جالپى ءبىلىم بەرەتىن مەكتەپتەردە كەڭەس وداعىنىڭ باتىرى، №1 حالىق قاھارمانى، تاۋەلسىز قازاقستاننىڭ تۇڭعىش قورعانىس ءمينيسترى ارميا گەنەرالى ساعادات نۇرماعامبەتوۆتىڭ عاسىرلىق مەرەيتويىن مەرەكەلەۋگە ارنالعان ءبىرىڭعاي ساعات ءوتتى.
ءىس-شارا مينيسترلىكتەردىڭ بالالار مەن وقۋشىلارعا اسكەري-پاتريوتتىق تاربيە بەرۋ جونىندەگى بىرلەسكەن جۇمىس جوسپارى شەڭبەرىندە وتكىزىلدى، دەپ حابارلايدى Almaty-akshamy.kz قورعانىس مينيسترلىگىنە سىلتەمە جاساپ.
بيىل ەلىمىز داڭقتى باتىرلارى ساعادات نۇرماعامبەتوۆتىڭ (25 مامىر) جانە راقىمجان قوشقاربايەۆتىڭ (19 قازان) تۋعانىنا 100 جىل تولۋىن اتاپ وتۋدە. ەل پرەزيدەنتى قاسىم-جومارت توقايەۆ ءوزىنىڭ سۇحباتتارىنىڭ بىرىندە "ەل تاريحىندا ءىز قالدىرعان ادامداردى قۇرمەتتەۋ جالپىۇلتتىق بىرەگەيلىكتى نىعايتۋ تۇرعىسىنان وتە ماڭىزدى" دەپ اتاپ وتكەن بولاتىن.
قاراعاندى وبلىسىنىڭ پريوزەرسك قالاسىنداعى № 1 مەكتەپتە "اڭىز ادام" ەرلىك ساباعى ۇيىمداستىرىلدى. "جاس زەڭبىرەكشى" اسكەري-پاتريوتتىق كلۋبىنىڭ تاربيەلەنۋشىلەرى مەن وقۋشىلارعا "قارۋلى كۇشتەردىڭ ارداگەرلەرى" رقب جەرگىلىكتى فيليالىنىڭ ءتوراعاسى تىلەك كەنجەبەكوۆ، 60601 اسكەري ءبولىم كومانديرىنىڭ ورىنباسارى پودپولكوۆنيك نۇردوس قالىمبەتوۆ، 06708 اسكەري ءبولىمى كومانديرى ورىنباسارىنىڭ مىندەتىن ۋاقىتشا اتقارۋشى كاپيتان سىرىم بەردالى، پريوزەرسك گارنيزونى اسكەري پوليسيا بولىمشەسىنىڭ اسكەرلەر قىزمەتى جونىندەگى وفيسەرىنىڭ مىندەتىن ۋاقىتشا اتقارۋشى اعا سەرجانت قانات اشنازاروۆ جانە پريوزەرسك قالالىق كىتاپحاناسىنىڭ كىتاپحاناشىسى ينديرا تالحانبايەۆا ارميا گەنەرالى ساعادات نۇرماعامبەتوۆتىڭ ەرلىك جولى تۋرالى ايتتى.
ساعادات نۇرماعامبەتوۆتىڭ ەكىنشى دۇنيەجۇزىلىك سوعىس جىلدارىنداعى جاۋىنگەرلىك جولى مەن اسكەري قولباسشى رەتىندەگى قىزمەتى تۋرالى استانا قالاسىنداعى جۇمابەك تاشەنيەۆ اتىنداعى №10 مەكتەپ-گيمنازياسىنىڭ وقۋشىلارى كوپتەگەن تانىمدىق اقپاراتقا قانىقتى.
"بۇگىن ءبىز 7 گ جانە 9 ج سىنىپتارىندا اتى اڭىزعا اينالعان اسكەري قولباسشى ساعادات نۇرماعامبەتوۆتىڭ ءجۇز جىلدىق مەرەيتويىنا ارنالعان ساباق وتكىزدىك. ءبىزدىڭ مەكتەپتە وقۋشىلارعا پاتريوتتىق تاربيە بەرۋ كەشەندى تۇردە وتكىزىلىپ تۇرادى. بۇعان ءااد ساباقتارى، گۋمانيتارلىق پاندەردىڭ مازمۇنى جانە ءارتۇرلى سىنىپتان تىس جۇمىستار ىقپال ەتەدى. ولاردىڭ بارلىعى وسكەلەڭ ۇرپاقتىڭ بويىندا ازاماتتىق، جاۋاپكەرشىلىك جانە وتاندى قورعاۋعا دايىن بولۋ سەزىمىن قالىپتاستىرۋعا باعىتتالعان"، – دەدى باستاپقى اسكەري دايىندىق ءپانىنىڭ وقىتۋشىسى، اسكەري-پاتريوتتىق ءىستى ۇيىمداستىرۋشى زاپاستاعى 1-سىنىپتى سەرجانت تولەگەن قامزين.
ەرلىك ساباعىندا وقۋشىلارعا ساعادات نۇرماعامبەتوۆ تۋرالى دەرەكتى فيلم كورسەتىلدى.