ق ر باس سانيتار دارىگەرىنىڭ ريەۆاكسيناسيا تۋرالى جاڭا قاۋلىسى شىقتى

قازاقستان اۋماعىندا 3 ايدان ارتىق تۇرىپ جاتقان، ۆاكسيناسيانىڭ تولىق كۋرسىن العان شەتەلدىكتەر دە ريەۆاكسيناسيادان ءوتۋى كەرەك.

ق ر باس سانيتار دارىگەرى ەرلان قياسوۆتىڭ ريەۆاكسيناسيا ماسەلەلەرىن ايقىندايتىن جاڭا قاۋلىسى شىقتى، دەپ حابارلايدى Almaty-akshamy.kz

جاڭا قاۋلى بويىنشا، قازاقستان اۋماعىندا 3 ايدان ارتىق تۇرىپ جاتقان، ۆاكسيناسيانىڭ تولىق كۋرسىن العان شەتەلدىكتەر دە ريەۆاكسيناسيادان ءوتۋى كەرەك. ولار دا العاشقى ۆاكسينانىڭ تولىق كومپونەنتىن العان كۇننەن 6 اي وتكەندە قايتا ۆاكسينالاۋعا جاتادى.

«قازاقستاننىڭ اۋماعىندا 3 جانە ودان دا كوپ اي تۇراتىن، كۆي-گە قارسى ۆاكسيناسيانىڭ باستاپقى كۋرسىن تولىق اياقتاپ العان شەتەل ازاماتتارىن قوسا العاندا، بارلىق ادامدار كۆي-گە قارسى ريەۆاكسيناسياعا جاتادى»، - دەپ جازىلعان قۇجاتتا.

سونداي-اق، بۇرىن كوروناۆيۋرسقا قارسى ۆاكسيناسيانىڭ باستاپقى كۋرسىن العان جۇكتى ايەلدەردى ريەۆاكسينالاۋ جۇكتىلىكتىڭ 16-37 اپتاسى كەزەڭىندە «كوميرناتي» (Pfizer، اقش) ۆاكسيناسىن پايدالانا وتىرىپ جۇرگىزىلەتىنى ايتىلعان.

«كۆي-گە قارسى ۆاكسيناسيانىڭ باستاپقى كۋرسىن تولىق العان كۆي-مەن اۋىرىپ جازىلعان ادامداردى كۆي-گە قارسى ريەۆاكسينالاۋ ساۋىققاننان كەيىن 6 ايدان كەيىن جۇرگىزىلەدى»، - دەپ جازىلعان باس سانيتار قاۋلىسىندا.