500-دەن استام ادام جولاۋشىلار پويىزىمەن تاراز، شىمكەنت ستانسالارىنا جەتكىزىلدى.
بۇكىل ەل اۋماعىندا قالىڭ قار جاۋىپ، بوران سوعىپ، كۇن رايىنىڭ كۇرت بۇزىلۋىنا بايلانىستى ءبىرقاتار جولدار جابىلدى. وسىنداي جاعدايدا «قازاقستان تەمىر جولى» قار باسقان اۆتوجولداردان ەۆاكۋاسيالانعان ادامداردى پويىزبەن اكەتىپ جاتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.
وتكەن تاۋلىكتە جۇكتەمەسى از بوراندى، شوقپاق، قۇركۇرەۋسۋ، تۇلكىباس ستانسالارىنان 500-دەن استام ادام جولاۋشىلار پويىزىمەن تاراز، شىمكەنت ستانسالارىنا جەتكىزىلدى.
سونداي-اق كەرى باعىتتا 270-كە جۋىق ادام تاسىمالداندى.
قازىرگى ۋاقىتتا ۇلتتىق تاسىمالداۋشى اۆتوجولداردىڭ جابىلۋىنا بايلانىستى جولاۋشىلاردى تەمىرجول كولىگىمەن اكەتۋ جۇمىسىن جالعاستىرىپ جاتىر.
سوڭعى كۇندەردىڭ كۇردەلى مەتەورولوگيالىق جاعدايلارىنا قاراماستان، «قتج» ۇك» اق بارلىق قۇرىلىمدىق بولىمشەلەرى جۇكتەر مەن جولاۋشىلاردى ۇزدىكسىز جانە ءقاۋىپسىز تاسىمالداۋدى قامتاماسىز ەتۋ بويىنشا شارالار قابىلداۋدا.
تەمىرجولشىلاردىڭ جۇمىسىن جامبىل وبلىسىنداعى ەلەكتر جەلىسىنىڭ باعانالارىن قۇلاتقان قاتتى جەل قيىنداتىپ وتىر.
ەلەكتر جەلىلەرىنىڭ ءۇزىلۋى سالدارىنان قاراتاۋ – جاڭاتاس ۋچاسكەسىندە پويىزداردىڭ قوزعالىسى تەلەفون بايلانىسى ارقىلى ۇيىمداستىرىلدى.
سونداي-اق، قتج الماتى-2 ستانساسىنان جارىق پەن جىلۋسىز قالعان جاڭاتاس قالاسىنا ديزەل-گەنەراتورلىق قۇرىلعىسى بار ەكى ۆاگون جونەلتتى.