الەۋمەتتىك جەلىلەر مەن مەسسەندجەرلەردە قوستانايدىڭ "قوناي" شاعىناۋدانىنداعى جاڭا سالىنعان، ءبىراق پايدالانۋعا بەرىلمەگەن پاتەردىڭ سۋرەتتەرى تاراپ كەتتى. وندا بولمەنىڭ قاق ورتاسىندا توبەدەن ەدەنگە دەيىن مۇز قاتىپ تۇر. قوستاناي اكىمدىگى وسى جاعدايدى ءتۇسىندىردى، دەپ حابارلايدى Almaty-akshamy.kz Inform.kz-كە سىلتەمە جاساپ.
"قوناي" شاعىناۋدانىنداعى 21 ورام № 2، 3 ۇيلەرىنىڭ قۇرىلىسىن «مارال قۇرىلىس» ج ش س مەردىگەر ۇيىمى سالىپ جاتىر. قازان ايىندا بۇل ۇيىممەن شارت بۇزىلدى، سەبەبى ولار ءوز مىندەتتەرىن ورىندامادى، مەملەكەتتىك ساتىپ الۋدا جاۋاپسىز قاتىسۋشى دەپ تانىلدى. جاسالعان شارتقا سايكەس، قۇرىلىستى اياقتاۋ ءۇشىن جاڭا مەردىگەر ۇيىمدى انىقتاۋ كەزەڭىندە ءۇيدى «نۇر ساقشى» كۇزەت فيرماسى كۇزەتىپ جاتىر. ءۇيدى تەكسەرۋ كەزىندە جىلۋ تەك جەرتولەدە قوسىلعانى انىقتالدى. جىلىتۋ جۇيەسىندەگى مايەۆسك كرانىنان سۋ اققان»، - دەدى اكىمدىكتەن.
انىقتالعانداي، قالالىق قۇرىلىس ءبولىمى 13 جەلتوقساندا وسى جۇمىستاردى اياقتايدى.
«وسى وقيعا تۋرالى ۋاقتىلى حابارلاماعان كۇزەت ۇيىمىنا ءتيىستى حات جولداندى. قازىرگى ۋاقىتتا اتالعان ۇيلەردىڭ قۇرىلىسى بويىنشا جۇمىستاردى اياقتاۋعا مەملەكەتتىك ساتىپ الۋ جاريالاندى، مەردىگەر ۇيىم انىقتالعاننان كەيىن تۇرعىنداردى قونىستاندىرعانعا دەيىنگى بارلىق اقاۋلار جويىلادى»، - دەپ اتاپ ءوتتى قالالىق اكىمدىكتە.
ءۇي ءالى قابىلدانباعان جانە پايدالانۋعا بەرىلمەگەن. تۇرعىندار ازىرگە جوق.