قورعانىس ءمينيسترى جاۋىنگەرلەردىڭ ارميا حالىقارالىق ويىندارىنا دايىندىعىن تەكسەردى
گەنەرال-لەيتەنانت نۇرلان ەرمەكبايەۆ «استانا» وڭىرلىك قولباسشىلىعىنىڭ وقۋ-جاتتىعۋ ورتالىعىنا بارىپ، «ارحو-2021» قاتىسۋشى كوماندالاردىڭ دايىندىعىمەن تانىستى، دەپ حابارلادى Almaty-akshamy.kz.ق ر قورعانىس مينيسترلىگىنىڭ سايتىنا سىلتەمە جاساپ.
قاراعاندى ماڭىنداعى وقۋ-جاتتىعۋ پوليگونىندا جاۋىنگەرلەر «الەم جاۋىنگەرى» مەن «تاكتيكالىق مەرگەن» اتتى ارميا حالىقارالىق ويىندارىنىڭ بايقاۋلارىنا دايىندالۋدا.
ويىن تاريحىندا «تاكتيكالىق مەرگەن» بايقاۋى العاش رەت ريازان قالاسىندا وتەدى. ءتورت كەزەڭنەن تۇراتىن ويىن بارىسىندا قاتىسۋشىلار جەكە جانە توپ قۇرامىندا شەبەرلىكتەرىن كورسەتەدى. سونىمەن بىرگە دۋەل جاتتىعۋلارىن ورىنداپ جانە ۋاقىتقا اتۋدان جارىسادى.
ەل جاۋىنگەرلەرى ۇزدىك ناتيجەلەر كورسەتەرىنە سەنىمدى. ارميا تاكتيكالىق اتىستارى قازاقستاننىڭ قارۋلى كۇشتەرىندە 2019 جىلدان باستاپ بەلسەندى تۇردە دامىپ كەلەدى. اتىستىڭ بۇل ءتۇرى 2020 جىلدان باستاپ بولىمشەلەردىڭ باعدارلاماسىنا ەنگىزىلدى. ونىڭ ەلەمەنتتەرى «التىن جەبە» ارنايى وپەراسيالار كۇشتەرىنىڭ وقۋ-جاتتىعۋى مەن جىل سايىنعى كەشەندى تەكسەرۋ كەزىندە ءاردايىم پىسىقتالىپ كەلەدى.
ارمەنيادا «الەم جاۋىنگەرى» بايقاۋى وتەدى. اتالمىش بايقاۋ بىرنەشە كەزەڭنەن تۇرادى. كەزەڭدەر بارىسىندا قاتىسۋشى ەرلەر مەن ايەلدەردىڭ كاسىبي جانە زياتكەرلىك دەڭگەيى، سونداي-اق شىعارماشىلىق قابىلەتتەرى تەكسەرىلەدى. ءبىزدىڭ جاۋىنگەرلەر بۇل كونكۋرستا ءارقاشان جۇلدەلى ورىندار يەلەنەدى. ال 2018 جىلى جەڭىمپاز اتانعان بولاتىن.
قورعانىس ءمينيسترى پوليگوندا كونكۋرس جاتتىعۋلارىنىڭ ءىس جۇزىندە ورىندالۋىن باقىلاپ، «ارحو-2021» دايىندىق بارىسى جونىندە كوماندالار باسشىلارىن تىڭدادى. سونداي-اق قارۋ-جاراقتىڭ كەيبىر تۇرلەرىن قاراپ، سىناقتان وتكىزدى.
ارميا حالىقارالىق ويىندارى 22 تامىز جانە 4 قىركۇيەك ارالىعىندا 12 ەلدىڭ اۋماعىندا وتەدى. ەل اسكەرى بۇل جولى ون ءبىر كونكۋرسقا قاتىسادى.
