قازاقستاندا تاۋلىگىنە 1،7 ميلليارد باررەل مۇناي وندىرىلەدى.
اعىمداعى جىلدىڭ قاڭتار ايىندا قازاقستاندا 6،7 ملن توننا شيكى مۇناي ءوندىرىلدى، بۇل ءبىر جىل بۇرىنعىدان 14،2%-عا ارتىق، دەپ حابارلايدى Almaty-akshamy.kz ەnergyprom.kz سايتىنا سىلتەمە جاساپ.
وڭىرلىك تۇرعىدان العاندا ءوندىرىستىڭ ەڭ ۇلكەن كولەمى ءداستۇرلى تۇردە اتىراۋ وبلىسىنا تيەسىلى: 4،6 ملن توننا، ياعني 23،4% ارتىق. ۇزدىك ۇشتىككە سونىمەن قاتار ماڭعىستاۋ (1،4 ملن توننا، جىلىنا 0،5% ارتىق) جانە اقتوبە (395،5 مىڭ توننا) وبلىستارى كىرەدى.
نەگىزگى ايماقتاردا «نورت كاسپيان وپەرەيتينگ كومپاني ن.ۆ.» فيليالى، «تەڭىزشيەۆرويل» ج ش س، «ەمبىمۇنايگاز» اق (اتىراۋ وبلىسى)، «قاراجانباسمۇناي» اق، «ماڭعىستاۋمۇنايگاز» اق، «قاراقۇدىقمۇناي» ج ش س (ماڭعىستاۋ وبلىسى) سياقتى كومپانيالار جۇمىس ىستەيدى.
جالپى، 2021 جىلدىڭ قاڭتار-جەلتوقسان ايلارىندا كاسىپورىندار 73،7 ملن توننا شيكى مۇناي ءوندىردى، بۇل وتكەن جىلدىڭ وسى كەزەڭىمەن سالىستىرعاندا 1%-عا ارتىق.
2021 جىلدىڭ قاڭتار-جەلتوقسان ايلارىندا قازاقستان 31،1 ميلليارد دوللارعا 65،7 ميلليون توننا شيكى مۇناي ەكسپورتتادى. فيزيكالىق ماندە تومەندەۋ 6،9%-دى قۇراسا، اقشالاي تۇردە، كەرىسىنشە، 31،2%-عا ءوسۋ بايقالدى.
تمد ەلدەرىنە 54،6 ملن دوللارعا بار بولعانى 131،6 مىڭ توننا شيكى مۇناي جونەلتىلدى. بۇل كولەمدەگى مۇنايدى رەسەي مەن وزبەكستان ءوزارا تەڭ ءبولىپ العانداي.
تمد-دان تىس ەلدەرگە قازاقستان 31 ميلليارد دوللارعا 65،6 ميلليون توننا شيكى مۇناي ەكسپورتتادى. ونىڭ باسىم بولىگى ءداستۇرلى تۇردە يتالياعا جونەلتىلدى: 17،9 ملن توننا، ءبىر جىل بۇرىنعىدان 8،9%-عا از. ۇزدىك ساتىپ الۋشى ۇشتىكتە نيدەرلاندى مەن فرانسيا دا بار. ەلىمىزدىڭ مۇنايىن الۋشى ۇزدىك بەس ەلدىڭ قاتارىنا جۇڭگو مەن تۇركيا كىرەدى.
2021 جىلعى جەلتوقساننىڭ اياعىندا شيكى مۇناي مەن بيتۋمدى مينەرالداردان الىنعان شيكى مۇناي ونىمدەرىن ەكسپورتقا جەتكىزۋ باعاسى ءبىر ايدا 1،6%-عا، ءبىر جىلدا – 82،1%-عا، 2015 جىلعى جەلتوقساندا – 2،2 ەسەگە ءوستى. جىلدىق ديناميكا بويىنشا باعا تمد ەلدەرى بويىنشا 17،7%-عا، ال تمد-دان تىس ەلدەر ءۇشىن 82،1%-عا ءوستى.
جالپى، 2021 جىلعى قاڭتار-جەلتوقساندا بۇل سەكتورداعى باعالار 2020 جىلدىڭ سايكەس كەزەڭىمەن سالىستىرعاندا 53،1%-عا ءوستى.
Investfunds مالىمەتىنشە، 2022 جىلدىڭ 4 ناۋرىزىندا مۇناي باررەلىنىڭ قۇنى 118،1 دوللاردى قۇرادى. ءبىر تاۋلىكتە باررەل باعاسى 6،9%-عا، ءبىر ايدا – 32%-عا، ءۇش ايدا – 69%-عا، ءبىر جىلدا – 77%-عا قىمباتتادى.
2022 جىلى كۇندەلىكتى مۇناي ءوندىرۋ كولەمى بويىنشا ەلدەر رەيتينگىندە قازاقستان 127 ەلدىڭ ىشىندە 18-ورىنعا تۇراقتادى. قازاقستان تاۋلىگىنە ورتا ەسەپپەن 1،7 ملرد باررەل مۇناي وندىرەدى. بۇل رەيتينگتىڭ كوشباسشىلارى اقش، ساۋد ارابياسى جانە رەسەي مەملەكەتى.
تمد ەلدەرىنىڭ ىشىندە قازاقستان رەسەيدەن كەيىنگى ورىندا تۇر. ءازىربايجان – 843،5 ملن باررەل، تۇركىمەنستان – 266،4 ملن باررەل، وزبەكستان – 71،5 ملن باررەل، بەلارۋس – 32،6 ملن باررەل، قىرعىزستان – 972 مىڭ باررەل، تاجىكستان – 173 مىڭ باررەل مۇناي وندىرەدى.
وكىنىشكە قاراي، رەسەيدىڭ ۋكرايناداعى «ارنايى اسكەري وپەراسياسى» باستالعاننان كەيىن قۇلدىراعان تەڭگە باعامىن ۇستاپ تۇرۋعا رەيتينگتەگى ورىندار دا، مۇناي باعاسى دا كومەكتەسە المادى.