قازاقستان رەسپۋبليكاسى ءىىم الماتى اكادەمياسىنىڭ كۋرسانتتارى قازىرگى ۋاقىتتا كورەيا ەلىندە الەمنىڭ جەتەكشى جوعارى وقۋ ورىندارىنىڭ ءبىرى شينحان ۋنيۆەرسيتەتىنىڭ بازاسىندا ءبىلىم الىپ جاتىر.
ۆەدومستۆولىق ءبىلىم بەرۋ تاريحىندا العاش رەت 10 كۋرسانت اكادەميالىق ۇتقىرلىق باعدارلاماسى بويىنشا قىسقا مەرزىمدى وقىتۋدان وتەدى، دەپ حابارلايدى aqshamnews.kz Polisia.kz-كە سىلتەمە جاساپ.
تاعىلىمداما ىنتىماقتاستىق تۋرالى مەموراندۋم شەڭبەرىندە جۇزەگە اسىرىلادى جانە كيبەرقىلمىسقا قارسى تۇرۋعا باعىتتالعان.
– ىشكى ىستەر مينيسترلىگى حالىقارالىق بايلانىستاردى كەڭەيتۋ جانە ءىىم وقۋ ورىندارىنىڭ ءبىلىم الۋشىلارىن سىرتقى اكادەميالىق ۇتقىرلىق باعدارلاماسىن ىسكە اسىرۋ ءۇشىن سەرىكتەس جوعارى وقۋ ورىندارىنا جىبەرۋ تۋرالى تاپسىرما بەردى. وسىعان بايلانىستى ءبىز 4-13 قاراشا ارالىعىندا شينحان ۋنيۆەرسيتەتىنە 2-كۋرس كۋرسانتتارىن ىرىكتەپ، ولاردى قىسقا مەرزىمدى وقۋعا جىبەردىك، – دەدى قازاقستان رەسپۋبليكاسى ءىىم ماقان ەسبولاتوۆ اتىنداعى الماتى اكادەمياسى باستىعىنىڭ مىندەتىن ۋاقىتشا اتقارۋشى جانات ديلبارحانوۆا.
تاعىلىمداما باعدارلاماسى نەگىزگى جانە پراكتيكالىق وقىتۋدى، سونىڭ ىشىندە تاەكۆوندو ادىستەرىن وقىتۋدى، سونداي-اق كورەي ءتىلىن مەن مادەنيەتىن ۇيرەنۋدى قامتيدى. شەتەلدىك تاعىلىمداما اياسىندا ءىىم الماتى اكادەمياسىنىڭ كۋرسانتتارى سالتاناتتى اشىلۋ راسىمىنە قاتىستى، وعان شينحان ۋنيۆەرسيتەتىنىڭ حالىقارالىق قاتىناستار جونىندەگى پرورەكتورى لي دەسونگ جانە تمد ەلدەرىمەن ىنتىماقتاستىق ورتالىعىنىڭ ديرەكتورى يم حيەۆون قاتىستى. سونىمەن قاتار شەتەلدىك وڭ تاجىريبەنى زەردەلەۋ ماقساتىندا ينچحون قالاسى پوليسيا دەپارتامەنتىنىڭ بولىمشەلەرىنە كوشپەلى ساباقتار ۇيىمداستىرىلدى، وندا ولار “112” قىزمەتىنىڭ احۋالدىق ورتالىعىنىڭ جۇمىسىمەن تانىستى، كولىكتەگى پوليسيا باسقارماسىنا، كريميناليستيكالىق جانە كيبەرلابوراتورياعا باردى.
– وتاندىق جانە الەمدىك تاجىريبەنى زەردەلەۋ ىشكى ىستەر ورگاندارى ءۇشىن جوعارى بىلىكتى كادرلاردى دايارلاۋ ءۇشىن قاجەت. بۇل كيبەرقاۋىپتەرمەن كۇرەسۋ سالاسىنداعى ەڭ جاقسى تاجىريبەلەردى قابىلداۋعا جاقسى مۇمكىندىك. ءبىز بۇل جوبانى دامىتۋدى جالعاستىرۋعا نيەتتىمىز جانە قازىرگى ۋاقىتتا اكادەميانىڭ سىرتقى اكادەميالىق ۇتقىرلىق باعدارلاماسىن باسقا شەتەلدىك سەرىكتەس جوو-لارمەن ىسكە اسىرۋ بويىنشا ۇيىمداستىرۋشىلىق ماسەلەلەر شەشىلۋدە، – دەپ تولىقتىردى جانات ديلبارحانوۆا.