كوكتەمگى سۋ تاسقىنى باستالعاننان بەرى قارۋلى كۇشتەر اۋە قورعانىسى كۇشتەرىنىڭ ۇشقىشتارى زارداپ شەككەن وڭىرلەردىڭ تۇرعىندارىن ەۆاكۋاسيالاۋعا، ماماندار مەن جۇكتەردى تاسىمالداۋعا جۇمىلدىرىلدى.
بۇگىن اۋە قورعانىسى كۇشتەرى اسكەري-كولىكتىك اۆياسياسىنىڭ بورتىمەن الماتىدان ورالعا سالماعى بەس توننا گۋمانيتارلىق جۇك جەتكىزىلدى. ال پەتروپاۆلعا ەلوردادان ەكى س-295 ۇشاعى ۇشىپ جەتتى، ولار سۋ اپاتىنان زارداپ شەككەن تۇرعىندارعا ون توننا ازىق-تۇلىك، قاجەتتى زاتتار مەن دارى-دارمەكتەردى تاسىمالدادى.
ودان بولەك وتكەن دەمالىس كۇندەرى استانا قالاسىنان اتىراۋ وبلىسىنا اۋە قورعانىسى كۇشتەرىنىڭ س-295 ەكى بورتىمەن ەلوردانىڭ كاسىپكەرلەرى اتىنان ون توننا گۋمانيتارلىق كومەك اپارعانىن اتاپ وتكەن ءجون.
27 ناۋرىز بەن 15 ءساۋىر ارالىعىندا اسكەري ۇشقىشتار 2 951 جەرگىلىكتى تۇرعىندى، ونىڭ ىشىندە 811 بالانى ەۆاكۋاسيالادى، سۋ تاسقىنىنا قارسى شارالارعا جۇمىلعان قىزمەتتەردىڭ 998 وكىلىن جانە 165 توننادان استام جۇكتى جەتكىزدى.
سۋ تاسقىنى جاعدايىن ەسكەرە وتىرىپ، قارۋلى كۇشتەردىڭ اسكەري قىزمەتشىلەرى سۋ تاسقىنى سالدارىن جويۋعا جانە اپاتتان قۇتقارۋ جۇمىستارىنا قاتىسۋدى جالعاستىرۋدا.
اقتوبە وبلىسىندا ويىل ەلدى مەكەنى ماڭىندا اسكەري ينجەنەرلەر پاروم ارقىلى سۋدان ءوتۋدى جولعا قويدى. بۇل وڭىرگە بىرنەشە اسكەري بولىمدەردىڭ، اۋە قورعانىسى كۇشتەرى اسكەري ينستيتۋتىنىڭ جانە اۋماقتىق قورعانىس بريگاداسىنىڭ جەكە قۇرامى جۇمىلدىرىلدى.
اتىراۋ وبلىسىندا اسكەري قىزمەتشىلەردىڭ كۇشىمەن جايىق وزەنىنىڭ ارناسىن كەڭەيتۋ جانە ماحامبەت، جاڭاتالاپ، تالقايران، ەسبول، ەڭبەكشى، اققايىڭ، اقتوعاي، جالعانساي، قۇرىلىس، يندەربور جانە ورلىك ەلدى مەكەندەرىنىڭ اۋماعىن نىعايتۋ جۇمىستارىن جۇرگىزۋدە. ماڭعىستاۋ وبلىسىنىڭ اۋماقتىق قورعانىس بريگاداسى قۇلسارى قالاسىنداعى بوگەتتى قالپىنا كەلتىرۋگە كومەكتەسىپ ءجۇر.
باتىس قازاقستان وبلىسىنا 66597، 18404، 61993 اسكەري بولىمدەرىنىڭ جانە اۋماقتىق قورعانىس بريگادالارىنىڭ اسكەري قىزمەتشىلەرى جۇمىلدىرىلدى. ورال قالاسىنىڭ «كۋرينىي» شاعىن اۋدانىنىڭ جانە بۋماكول جانە رۋبەجينسكيي ەلدى مەكەندەرىنىڭ بويىمەن اعاتىن جايىق وزەنىنىڭ جاعالاۋىن كۇشەيتۋ جۇمىستارى جۇرگىزىلۋدە. پودستەپنوە، ماگيسترالنوە، بايقوڭىس، دارينسكوە، بۋدارين، جاڭابۇلاق جانە چاپايەۆ اۋىلدارىنداعى بوگەتتەر دە نىعايتىلۋدا.
سولتۇستىك قازاقستان وبلىسىندا 68665 جانە 31775 اسكەري بولىمدەرىنىڭ اسكەري قىزمەتشىلەرى قاپشىقتارعا قۇم تولتىرىپ، توسەۋمەن اينالىسۋدا. اتالمىش ىس-ارەكەتتەر «قىزىلجار سۋ» سۋ ارناسىنىڭ جانىندا جانە بەسكول اۋىلىندا جۇرگىزىلۋدە.
27 ناۋرىز بەن 15 ءساۋىر ارالىعىندا ءىس-شارالارعا بارلىعى 5 441 اسكەري قىزمەتشى كومەكتەسىپ، 211 بىرلىك اۆتوموبيل تەحنيكاسى، 11 تىكۇشاق، 2 ۇشقىشسىز باسقارىلاتىن قۇرىلعى جانە 5 اسكەري-كولىك ۇشاعى جۇمىلدىرىلدى. 469 مىڭنان استام قاپ دايىندالىپ، توسەلدى.