تۋريستەردىڭ بىرىنە قۇتقارۋشى-مەدبيكە العاشقى مەديسينالىق كومەك كورسەتتى
الماتى تاۋلارىندا ءۇش تۋريست قۇتقارىلىپ، مەديسينالىق كومەك كورسەتىلدى، دەپ حابارلايدى Almaty-akshamy.kz توتەنشە جاعدايلار مينيسترلىگىنە سىلتەمە جاساپ.
28 مامىر كۇنى ساعات 19:49-دا تجم رەسپۋبليكالىق جەدەل-قۇتقارۋ جاساعىنىڭ كەزەكشى-ديسپەچەرلىك بولىمىنە الماتى قالاسى تجد-نان «تري براتا» شىڭى اۋدانىندا ءۇش ەر ادامنىڭ جاڭبىردىڭ استىندا قالىپ قويعانى تۋرالى حابارلاما تۇسەدى. ولاردىڭ ءبىرى ءوزىن ناشار سەزىنە باستاعانى ايتىلادى. جاساقتىڭ 8 ادامنان تۇراتىن قۇتقارۋ توبى جەدەل تۇردە ىزدەۋگە شىعىپ، ساعات 22:58-دە «كوك-جايلاۋ» اۋدانىنان ەكى ءتۋريستى تابادى. ءۇشىنشى ساياحاتشى تاۋدان ءوز بەتىنشە تۇسكەن.
اتاپ ايتقاندا، 1982، 1986، 1998 جىلدارى تۋعان ءۇش ەر ادام قۇتقارىلدى. تۋريستەردىڭ بىرىنە قۇتقارۋشى-مەدبيكە العاشقى مەديسينالىق كومەك كورسەتتى، ول سۋىقتاپ قالعان جانە اياعىن جارالاپ العان.
وسى ورايدا، تجم قۇتقارۋشىلارى تاۋعا شىعۋ ەرەجەلەرىن ەسكە سالادى. «تاۋعا جالعىز بارماڭىز، بۇل – ءقاۋىپتى. جاياۋ سەرۋەندەۋدىڭ نەگىزگى بولىگىن تاڭەرتەڭ جاساڭىز. تۋريسكە قاجەتتى زاتتاردىڭ ىشىندە مىندەتتى تۇردە: سۋ، قوسالقى كيىم جيىنتىعى، قۋاتتالعان قوسىمشا قۋات كوزى، سۋ وتكىزبەيتىن پاكەتتەگى سىرىڭكە جانە العاشقى كومەك جيناعى بولۋى كەرەك».