قۇلاعان ايشىقتى الىپ ۇلگىرەدى. سودان بەرى ءسادۋاقاس مولدا بۇل جادىگەردى كوزىنىڭ قاراشىعىنداي ساقتاپ، ءومىرىنىڭ سوڭىنا دەيىن جاستىعىنىڭ استىندا جاسىرىپ كەلگەن.
بەلگىلى ولكەتانۋشى ەرلان مۇستافين كونە جادىگەردى - ءدال سول ايشىقتى سوڭعى رەت العان اقساقالدىڭ ۇيىنەن تاپقان. ول كەزدە قاريا قايتىس بولىپ، بالالارى كەرەك قىلماپتى. ايشىق قىتايعا جونەلتكەلى جاتقان تەمىر-تەرسەكتىڭ اراسىندا جاتىپتى. جالپى، تاريحي دەرەكتەرگە سۇيەنسەك، بۇل مەشىت وتكەن عاسىردىڭ ورتاسىندا جاتاقحانا، پيونەرلەر ءۇيى، قويما بولعان. ءتىپتى، 80ء-شى جىلدارى اتقوراعا اينالا جازداپتى. كەيىن تاۋەلسىزدىك العان جىلدارى قايتا تۇلەدى.
«قارقارالى ۋەزىندە اعا سۇلتان بولىپ باسقارىپ تۇرعان كەزىندە، قۇنانباي 12 بولىستىڭ باسىن قوسىپ وسى مەشىتتى سالعىزىپتى. بۇل ەندى ول كىسىنىڭ ءوز زامانىندا ءجاي عانا شىنجىر بالاق، شۇبار ءتوس، الپاۋىت باي بولىپ قانا قويماي، حالىقتىڭ رۋحاني الەمىنە دە قاتتى كوڭىل بولگەندىگىن بايقاتادى دەپ ايتار ەدىك. قۇنانبايدىڭ قولىندا بولعان قۇندى جادىگەر تاريحي بۇيىم بولىپ ەسەپتەلىپ وتىر. بۇگىن سونى قولىمىزعا ۇستاپ كورىپ، ءتاۋ ەتىپ تۇرعان جايىمىز بار»، - دەيدى قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت.
كونە جادىگەر ازىرگە ولكەتانۋشى ەرلان ءمۇستافيننىڭ قولىندا. كەلەشەكتە ول ايشىقتى مەشىتكە تاپسىرۋدى كوزدەپ وتىر.