ەكىباستۇز قالاسىندا ايگىلى حالىق گەولوگى، كەن بىلگىرى قوسىم پىشەنبايەۆتىڭ 180 جىلدىعىنا ارنالعان «قوسىمنىڭ تاعدىرى» كىتابىنىڭ تۇساۋى كەسىلدى، دەپ حابارلايدى اlmaty-akshamy.kz.
پوۆەستىك كىتاپتىڭ اۆتورى – باياناۋىلدىق ولكەتانۋشى الەكساندر چەركاشين. كىتاپتىڭ قولجازباسى 1972 جىلى باياناۋىل كەنتىندە باسپا ماشينكاسىنا تۇسىرىلگەن.
بۇل كىتاپتىڭ جازىلۋىنا اكادەميك قانىش يمانتاي ۇلى ساتبايەۆ تۇرتكى بولعان. قولجازبا كۇيىندە قازكسر جازۋشىلار وداعىنىڭ كوركەمدىك كەڭەسىنە جىبەرىلىپ، بەلگىلى سەبەپتەرمەن كەيىن قايتارىلعان. پوۆەست اراعا جارتى عاسىردان استام ۋاقىت سالىپ وقىرمانعا العاش رەت جول تارتىپ وتىر.
تۋىندى پاۆلودار وبلىستىق بۇقار جىراۋ اتىنداعى ادەبيەت جانە ونەر مۋزەيىنىڭ ۇيىتقى بولۋىمەن قازاق جانە ورىس تىلدەرىندە جارىق كورىپ وتىر.
كىتاپ قوسىم پىشەنبايەۆتىڭ كەن بارلاۋشىلىق ءومىرىنىڭ ماڭىزدى كەزەڭدەرىن سۋرەتتەيدى. قوسىمنىڭ بالالىق شاعى، اتا-اناسىنىڭ باي اۋىلىنان كورگەن قورلىعى، العاشقى تابىلعان كەن ورىندارى مەن ورىس كوپەستەرىنىڭ قازاق جەرىندەگى ونەركاسىپتەرى تۋرالى، ەكىباستۇز كومىرى مەن مايقايىڭ التىن كەنىشىندەگى العاشقى ونەركاسىپتەر، باسقا دا دەرەكتى ماعلۇماتتار كەڭىنەن قامتىلعان. «كەدەيدىڭ قولى قىسقا»، «قوسىمنىڭ بالالىق شاعى»، «العاشقى ولجا»، «العاشقى ماحاببات»، «العاشقى اقشا»، «العاشقى ساۋدا»، «قارسىلاس پايدا بولدى»، «تاۋ بوكتەرىندەگى زاۋىت»، «قوسىم بايدان كەك الدى»، «قوسىم وندىرىستىك ارتەل ۇيىمداستىردى»، «كۇتپەگەن قوناق»، «ەكىباستۇز»، «مايقايىڭ»، «وتكەن كۇندەر مەن بۇگىنگى زاماننىڭ توعىسى» بولىمدەرىنەن تۇرادى.
پوۆەست تورايعىروۆ ۋنيۆەرسيتەتىنىڭ جانە باياناۋىلداعى «انەت» شارۋا قوجالىعىنىڭ دەمەۋشىلىگىمەن، قازاق جانە ورىس تىلدەرىندە «پاراسات» باسپاحاناسىندا باسىلىپ شىقتى.
تۇساۋكەسەر ءىس-شاراسىندا ق.پىشەنبايەۆتىڭ اتالاس تۋىسى امانتاي ەسىمبايەۆ پەن ولكەتانۋشى ا.چەركاشيننىڭ ۇرپاعى گالينا باوك ەستەلىكتەر ايتتى. ا.چەركاشين «باياناۋل»، «دوچ باياناۋلا»، «قوسىمنىڭ تاعدىرى» كىتاپتارىن جازعان، باياناۋىل ءوڭىرىنىڭ ارعى-بەرگى تاريحى تۋرالى مول ماعلۇماتتار قالدىرعان.
ءىس-شارادا سونداي-اق جۇسىپبەك ايماۋىتوۆتىڭ 135، ءسابيت دونەنتايەۆتىڭ 130، قانىش ساتبايەۆتىڭ 125، الكەي مارعۇلاننىڭ 120، شاكەن ايمانوۆتىڭ 110، رۇستەمبەك وماروۆتىڭ 105، مۇباراك جامانبالينوۆتىڭ 100، قيماديدەن نىعمانوۆتىڭ 100 جىلدىق مەرەيتويلارىنا ارنالعان كورمە ۇيىمداستىرىلدى.
