بەيتانىس جان قاريانى قايىر تىلەۋگە ماجبۇرلەگەن
«قۇلدىقتا ۇستاپ، قايىر تىلەپ اقشا تابۋعا ماجبۇرلەدى». 10 جىلدان استام ۋاقىت باقىر سۇراپ، بەيتانىس ادامداردىڭ قىسپاعىنان كۇنى كەشە بوساپ شىققان 66 جاستاعى ايەل بار سۇمدىقتى جايىپ سالدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
تاعدىردىڭ قاتال سىنىنا ۇشىراعان كەيۋانانىڭ كورمەگەنى جوق. ونىڭ ايتۋىنشا، جازدىڭ ىستىعى، قىستىڭ سۋىعىنا قاراماستان، دالاعا تاستاپ، كۇندە «سالىق» سالىپ وتىرعان. جوسپاردى ورىنداماعان كۇنى وڭباي تاياق جەپ، ميىنا دا زاقىم كەلگەن كورىنەدى.
بەينەجازبا الماتىداعى بازاردىڭ بىرىندە كوپىردە تۇسىرىلگەن. ءبىر قاراعاندا قايىر سۇراپ وتىر دەرسىڭ، ءبىراق كومەك سۇراعان قارتقا كەرەگى اقشا ەمەس. توسىندەگى قاعازعا جازىلعان ءنومىردىڭ، وعان ءتىپتى قاتىسى دا جوق. بوستاندىقتى اڭساعان ايەلدىڭ ايتۋىنشا، ونى وسى ۋاقىتقا دەيىن بەيتانىس ادامدار قۇلدىقتا ۇستاپ، قورلىق كورسەتىپ كەلگەن. كۇندە قايىر تىلەۋگە شىعارىپ، ايتقان سومانى جيناماعان كەزدە كۇش تە قولدانعان كورىنەدى.
– بارلىعىن تارتىپ الاتىن. كۇنى بويى جيناعان اقشادان دىم تاتىرمايتىن. تاڭەرتەڭ بازار جاقتاعى كوپىرگە قالدىرىپ، كەشكە الىپ كەتىپ ءجۇردى. ولار قالاعان سومانى جيناي الماساڭ، يت قورلىق كورسەتەتىن. وڭباي ۇرىپ، سۇلاتىپ تۇسىرەدى. سودان بولار، ەسىمدى ءجوندى بىلمەيمىن. قۇلدىقتا مەنەن دە باسقا ادامدار بولدى. ولاردى قالانىڭ باسقا جاعىنا تاستايدى، – دەدى جابىرلەنۋشى
66 جاستاعى ايەل ءقازىر وڭالتۋ ورتالىعىندا ەم الىپ جاتىر. ونى بەيتانىس ادامداردىڭ قىسپاعىنان ەرىكتىلەر قۇتقارىپ العان. «قۇلدىقتان بوساپ شىققان» قاريانىڭ جاناشىر تۋىسى نە ىزدەيتىن جاقىنى جوق. قۇجاتتان دا جۇرداي. «ارام پيعىلدىلار دا وسى قاۋقارسىزدىعىن ءبىلىپ، جوسپارىن ىسكە اسىردى» دەيدى كومەك بەرگەندەر.
– ءبىر كىسى كەلدى. بەتىن تۇمشالاپ العان، باسىندا ورامال. ول كەلدى دە، «اپانى بەرمەيمىن. ول بىزدىكى» دەدى. «ءسىز كىمسىز؟» دەپ سۇراسام، اپانىڭ توسىندەگى تەلەفون ءنومىردى جۇلىپ الدى. سوسىن ول كامەراعا تۇسپەيتىنىن ايتتى. اپانى بەرمەۋگە تىرىستى. ءبىز قارسىلاسىپ، الىپ كەتتىك، – دەدى «ءادىل» قايىرىمدىلىق قورىنىڭ ديرەكتورى وكسانا مارالوۆا.
قايىرىمدىلىق قورىنىڭ ديرەكتورى بۇعان دەيىن قۇزىرلى ورگاندارعا شاعىمدانعانىن، الايدا ولار ارىزدى قابىلداماعانىن ايتتى. سوندىقتان ءتۇسىرىلىم كەزىندە پوليسيانى شاقىرعان.
– ارىزىن قابىلدايمىز. تولىققاندى تەكسەرۋ جۇرگىزىپ، دەنە جاراقاتىنا قاتىستى ءتيىستى ساراپتاما تاعايىندالىپ، جاڭاعى كورسەتىلگەن ءنومىر ارقىلى بانكتەرگە سۇرانىستار جىبەرۋ ارقىلى، ونىڭ كىمگە تيەسىلى جانە قانشا قاراجات ءتۇسىپ وتىرعانىن بىلەمىز. تەرگەۋ ارەكەتى تولىق اياقتالعان كەزدە، مالىمدەمە بەرەتىن بولامىز، – دەدى ناۋرىزباي اۋداندىق پوليسيا باسقارماسىنىڭ تەرگەۋشىسى مۇحامەدالى ابدينابي.
الاقان جايىپ، قايىر تىلەگەندەردى بازار ماڭىنداعى كوپىردەن عانا ەمەس، قالانىڭ باسقا جەرىنەن دە كەزدەستىرۋگە بولادى. الايدا ولاردىڭ راسىندا قانداي كومەككە مۇقتاج ەكەنىن ەكىنىڭ ءبىرى سۇراپ ءبىلىپ جاتقان جوق.
ايتا كەتەتىنى، بۇگىنگى قوعامدا وزگەنىڭ باسىنا تۇسكەن قايعىنى ءوزىنىڭ كاسىپ كوزىنە اينالدىرعاندار دا بار.