پارلامەنت سەناتىنىڭ حالىقارالىق قاتىناستار، قورعانىس جانە قاۋىپسىزدىك كوميتەتى راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ (رەبايي) بازاسىندا كوشپەلى وتىرىس وتكىزدى.
ءىس-شاراعا پارلامەنت سەناتىنىڭ دەپۋتاتتارى، ۇلتتىق قاۋىپسىزدىك كوميتەتىنىڭ، قورعانىس، سيفرلىق دامۋ، يننوۆاسيالار جانە اەروعارىش ونەركاسىبى مينيسترلىكتەرىنىڭ، قازاقستان-بريتان تەحنيكالىق ۋنيۆەرسيتەتىنىڭ وكىلدەرى قاتىستى، دەپ حابارلايدى Almaty-akshamy.kz
مەملەكەتتىك قۇپيالاردى قورعاۋ جانە اقپاراتتىق قاۋىپسىزدىك بولىمشەلەرى ءۇشىن مامانداردى دايارلاۋ جانە وقىتۋ ادىستەرى بويىنشا رەبايي باستىعىنىڭ ورىنباسارى پولكوۆنيك ويرات اتىكەنوۆ ءسوز سويلەدى. قارۋلى كۇشتەر باس شتابى مەملەكەتتىك قۇپيالاردى قورعاۋ دەپارتامەنتىنىڭ باستىعى پولكوۆنيك تيمۋر ءسادۋاقاسوۆ كيبەرقاۋىپسىزدىك ماماندارىن دايارلاۋدى جەتىلدىرۋ جونىندە ۇسىنىستار ايتتى.
سەنات دەپۋتاتى بيبىگۇل جەكسەنباي كيبەرقاۋىپسىزدىك – تەك تەحنولوگيا ەمەس، ۇلتتىق قاۋىپسىزدىك ماسەلەسى ەكەنىن اتاپ ءوتتى.
«قورعاۋدىڭ جاڭا تەحنولوگيالارى مەن ادىستەرىن دامىتىپ قانا قويماي، كيبەركەڭىستىكتەگى قاۋىپ-قاتەرلەرمەن ءتيىمدى كۇرەسۋگە قابىلەتتى مامانداردىڭ كادرلىق رەزەرۆىن ساۋاتتى قالىپتاستىرۋ دا ماڭىزدى. ءبىز وسى سالاداعى ءبىرقاتار پروبلەمالىق اسپەكتىلەردى ناقتىلاپ، ولاردى دەپۋتاتتىق ساۋال اياسىندا جاريا ەتۋ ويىمىزدا بار»، – دەپ دەپۋتات جوسپارلارىمەن ءبولىستى.
اسكەري جوعارى ءبىلىم وردالارىندا دەپۋتاتتار كيبەرپوليگوندى ارالاپ، وقۋ ورنىنىڭ كيبەرقاۋىپسىزدىك جونىندە ءوقۋ-بىلىم بەرۋ باعدارلاماسىمەن تانىستى. ولارعا اقپاراتتى قورعاۋدىڭ تيىمدىلىگىن باقىلاۋدىڭ زاماناۋي قۇرالدارى مەن تەحنيكالىق قورعاۋ قۇرالدارى كورسەتىلىپ، كۋرسانتتاردىڭ ۇزدىك عىلىمي ازىرلەمەلەرى تانىستىرىلدى. سەناتورلار ودان وزگە ۋنيۆەرسيتەتتىڭ مۇراجايىن، كازارماسىن، اسحاناسىن جانە باسقا دا الەۋمەتتىك-مادەني نىساندارىن دا ارالادى.
سەناتورلار وقىتۋ ساپاسىن ارتتىرۋ قاجەتتىگىنە توقتالىپ، كاسىبي كيبەرقاۋىپسىزدىك ماماندارىن دايارلاۋ ارقىلى قارۋلى كۇشتەردى نىعايتۋدىڭ ماڭىزدى ەكەنىن اتاپ ءوتتى.