كوللەكسيالىق مونەتالار قازاقستان تەڭگە سارايىندا دايىندالدى.
2023 جىلعى 6 جەلتوقساندا قازاقستان ۇلتتىق بانكى "بانكنوتالارداعى پورترەتتەر" سەرياسىنان ءال-فارابي، قۇرمانعازى جانە ءسۇيىنباي كوللەكسيالىق مونەتالارىن اينالىمعا شىعارادى، دەپ حابارلايدى Almaty-akshamy.kz
ۇلتتىق بانك "بانكنوتتارداعى پورترەتتەر" سەرياسىنداعى كوللەكسيالىق مونەتالار تۋرالى مالىمەت بەردى:
"جاڭا مونەتالار 1993 جىلعى ۇلگىدەگى قازاقستان رەسپۋبليكاسىنىڭ ۇلتتىق ۆاليۋتاسى بانكنوتالارىنىڭ ءبىرىنشى سەرياسىنىڭ پورترەتتىك بەينەلەرىنە ارنالعان. وندا كورنەكتى تاريحي تۇلعالار – عالىم ءال-فارابي، ايتىسكەر اقىن ءسۇيىنباي ارون ۇلى، كۇيشى قۇرمانعازى، عالىم ءارى ەتنوگراف شوقان ءۋاليحانوۆ، اقىن ءارى فيلوسوف اباي، سونداي-اق قازاق حاندارى ءابىلقايىر مەن ابىلاي بەينەلەنگەن".
2011-2013 جىلدارى ءال-فارابي، قۇرمانعازى جانە ءسۇيىنباي كوللەكسيالىق التىن مونەتالارى اينالىمعا شىقتى.
"كوللەكسيونەرلەر مەن حالىق تاراپىنان بولعان سۇرانىستى ەسكەرە وتىرىپ، سەريا كۇمىس جانە نەيزيلبەر قوسپاسىنان جاسالعان مونەتالارمەن تولىقتىرىلىپ وتىر"، دەپ مالىمدەدى ق ر ۇلتتىق بانكى.
مونەتالار:
ءارقايسىسى 925/1000 سىنامدى كۇمىستەن، سالماعى 31،1 گرامم، ديامەترى 38،61 مم، proof دايىنداۋ ساپاسىمەن، نومينالى 500 تەڭگەلىك، تارالىمى 2 000 (ەكى مىڭ) دانادا جاسالدى؛
ءارقايسىسى منس 15-20 نەيزيلبەر قوسپاسىنان، ماسساسى 11،17 گرامم، ديامەترى 31 مم، uncirculated دايىنداۋ ساپاسىمەن، نومينالى 200 تەڭگەلىك، تارالىمى 50 000 (ەلۋ مىڭ) دانادا جاسالدى.
"كوللەكسيالىق مونەتالار قازاقستان رەسپۋبليكاسىنىڭ بۇكىل اۋماعىندا وزدەرىنىڭ بەلگىلەنگەن قۇنىمەن تولەمنىڭ بارلىق تۇرلەرى بويىنشا قابىلدانۋعا، سونداي-اق ەلدىڭ بارلىق بانكىندە بانك شوتتارىنا ەسەپكە الىنۋعا جانە اۋدارۋعا، ۇساقتالۋعا جانە ايىرباستالۋعا مىندەتتى"، دەلىنگەن ق ر ۇلتتىق بانكىنىڭ اقپاراتىندا.