پرەزيدەنت «Allur كومپانيالار توبى» اق ديرەكتورلار كەڭەسىنىڭ ءتوراعاسى اندرەي لاۆرەنتيەۆتى قابىلدادى
مەملەكەت باسشىسىنا كومپانيانىڭ ماشينا جاساۋ سالاسىن دامىتۋ، ينجەنەرلەردىڭ بىلىكتىلىگىن ارتتىرۋ جانە شەتەلدەن ينۆەستيسيا تارتۋ جۇمىستارى جونىندە مالىمەت بەرىلدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
پرەزيدەنتكە بۇگىندە 6 مىڭنان استام وتانداسىمىز ەڭبەك ەتىپ جاتقان ءوندىرىس ورىندارى مەن كومپانيانىڭ پەرسپەكتيۆتى جوبالارى تۋرالى باياندالدى. قوستاناي قالاسىندا وڭتۇستىك كورەيالىق Kia كورپوراسياسىمەن بىرلەسىپ، Kia اۆتوموبيلدەرىن شىعاراتىن جاڭا زاۋىتتىڭ قۇرىلىسى باستالادى.
سونىمەن قاتار اندرەي لاۆرەنتيەۆ ءبىلىم بەرۋ سالاسىندا اتقارىلىپ جاتقان جۇمىستار تۋرالى ايتتى. كومپانيا قوستاناي اۆتوموبيل كولىگى كوللەدجىندە تەحنيكالىق ماماندىقتاردى مەملەكەتتىك تىلدە وقىتاتىن كۋرس اشتى. ستۋدەنتتەردى ءدۋالدى وقىتۋ جونىندە وقۋ ورىندارىمەن جۇمىس جۇرگىزىلىپ جاتىر. سونداي-اق Allur جوعارى ينجەنەرلىك مەكتەبى اشىلدى.
قاسىم-جومارت توقايەۆ كەزدەسۋدە وتاندىق ماشينا جاساۋ سالاسىن دامىتۋدىڭ ماڭىزدىلىعىن، جەرگىلىكتى ينجەنەرلەردىڭ جانە تەحنيكالىق مامانداردىڭ بىلىكتىلىگىن ارتتىرۋدىڭ وزەكتى ەكەنىن اتاپ ءوتتى.