ق ر باس پروكۋراتۋراسى قوستاناي وبلىسىنداعى ورتكە بايلانىستى 3 قىلمىستىق ءىس قوزعادى، دەپ حابارلايدى Almaty-akshamy.kz Inform.kz-كە سىلتەمە جاساپ.
«قوستاناي وبلىسىنىڭ اۋليەكول، ۇزىنكول جانە قارابالىق اۋداندارىندا تابيعي ءورتتى ءسوندىرۋ جالعاسۋدا.
ءتورت ەلدى مەكەندە (امانقاراعاي اۋىلى، وزەرنوە، كالينين جانە لەسنوە) الدىن الا مالىمەتتەر بويىنشا 108-گە جۋىق تۇرعىن ءۇي مەن عيمارات زارداپ شەكتى. كەلتىرىلگەن زالال مولشەرى انىقتالۋدا.
بۇگىندە امانقاراعاي اۋىلىنىڭ تۇرعىنى - 1936 جىلى تۋعان م.ي. بابەنكونىڭ قازا تاپقانى بەلگىلى.
سونىمەن قاتار، 3 قىركۇيەكتە قوستاناي قالاسىندا «ورۋجەينايا پالاتا» اڭشىلىق دۇكەنى ورتەنگەن. سونىڭ سالدارىنان دۇكەننىڭ جەتى قىزمەتكەرى زارداپ شەگىپ، ۇشەۋى كۇيىك شالىپ اۋرۋحاناعا جاتقىزىلدى، ال تورتەۋى قازا تاپتى»، - دەپ جازىلعان باس پروكۋراتۋرانىڭ باسپا ءسوز قىزمەتى تاراتقان مالىمەتتە.
اتالعان فاكتىلەر بويىنشا قىلمىستىق كودەكستىڭ 204-بابىنىڭ 2-بولىگى (وتپەن ابايسىز جۇمىس iستەۋ ارقىلى اۋىر زارداپتارعا اكەپ سوققان نەمەسە اسا ءىرى زالال كەلتىرىلگەن ىس-ارەكەت)، 341-بابىنىڭ 1-بولىگى (ورمانداردى جويۋ)، 292-بابىنىڭ 3-بولىگى (ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان ءورت قاۋىپسىزدىگى تالاپتارىن بۇزۋ) بويىنشا سوتقا دەيىنگى تەرگەپ-تەكسەرۋ ارەكەتتەرى باستالدى.
«ادامداردىڭ قازا بولعانىن، زارداپ شەككەندەردىڭ سانىن جانە ءورت سالدارىنان كەلتىرىلگەن شىعىندى ەسكەرە وتىرىپ، قىلمىستىق ىستەر باس پروكۋراتۋرانىڭ جانە قوستاناي وبلىسى پروكۋراتۋراسىنىڭ ارنايى پروكۋرورلارى باسشىلىق ەتەتىن تاجىريبەلى قۇقىق قورعاۋ جانە ارناۋلى ورگاندار قىزمەتكەرلەرىنەن قۇرىلعان تەرگەۋ-جەدەل توپتاردىڭ ءىس جۇرگىزۋىنە قابىلداندى. تەرگەۋ بارىسى باس پروكۋروردىڭ جەكە باقىلاۋىنا الىندى»، - دەپ حابار تاراتتى قۇزىرلى ورگان.