الماتىدا ۇلاندىقتار ايگىلى پانفيلوۆ ديۆيزياسىنىڭ سوڭعى جاۋىنگەرلەرىنىڭ ءبىرى، ۇلى وتان سوعىسىنىڭ ارداگەرى قايىرلى جونقابايەۆ پەن «وڭتۇستىك» وڭىرلىك قولباسشىلىعىنىڭ الماتى قالاسى بويىنشا تىل ارداگەرى عالىمجان باكيشيەۆتىڭ ءۇيىنىڭ اۋلاسىندا سالتاناتتى شارا ۇيىمداستىرىپ، كەلە جاتقان جەڭىس كۇنى مەرەكەسىمەن قۇتتىقتادى، دەپ حابارلايدى اlmaty-akshamy.kz.
«بۇگىنگى ۇرپاق قازىرگى تاۋەلسىز قازاقستان ەلىندە، اشىق اسپان استىندا الاڭسىز، بەيبىت ءومىر كەشۋدە. وسىنداي ەركىندىك باقىتىن بىزدەرگە ادامزات تاريحىنداعى ەڭ جويقىن سوعىستا بۇعاناسى بەكىمەي قولىنا قارۋ الىپ، قاسىق قانى قالعانشا كۇرەسكەن اعا ۇرپاق سىيلادى. سوندىقتان ءبىزدىڭ جارقىن كەلەشەگىمىز ءۇشىن وت پەن وقتىڭ ورتاسىندا بولعان ارداگەرلەرىمىزدى قالاي جانە قانشالىقتى ارداقتاساق تا جاراسىمدى! تىنىشتىق كۇزەتىندەگى ۇلتتىق ۇلان جاۋىنگەرلەرى اتىنان ەرلىكتەرىڭىزگە باس ءيىپ، راقمەت ايتامىز»، - دەدى تاربيە جانە الەۋمەتتىك-قۇقىقتىق جۇمىستار باسقارماسىنىڭ باستىعى، پودپولكوۆنيك ارمان سەيتوۆ.
مايدانگەرگە «وڭتۇستىك» وڭىرلىك قولباسشىلىعىنىڭ قولباسشىسى، گەنەرال-مايور تالاپكەر امىرەيەۆتىڭ اتىنان العىس حات تابىستالدى. ال وڭىرلىك قولباسشىلىقتىڭ ارداگەرلەر كەڭەسىنىڭ مۇشەلەرى پانفيلوۆشى قارت سارباز بەن تىل ارداگەرىنە ارنايى دايىنداپ كەلگەن سىي-سياپاتتارىن بەردى.
«اكەمىز بيىل 102 جاسقا تولادى. ۇلتتىق ۇلاننىڭ جىل سايىن كەلىپ، اتامىزعا قۇرمەت كورسەتىپ جۇرگەن «وڭتۇستىك» وڭىرلىك قولباسشىلىعىنا العىس ايتامىز. بۇگىن دە كەلىپ، مەرەكەلىك كوڭىل-كۇي سىيلاپ جاتىرسىزدار. اكەمىز جەڭىس اندەرىن تىڭداپ، ەرەكشە مارقايىپ قالدى»، - دەيدى قايىرلى جونقابايەۆتىڭ ۇلى ەركىن اعا.
ارداگەرلەردىڭ ءۇيىنىڭ اۋلاسىندا كەڭەس وداعىنىڭ باتىرى، گۆارديا پولكوۆنيگى باۋىرجان مومىش ۇلى اتىنداعى 5571 اسكەري ءبولىمىنىڭ وركەسترى سوعىس جىلدارىنداعى اسكەري اندەردى ورىنداپ، سالتاناتتى مارشپەن ءجۇرىپ ءوتتى.
ءبىز ارداگەرلەرىمىز بەن تىل ەڭبەككەرلەرىن ءارقاشان قۇرمەت تۇتامىز. قازىرگى الەمدەگى بەيبىت ءومىر – سىزدەر اكەلگەن ۇلى جەڭىستىڭ جەمىسى. سوندىقتان دا ول – قاسيەتتى جەڭىس! ورتامىزدا اڭىز-داستان بولىپ، امان-ەسەن جۇرە بەرىڭىزدەر، قۇرمەتتى ارداگەرلەر!