قازاقستان مۇسىلماندارى ءدىني باسقارماسىنىڭ عۇلامالار كەڭەسى لۋدومانياعا قاتىستى ءپاتۋا شىعاردى، دەپ حابارلايدى almaty-akshamy.kz
لۋدومانيا ويىنقۇمارلىق دەگەن ماعىنانى بىلدىرەدى. لۋدومانيا (گەمبلينگ، يگرومانيا) تەرمينى قۇمار ويىنعا تاۋەلدىلىك دەگەن ماعىنا بەرەدى. شاريعاتتا كەز كەلگەن ويىنعا قۇمار ارالاسسا حارام، ۇلكەن كۇنا سانالادى («ءال-ماۋسۋاتۋ ءال-فيقھيا»: 39/407).
1. قۇمار ويىنعا تاۋەلدىلىك وتباسىنىڭ شىرقىن بۇزىپ، ەلدىڭ بەرەكەتىن كەتىرەدى، قوعامدى قۇلدىراتادى؛
2. ادامنىڭ ۋاقىتىن، مال-دۇنيەسىن زايا كەتىرىپ، قارىزعا باتىرادى؛
3. ەكونوميكاعا كەرى اسەرىن بەرەدى، ادامنىڭ ءومىرىن تەك يلليۋزيامەن شەكتەيدى؛
4. بويىن جالقاۋلىققا، ماسىلدىققا، جاۋاپسىزدىققا ۇيرەتىپ، اقشا ءۇشىن ارىن، نامىسىن ساتاتىن تومەن دارەجەگە تۇسىرەدى؛
5. جەكە تۇلعانىڭ جۇيكەسىن توزدىرىپ، ءتىپتى وزىنە قول جۇمساۋعا (سۋيسيدكە) دەيىن الىپ بارادى؛
6. قۇمار ويىننان ۇتىلعان ادامنىڭ ءوزىنىڭ سەرىكتەرىنە دەگەن كورەالماۋشىلىعى، كەكشىلدىگى ارتادى. وسىلايشا ارالارىندا دۇشپاندىق پايدا بولىپ، ءبىرىن-بىرى ولتىرۋگە دەيىن بارادى. قۇمار ويىنى ارقىلى تاپقان اقشا بىرەۋدىڭ اقىسىن جەۋ بولىپ سانالادى جانە ادال بولمايدى.
ەگەر ويىنعا قۇمار ارالاسپاعاننىڭ وزىندە وعان اۋەستىگى قۇلشىلىعىنا كەدەرگى بولسا، ۋاقىتىن زايا كەتىرسە، پسيحيكاسى مەن بولمىسىنا زيان كەلتىرسە، ومىرلىك قاجەتتىلىكتەرىنە توسقاۋىل بولسا، سونداي-اق بالاعات سوزدەر ايتىپ، ۇرىس-توبەلەسكە الىپ بارسا، مۇنداي ويىنعا شاريعاتىمىزدا تىيىم سالىنادى.
1. لۋدومانيا (گەمبلينگ، يگرومانيا) – حارام.
2. قۇلشىلىققا، وتباسىلىق جانە باسقا دا قوعامدىق مىندەتتەرىنە كەدەرگى كەلتىرەتىن ويىن قۇمارلىققا تىيىم سالىنادى.