ەندى جەڭىلدىگى بار ازاماتتار ساناتتارىنا قۇجاتتاۋ تەرمينالى ارقىلى ءتولقۇجات پەن جەكە كۋالىكتى الۋعا ءوتىنىش بەرۋ تەگىن بولادى. بۇل جوبا مەملەكەتتىك كورپوراسيا مەن ق ر ىشكى ىستەر مينيسترلىگىنىڭ بىرلەسۋىنىڭ ناتيجەسىندە ىسكە اسىرىلدى، دەپ حابارلايدى Almaty-akshamy.kz.
بۇرىن ولار قۇجاتتار الۋ ءۇشىن تەك حقكو وپەراتورى ارقىلى ءوتىنىش بەرىپ، مەملەكەتتىك باج سالىعىن تولەمەيتىن.
ازاماتتار قۇجاتتاۋ تەرمينالى ارقىلى ءتولقۇجات پەن جەكە كۋالىككە ءوتىنىش بەرە الادى. سونداي-اق، تەرمينال ارقىلى قىزمەت الۋشىلار ءوزىنىڭ ءساتتى تۇسكەن سۋرەتىن تاڭداۋ مۇمكىندىگى بار. ودان كەيىن جۇيەدە مەملەكەتتىك باجدى QR كودى بويىنشا تولەۋگە بولادى. جەڭىلدىگى بار ازاماتتار ساناتىنا اقى تولەۋ ءۇشىن QR كودى كورسەتىلمەيدى.
مەملەكەتتىك باجدى تولەۋدەن بوساتىلعان ازاماتتار تىزىمىنە كەلەسى ساناتتار كىرەدى:
- كەڭەس وداعىنىڭ باتىرلارىنا، سوسياليستىك ەڭبەك ەرلەرى؛
- ءۇش دارەجەلى داڭق جانە ءۇش دارەجەلى ەڭبەك داڭقى، «التىن قىران»، «وتان» وردەندەرىمەن ناگرادتالعان، «حالىق قاھارمانى»، «قازاقستاننىڭ ەڭبەك ەرى» اتاقتارىنا يە بولعان ادامدار؛
- «باتىر انا» اتاعىن العان، «التىن القا»، «كۇمىس القا» القالارىمەن ناگرادتالعان كوپ بالالى انالار؛
- ۇوس ارداگەرلەرى جانە ولارعا تەڭەستىرىلگەن تۇلعالار؛
- مۇگەدەكتىگى بار ادامدار، سونداي-اق، مۇگەدەكتىگى بار بالانىڭ اتا-اناسىنىڭ بىرىنە؛
- قارتتار مەن مۇگەدەكتىگى بار ادامدارعا ارنالعان جالپى ۇلگىدەگى مەديسينالىق-الەۋمەتتىك مەكەمەلەردە تۇراتىن قارتتار، جەتىم بالالار جانە اتا-اناسىنىڭ قامقورلىعىنسىز قالعان، تولىق مەملەكەتتىك قامتاماسىز ەتۋدەگى، بالالار ۇيلەرىندە جانە (نەمەسە) ينتەرناتتاردا تۇراتىن بالالار؛
- چەرنوبىل اپاتىنىڭ سالدارىنان زارداپ شەككەن ازاماتتار.
ايتا كەتەيىك، 2023 جىلى ءتولقۇجات الۋ ءۇشىن مەملەكەتتىك باجدىڭ قۇنى 27 600 تەڭگەنى، جەكە كۋالىك ءۇشىن – 690 تەڭگەنى قۇرايدى.
ەستەرىڭىزگە سالا كەتەيىك، قۇجاتتاۋ تەرمينالدارى استاناداعى كەرەي جانىبەك حاندار كوشەسى، 4 مەكەنجايىنداعى حقكو-دا جانە الماتىداعى ماركوۆ كوشەسى، 44 مەكەنجايىنداعى حقكو-دا ورنالاسقان. بۇگىنگى تاڭدا قۇجاتتاۋ تەرمينالدارى ارقىلى 5000-عا جۋىق ءوتىنىش قابىلدانعان.