تۇركىستاندا پرەمەرا ءوتتى. تەاتر ونەرىنىڭ تۋىندىسىن تاماشالاۋعا ەلىمىزدىڭ تۇكپىر-تۇكپىرىنەن ونەر جانە مادەنيەت مايتالماندارى، زيالى قاۋىم وكىلدەرى جانە تۇركىستان قالاسىنىڭ ونەرسۇيەر قاۋىمى قاتىستى، دەپ حابارلايدى Almaty-akshamy.kz Inform.kz-كە سىلتەمە جاساپ.
«قورقىت تۋرالى اڭىز» پلاستيكالىق سپەكتاكلىندە قورقىت الىپ قاراعاشتان ويىپ قوبىز جاسايدى. الەمدى قوبىز ۇنىمەن الديلەگەن بابامىز، كورگەن تۇسىنەن شوشىپ، ولىمنەن قاشادى. جەرۇيىق مەكەندى ىزدەيدى. «قايدا بارسا دا، قورقىتتىڭ كورىنە» كەزىگىپ، اقىرى تۋعان جەرىنە - دۇنيەنىڭ كىندىگى سانالاتىن سىر-دارياعا ورالادى.
جازۋشى-دراماتۋرگ ەرمەك امانشايەۆتىڭ ليبرەتتوسى بويىنشا قويىلعان «قورقىت تۋرالى اڭىز» اتتى پلاستيكالىق سپەكتاكلىن بەلگىلى رەسەيلىك بالەتمەيستەر كونستانتين سەمەنوۆ ساحنالادى. كومپوزيتورى – دارىندى جاس كومپوزيتور حاميت شانعالييەۆ. كوركەمدىك جەتەكشىسى – اينۇر كوپباساروۆا.
قويىلىمدا كەيىپكەر ءسوزى كوپ ەمەس، ويتكەنى بۇل – پلاستيكالىق سپەكتاكل. وزگەشە ايتقاندا، ارتيستەر وقيعانى، قويىلىم كەيىپكەرلەرىنىڭ ىشكى سەزىمدەرىن بي قيمىلدارى ارقىلى باياندايدى. بۇدان بولەك، پلاستيكالىق تەاتر - ادامدار ءتۇرلى تىلدە سويلەسەتىن قوعامعا ارنالعان، ال بي قيمىلدارىن اۋدارماسىز تۇسىنۋگە بولادى.
قويىلىمدى تاماشالاعان مادەنيەت جانە سپورت ۆيسە-مينيسترى سەرىك جاراسبايەۆ، تۇركىستان وبلىسىنىڭ اكىمى ءومىرزاق شوكەيەۆ تۇركىستاندى تۇركى الەمىنىڭ مادەني جانە رۋحاني ورتالىعىنا اينالدىرۋ جولىندا تەاتردىڭ ماڭىزى زور ەكەنىن ايتىپ، ونەر ۇجىمىنا العىس ايتتى.