قوستاناي وبلىسىندا 74 سىنىپ ونلاين وقۋعا كوشتى، دەپ حابارلايدى aqshamnews.kz
قوستاناي اۋدانىنىڭ ءتورت مەكتەبىندە تۇماۋ مەن جرۆي-مەن اۋىراتىن وقۋشىلار سانىنىڭ ارتۋىنا بايلانىستى 74 سىنىپ قاشىقتان وقۋعا اۋىستىرىلدى.
"سىنىپتار بويىنشا اۋىرعان بالالاردىڭ جالپى ۇلەسى 30 پايىزدان استى. وسىعان بايلانىستى ولاردى كارانتينگە جىبەرۋ تۋرالى بۇيرىقتار شىعارىلدى. قالعان سىنىپتار ءداستۇرلى فورماتتا وقىپ جاتىر، ءبىراق پاندىك كابينەتتەرگە بارماي، ءبىر كابينەتتە عانا ءبىلىم الۋدا. الايدا، ەرتەڭگە دەيىن ونلاينعا كوشكەن سىنىپتار مەن مەكتەپتەر سانى ارتۋى مۇمكىن"، – دەدى قوستاناي اۋدانى ءبىلىم ءبولىمىنىڭ باسشىسى مىندەتىن اتقارۋشى ايگۇل حاسانوۆا.
الەۋمەتتىك جەلىلەردە قوستانايداعى اتا-انالار بالالار اراسىندا سىرقاتتانۋ كۇرت ارتقانىن ايتىپ، وقۋدى ونلاين فورماتقا كوشىرۋدى سۇراپ جاتىر. قالادا ناۋقاستار سانى ارتقان سايىن جەدەل جاردەم شاقىرۋلار دا كوبەيگەن – تۇرعىندار ادەتتەگىدەن ەكى ەسە ءجيى حابارلاسۋدا.
جۇكتەمەنى ازايتۋ ءۇشىن وبلىستىق جەدەل جاردەم ورتالىعىندا دارىگەرلەردىڭ جۇمىسى كۇشەيتىلدى. بۇرىن 18 جەدەل جاردەم بريگاداسى كەزەكشىلىك اتقارسا، ءقازىر ولاردىڭ سانى 20-عا جەتتى، الداعى ۋاقىتتا تاعى ەكى بريگادا قوسىلماق.
سوڭعى اپتادا قوستاناي وبلىسىندا ءجرۆي-دىڭ 5545 جاعدايى تىركەلگەن. بۇل – وتكەن اپتامەن سالىستىرعاندا 1،3 پايىزعا كوپ. اۋىرعانداردىڭ 55،1 پايىزى – 14 جاسقا دەيىنگى بالالار (3053 جاعداي). 1 جاسقا دەيىنگى بالالار اراسىندا – 54 جاعداي، جۇكتى ايەلدەر اراسىندا – 12 جاعداي تىركەلگەن.