قتج اۋا رايىنىڭ قولايسىزدىعىنا قاراماستان، شتاتتىق رەجيمدە جۇمىس ىستەپ جاتىر

تاۋلىك بويى تەمىرجولداردى قاردان تازارتۋ جۇمىستارى جۇرگىزىلۋدە.

قتج-نىڭ بارلىق قۇرىلىمدىق بولىمشەلەرى قاردىڭ، بوراننىڭ جانە قاتتى جەلدىڭ ورىن الۋى جاعدايلارىندا جۇك پەن جولاۋشىلاردى ءقاۋىپسىز تاسىمالداۋدى قامتاماسىز ەتەدى، دەپ حابارلايدى Almaty-akshamy.kz Elorda.info-عا سىلتەمە جاساپ.

اۋا رايىنىڭ قولايسىزدىعىنا بايلانىستى «جولاۋشىلار تاسىمالى» اق قار قۇرساۋىندا قالعان ادامداردى شىعارۋدى ۇيىمداستىردى. 

ەرەيمەنتاۋ ستانسياسىنان ايەلدەر مەن ەگدە جاستاعى 40-تان استام جولاۋشى استاناعا پويىزبەن جەتكىزىلدى. سونداي-اق، ەلوردادان سەمەي، شىمكەنت، تۇركىستان جانە پەتروپاۆل باعىتىندا جۇرەتىن پويىزدارعا قوسىمشا ۆاگونداردى تىركەۋ بويىنشا جەدەل شارالار قابىلداندى.

«پويىزداردىڭ ءوتۋىن قامتاماسىز ەتۋ ءۇشىن تاۋلىك بويى تەمىرجولداردى قاردان تازارتۋ جۇمىستارى جۇرگىزىلۋدە. قارمەن كۇرەسكە باعىتتالعان ينفراقۇرىلىمنىڭ بارلىق رەسۋرستارى جۇمىلدىرىلدى. ماگيسترالدىق جەلىنىڭ كوكشەتاۋ، قوستاناي، پاۆلودار، قاراعاندى جانە اقتوبە بولىمشەلەرى اۋماقتارىندا تەمىرجول توسەمىن قاردان تازارتۋ بويىنشا ۇزدىكسىز جۇمىستار جۇرگىزىلۋدە. وتكەن تاۋلىكتە ارنايى قار تازالاۋ تەحنيكاسىنىڭ كومەگىمەن 430 شاقىرىمنان استام تەمىرجول توسەمى تازارتىلدى»، - دەلىنگەن حابارلامادا.