يزرايل مەن شۆەيساريادا مايمىل شەشەگىن جۇقتىرۋدىڭ العاشقى وقيعالارى راستالدى. بۇگىندە اۋرۋ انىقتالعان ەلدەر سانى 14-كە جەتتى. بۇل تۋرالى قازاقپارات Almaty-akshamy.kz Inform.kz-كە سىلتەمە جاساپ حابارلايدى.
ەكى ەلدە دە اۋرۋدى ءبىرىنشى جۇقتىرعاندار جاقىندا عانا شەتەلدەن كەلگەن. يزرايلدە ينفەكسيانىڭ بىرنەشە جاعدايى زەردەلەنۋ ۇستىندە. مايمىل شەشەگى ورتالىق جانە باتىس افريكادا ءجيى كەزدەسەدى. بۇل ايماقتان تىس جەردە ونىڭ قوزدىرعىشىن كوبىنەسە سول جەردە بولعان ادامدار مەن جانۋارلار تاسىمالدايدى. اقش، كانادا، اۆستراليا جانە ەۋروپادا مايمىل شەشەگىنىڭ جاڭا جاعدايلارى زەرتتەلۋدە. وسى اپتادا اقش، كانادا، يسپانيا، پورتۋگاليا، ۇلىبريتانيا، فرانسيا، يتاليا، شۆەسيا جانە اۆستراليا بيلىگى دە ءوز اۋماعىندا اۋرۋدىڭ ءورشۋىن راستادى.
الەمدە ينفەكسيانىڭ 80-گە جۋىق راستالعان جاعدايى تۋرالى حابارلانعان، ءبىراق دۇنيەجۇزىلىك دەنساۋلىق ساقتاۋ ۇيىمى مايمىل شەشەگىن جۇقتىردى دەگەن كۇدىككە ىلىنگەن تاعى 50 پاسيەنت تۋرالى ايتتى، ءبىراق قاي ەلدە انىقتالعانى اتاماي وتىر.
ۇيىم اۋرۋ سانىنىڭ ءالى دە ارتاتىنىن ەسكەرتتى. عالىمدار ىندەتتىڭ وسىنشا قارقىندى تارالاتىنىن كۇتكەن جوق، دەسە دە مايمىل شەشەك ادامنان ادامعا وڭاي جۇقپايدى. بريتاندىق دەنساۋلىق ساقتاۋ قىزمەتىنىڭ مالىمەتىنشە، اۋرۋ ادەتتە جەڭىل وتەدى، ادامداردىڭ كوبى بىرنەشە اپتا ىشىندە ساۋىعىپ كەتەدى.