قازاقستان رەسپۋبليكاسىنىڭ قورعانىس مينيسترلىگى الماتىدا "Industrial AI: جاڭا داۋىرگە ارنالعان تەحنولوگيالار" ۇرانىمەن باستالعان Digital Almaty 2025 VII حالىقارالىق سيفرلىق فورۋمىندا قورعانىس جانە قاۋىپسىزدىك سالاسىنداعى زاماناۋي سيفرلىق باستامالاردى تانىستىردى، دەپ حابارلايدى aqshamnews.kz.
ءىس-شارادا قورعانىس ءمينيسترىنىڭ ورىنباسارى دارحان احمەدييەۆ ەاەو ەلدەرى ۇكىمەت باسشىلارىنىڭ الدىندا قورعانىس سالاسىندا جاساندى ينتەللەكتى قولدانۋ تۋرالى بايانداما جاسادى. فورۋمدا ۇسىنىلعان نەگىزگى جوبالاردىڭ ءبىرى اسكەري ەسەپتى اۆتوماتتاندىرۋعا ارنالعان "سروچنيك 2.0" جۇيەسى بولدى. بۇل اسكەرگە شاقىرىلعاندارمەن جۇمىستىڭ اشىقتىعىن ارتتىرۋعا، جۇمىلدىرۋ دايىندىعىن وڭتايلاندىرۋعا جانە ازاماتتاردىڭ قاجەتتى اقپاراتقا قول جەتكىزۋىن جەڭىلدەتۋگە مۇمكىندىك بەرەدى. جۇيە دەرەكتەردى اۆتوماتتى تۇردە تالدايدى، اسكەرگە شاقىرىلۋشىلاردىڭ ساناتتارىن انىقتايدى، SMS حابارلامالار جىبەرەدى جانە اسكەرگە شاقىرىلۋشىلاردىڭ قاي اسكەر تۇرلەرىنە جىبەرۋگە بولاتىنىن ايتادى.
– وتكەن جىلداردان ايىرماشىلىعى، Digital Almaty 2025 جاساندى ينتەللەكتى قولداناتىن شەشىمدەرگە باعىتتالعان. وسىعان بايلانىستى ءبىزدىڭ باياندامامىز دا، ۇسىنىلعان ستەند تە قورعانىس سالاسىنداعى سيفرلىق يننوۆاسيالارعا ارنالعان. جاساندى ينتەللەكت شاقىرۋ ناۋقانى مەن ۇگىت-ناسيحات جۇمىستارى اياسىندا عانا ەمەس، سونىمەن قاتار اسكەري قىزمەتشىلەردىڭ كۇندەلىكتى ءومىرىن سيفرلىق ترانسفورماسيالاۋدا دا بەلسەندى قولدانىلادى. ول ءبىرقاتار تاپسىرمالاردى ورىنداۋدى جەڭىلدەتە وتىرىپ، كۇندەلىكتى پروسەستەردى اۆتوماتتاندىرۋعا كومەكتەسەدى، — دەپ اتاپ ءوتتى دارحان احمەدييەۆ.
قورعانىس سالاسىنا وزىق تەحنولوگيالاردى ەنگىزۋگە باعىتتالعان Defence Tech باعىتىن دامىتۋعا ەرەكشە نازار اۋدارىلدى. ونىڭ اياسىندا حاكاتوندار، دوڭگەلەك ۇستەلدەر، ستراتەگيالىق سەسسيالار جانە اكسەلەراسيالىق باعدارلامالار وتكىزىلەدى. 2023 جىلى Astana Hub-تا Defense Tech كەڭسەسى اشىلدى، ال جاقىن ارادا الماتىداعى وفيسەرلەر ۇيىندە وكىلدىك اشۋ جوسپارلانعان. بۇل تەحنولوگيالىق كومپانيالاردى قورعانىس يننوۆاسيالارىنا بەلسەندى تارتۋعا مۇمكىندىك بەرەدى.
بۇدان بولەك فورۋمدا قازاقستاننىڭ قارۋلى كۇشتەرىنە وزىق تەحنولوگيالاردى ازىرلەۋ مەن ەنگىزۋدى قولدايتىن Defense Tech قورعانىس قاۋىپسىزدىگى سالاسىنداعى يننوۆاسيالاردى دامىتۋ ورتالىعىنىڭ، دامۋ ينستيتۋتىنىڭ ستەندى تانىستىرىلدى.
قورعانىس سالاسىنداعى سيفرلىق شەشىمدەردىڭ دامۋى قورعانىس مينيسترلىگىنىڭ جاڭا سيفرلىق داۋىردە ەلدىڭ قاۋىپسىزدىگى مەن قورعانىس قابىلەتىن جوعارى دەڭگەيدە قامتاماسىز ەتە وتىرىپ، وزىق تەحنولوگيالاردى ەنگىزۋگە دەگەن ۇمتىلىسىن كورسەتەدى.