قوستاناي وبلىسى پد ەسىرتكى قىلمىسىنا قارسى ءىس-قيمىل ءبولىمىنىڭ قىزمەتكەرلەرى جەدەل-ىزدەستىرۋ ءىس-شارالارى بارىسىندا قىزمەتتىك ءيتتى پايدالانىپ، 38 جاستاعى جەكە كاسىپكەردى انىقتاپ، ۇستادى. ول تاپسىرىس بويىنشا جيھاز وندىرۋمەن اينالىساتىن سەحىندا جاسىل ءتۇستى زاتتاردى زاڭسىز ساقتاعان، دەپ حابارلايدى aqshamnews.kz
ساراپتاما ناتيجەسىندە تاركىلەنگەن زاتتاردىڭ 600 گرامم گاشيش جانە 500 گرامم اناشا ەكەنى انىقتالدى. ايتا كەتەرلىگى، مۇنداي كولەم اسا ءىرى ساناتقا جاتادى.
قازىرگى تاڭدا پوليسيا اتالعان فاكتى بويىنشا سوتقا دەيىنگى تەرگەۋ جۇرگىزۋدە. ەسىرتكىنىڭ اسا ءىرى پارتياسىن وتكىزۋ ماقساتىندا زاڭسىز ساقتاعانى ءۇشىن كۇدىكتىنىڭ مۇلكى تاركىلەنىپ، ول 10 جىلدان 15 جىلعا دەيىن باس بوستاندىعىنان ايىرىلۋى مۇمكىن.