Forbes قازاقستان ەلدىڭ ەڭ ىقپالدى 50 بيزنەسمەنىنىڭ جىل سايىنعى رەيتينگىن جاريالادى.
رەيتينگ اۆتورلارى ءتىزىمنىڭ باسىندا العاش رەت وسى ۋاقىت ىشىندە بىر-بىرىمەن ءبىرىنشى ورىندى ءبولىسىپ كەلگەن تيمۋر قۇلىبايەۆ پەن بولات وتەمۇراتوۆتىڭ ءتىزىم باسىنان كەتكەنىن اتاپ وتكەن، دەپ حابارلايدى Almaty-akshamy.kz Ulysmedia.kz-كە سىلتەمە جاساپ.
«ءبىرىنشى رەيتينگتەن باستاپ ونداعى ەڭ جوعارعى ورىندى كەزەكپەن تيمۋر قۇلىبايەۆ نەمەسە بولات وتەمۇراتوۆ يەلەنىپ كەلدى. مىنە، ون ءۇشىنشى رەتكە كەلگەندە كوشباسشىنىڭ سارى جەيدەسى باسقا بىرەۋگە ءوتتى. بيىل ءتىزىمدى Kaspi.kz نەگىزىن قالاۋشى جانە ءۇش ءىرى اكسيونەردىڭ ءبىرى، 54 جاستاعى ۆياچەسلاۆ كيم باستادى. ون ءۇش جىل بۇرىن ول 15ء-شى ورىندا بولاتىن»، - دەلىنگەن باسىلىمدا.
سونداي-اق، ۇزدىك 50-لىك التى جاڭا ەسىممەن تولىققانى انىقتالدى. ولاردىڭ قاتارىندا Kusto Group بويىنشا ەركىن تاتىشيەۆتىڭ سەرىكتەسى، YPO Kazakhstan-نىڭ جاڭا ءتوراعاسى بولىپ سايلانعان جانە «بايگە» ۇلتتىق فەدەراسياسىن باسقارعان 47 جاستاعى قانات كوپبايەۆ بار.
سونداي-اق، تىزىمنەن بەلگىلى كاسىپكەر راشيت سارسەنوۆتىڭ 38 جاستاعى ۇلى – ەلدار سارسەنوۆ تە كورىندى، وعان بۇرىن اكەسىنە تيەسىلى نۇربانك پەن «ۆيكتوريا»ساقتاندىرۋ كومپانياسىنداعى ماجوريتارلىق ۇلەستەر اۋىستى.
Respublica پارلامەنتتىك پارتياسىنىڭ 39 جاستاعى ءتوراعاسى جانە VIII شاقىرىلىمداعى پارلامەنت ءماجىلىسىنىڭ دەپۋتاتى ايداربەك قوجانازاروۆ العاش رەت رەيتينگتەن كورىندى.
قالتالىلار تىزىمىندە قۇلىبايەۆتاردىڭ ىسكەر سەرىكتەسى جانە ولاردىڭ بيزنەس-يمپەرياسىنداعى كوپتەگەن ءىرى قۇرىلىمداردىڭ باسشىسى 61 جاستاعى راۋشان ساعدييەۆا دا بار.
«العاشقى 50-لىككە قايتىپ كەلگەندەر اراسىندا ىقپالدى بيزنەسمەندەردىڭ ءبىرى عالىمجان ەسەنوۆتىڭ كەيسى ەرەكشە قىزىق بولىپ وتىر، ول ونىڭ اتف بانكى مەن Jusan بانكى اكسيالارىن ايىرباستاعاننان كەيىن تىزىمنەن شىعىپ قالعان بولاتىن»، - دەلىنگەن باسىلىمدا.
ۇزدىك وندىققا بولات وتەمۇراتوۆ، تيمۋر قۇلىبايەۆ، ۆلاديمير كيم، تيمۋر تۋرلوۆ، الەكساندر ماشكيەۆيچ، نۇرلان سماعۇلوۆ، ايدىن راحىمبايەۆ، الەكساندر بەلوۆيچ، ەدۋارد وگاي كىردى.
رەيتينگ- Forbes Kazakhstan جۋرناليستىك باسىلىمىنىڭ جاساعان باعا بەرۋى جانە ونى قۇجات نەمەسە رەسمي اقپارات رەتىندە پايدالانۋعا بولمايدى.
ۆياچەسلاۆ كيم — Kaspi Bank يەلەرىنىڭ ءبىرى، الەمدىك رەيتينگتە 1513-تەن 787-ورىنعا كوتەرىلدى. ونىڭ كىرىسى ءبىر جىل ىشىندە ەكى ەسەگە جۋىق ءوستى. ەگەر وتكەن جىلى كيمنىڭ تابىسى 2 ميلليارد دوللاردى قۇراسا، بيىلعى جىلى ول 3،6 ميلليارد دوللارعا جەتتى.