جاڭا سيفرلىق داۋىردە ونىڭ گەوساياسي ماڭىزى زور.
قورعانىس مينيسترلىگىندە ۆەدومستۆو باسشىسى، گەنەرال-لەيتەنانت رۋسلان جاقسىلىقوۆتىڭ باسشىلىعىمەن اسكەري ماقساتتاعى اقپاراتتىق-كوممۋنيكاسيالىق ينفراقۇرىلىمنىڭ ءبىرىڭعاي وپەراتورىن قۇرۋ ماسەلەسى جونىندە كەڭەس ءوتتى، دەپ حابارلايدى Almaty-akshamy.kz.
كەڭەسكە سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين، «قازاقستان عارىش ساپارى» ۇك» اق جانە «Ghalam» ج ش س باسشىلىعى، مينيسترلىكتىڭ قۇرىلىمدىق بولىمشەلەرىنىڭ وكىلدەرى قاتىستى.
قورعانىس ۆەدومستۆوسىنان ءمينيستردىڭ ورىنباسارى، گەنەرال-لەيتەنانت سۇلتان قامالەتدينوۆ، ستراتەگيالىق دامۋ، اقپاراتتاندىرۋ، بايلانىس، مەملەكەتتىك قۇپيالاردى قورعاۋ دەپارتامەنتتەرىنىڭ، اسكەري-عارىشتىق باعدارلامالار ورتالىعىنىڭ باستىقتارى جانە «قازاقستان گاج ورتالىعى» اق باسشىلىعى قاتىستى.
«مەملەكەت باسشىسىنىڭ تاپسىرماسىن ورىنداۋ ءۇشىن قورعانىس مينيسترلىگىنە اسكەري ماقساتتاعى اقپاراتتىق-كوممۋنيكاسيالىق ينفراقۇرىلىمنىڭ ءبىرىڭعاي وپەراتورىن قۇرۋ تاپسىرىلدى. قورعانىس مينيسترلىگى «قازاقستان رەسپۋبليكاسىنىڭ قورعانىسى جانە قارۋلى كۇشتەرى تۋرالى» زاڭعا تۇزەتۋلەر ەنگىزدى»، – دەدى قورعانىس ءمينيسترى.
ەل پرەزيدەنتى حالىققا جولداۋىندا اۋقىمدى اقپاراتتىق-تەلەكوممۋنيكاسيالىق الەۋەتتى ىسكە اسىرۋ قاجەتتىگىن اتاپ ءوتتى. جاڭا سيفرلىق داۋىردە ونىڭ گەوساياسي ماڭىزى زور. قازاقستان ەۋرازيا كەڭىستىگىنىڭ ەلەۋلى بولىگىندە ورتالىق سيفرلىق حابقا اينالۋعا ءتيىس.
گەنەرال-لەيتەنانت رۋسلان جاقسىلىقوۆ اتاپ وتكەندەي، اسكەري ماقساتتاعى اقپاراتتىق-كوممۋنيكاسيالىق ينفراقۇرىلىم وبەكتىلەرىن قۇرۋ، ەنگىزۋ، دامىتۋ، ينتەگراسيالاۋ جانە جۇيەلىك-تەحنيكالىق قىزمەت كورسەتۋ ءبىرىڭعاي وپەراتوردى قۇرۋداعى ماقسات بولىپ تابىلادى. ءبىرىڭعاي وپەراتور اقپاراتتىق-كوممۋنيكاسيالىق تەحنولوگيالار سالاسىنداعى تالاپتاردىڭ ساقتالۋىن، اقپاراتتىق قاۋىپسىزدىكتى، انىقتالعان كەمشىلىكتەرگە جەدەل دەن قويۋدى جانە ولاردى ۋاقتىلى جويۋ جونىندە شارالار قابىلداۋدى، سونداي-اق اقپاراتتىق-كوممۋنيكاسيالىق قىزمەتتەر كورسەتۋ كەزىندە ەلەكتروندىق اقپاراتتىق رەسۋرستاردى ساقتاۋ قاۋىپسىزدىگىن، اقپاراتتىق جۇيەلەرگە تەحنيكالىق قىزمەت كورسەتۋدى جانە ولاردى سۇيەمەلدەۋدى قامتاماسىز ەتەدى.
ءبىرىڭعاي وپەراتور رەتىندە «قازاقستان گاج ورتالىعى» اكسيونەرلىك قوعامىن بەلگىلەۋ ۇسىنىلىپ وتىر. بۇل ورتالىق 15 جىلدان استام ۋاقىت بويى قورعانىس مينيسترلىگىنىڭ اقپاراتتىق جۇيەلەرىن تەحنيكالىق تۇرعىدا قولداۋدى جانە سۇيەمەلدەۋدى جۇزەگە اسىرىپ كەلەدى.
مۇنان وزگە، كەڭەس بارىسىندا جوعارى جيىلىكتە جەردى قاشىقتان زوندتاۋمەن قامتۋ جانە پايدالانۋعا بەرۋ، تۇسىرىلىمدەردى تاراتۋعا شەكتەۋلەردى الىپ تاستاۋ جونىندەگى جوبانى ىسكە اسىرۋدىڭ تەحنيكالىق شەشىمى مەن تەتىگى بويىنشا ماسەلەلەر دە تالقىلاندى.