بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى بارىسىندا ق ر دسم ۇلتتىق جەدەل مەديسينانى ۇيلەستىرۋ ورتالىعى باسقارما ءتوراعاسىنىڭ ورىنباسارى عۇمىربەك اعىبايەۆ ايتىپ بەردى، دەپ حابارلايدى اlmaty-akshamy.kz.
ول قازاقستاندا جەدەل مەديسينالىق جاردەم قىزمەتى ۇزدىك حالىقارالىق تاجىريبەگە سايكەس جاڭعىرتىلعانىن ەسكە سالدى.
ءوز سوزىندە عۇمىربەك اعىبايەۆ بۇگىنگى تاڭدا رەسپۋبليكادا جەدەل مەديسينالىق كومەك قىزمەتى 18 دەربەس ستانسيا، 130 قالالىق قوسالقى ستانسيا جانە 284 اۋداندىق بولىمشەلەردەن تۇراتىنىن حابارلادى.
وبلىستىق جانە قالالىق جمك ستانسيالارىندا ءبىر اۋىسىمدا 1486 كوشپەلى جەدەل جاردەم بريگاداسى جۇمىس ىستەيدى، ونىڭ ىشىندە 290 – مامانداندىرىلعان (دارىگەرلىك)، 1196 – فەلدشەرلىك. قالالىق بولىمشەلەردە 911 بريگادا، اۋداندىق بولىمشەلەردە 576 بريگادا جۇمىس ىستەيدى.
جىل سايىن ق ر جەدەل مەديسينالىق جاردەم قىزمەتى ءبىزدىڭ ەلىمىزدە جۇرگەن قازاقستاندىقتارعا دا، شەتەل ازاماتتارىنا دا شۇعىل مەديسينالىق كومەك كورسەتە وتىرىپ، 7 ميلليوننان 8 ميلليونعا دەيىن قوڭىراۋ شالادى.
«جەدەل مەديسينالىق كومەك جۇمىسىنىڭ ينتەگرالدىق كورسەتكىشى شاقىرۋعا دەر كەزىندە كەلۋ بولىپ تابىلادى. اعىمداعى جىلدىڭ 11 ايىندا كەشىگىپ ورىندالعان شاقىرۋلاردىڭ ۇلەسى 4،3%-دى قۇرادى»، - دەدى ع. اعىبايەۆ.
"جەدەل جاردەم" ستانسيالارى، بەكىتىلگەن ستاندارتتارعا سايكەس، مەديسينالىق جابدىقتارمەن جانە مەديسينالىق ماقساتتاعى بۇيىمدارمەن جابدىقتالعان، رەسپۋبليكا بويىنشا جاراقتاندىرىلۋى – 97%. بۇگىنگى كۇنى جمك بالانسىندا 2 287 بىرلىك سانيتارلىق اۆتوكولىك بار، ونىڭ ىشىندە 1 410 بىرلىك قالادا جانە 877 بىرلىك اۋىلدا.
بيىل 336 سانيتارلىق كولىك ساتىپ الىندى. بارلىق "جەدەل جاردەم" كولىكتەرىنىڭ GPS-ناۆيگاسياسىمەن جابدىقتالۋى 100%-دى قۇرايدى.
عۇمىربەك اعىبايەۆ 2021 جىلدىڭ 11 ايىندا رەسپۋبليكا بويىنشا جەدەل مەديسينالىق كومەككە شاقىرۋلار سانى 7 603 040 بولعانىن قوستى. 1 قاڭتار - 1 جەلتوقسان ارالىعىندا كوروناۆيرۋستىق ينفەكسيا بويىنشا 354 400 شاقىرۋعا قىزمەت كورسەتىلدى، ونىڭ ىشىندە 259 692 ادام اۋرۋحاناعا جاتقىزىلدى.
ۇلتتىق شۇعىل مەديسينانى ۇيلەستىرۋ ورتالىعى جۇمىسىنىڭ تاعى ءبىر باعىتى 2017 جىلدان بەرى تابىستى جۇمىس ىستەپ كەلە جاتقان وقۋ-ترەنينگ ورتالىعى بولىپ تابىلادى. وندا مەديسينالىق اۆياسيا، جەدەل جانە شۇعىل مەديسينالىق كومەكتىڭ قىزمەتكەرلەرى وقىتىلادى. بارلىق كەزەڭدە 21 مىڭعا جۋىق تىڭداۋشى دايىندالدى.