قور نارىعىندا ەۋرو باعامى كۇرت تومەندەدى

ەۋرو باعامى جىل باسىنان بەرى بىرتىندەپ تومەندەپ كەلەدى.

5 قىركۇيەكتەگى ساۋدا-ساتتىقتا ەۋرو باعامى 20 جىل ىشىندە العاش رەت $0،99-دان تومەندەدى. بۇنداي كورسەتكىش 2002 جىلدىڭ سوڭىندا وسىنداي دەڭگەيدە بولعان، دەپ حابارلايدى Almaty-akshamy.kz Inbusiness.kz سىلتەمە جاساپ.

ەۋروپالىق ورتالىق بانك 2 قىركۇيەك كۇنى بازالىق مولشەرلەمەنى 0،9993 اقش دوللارى دەڭگەيىندە بەلگىلەدى. بيىل ەۋرو باعامى جىل باسىنان بەرى بىرتىندەپ تومەندەپ كەلەدى. 11 شىلدەدەگى ساۋدا-ساتتىق بارىسىندا دوللاردىڭ ەۋروعا باعامى 20 جىلدا العاش رەت $1،004 بەلگىسىنە دەيىن تومەندەدى.

نارىق ساراپشىلارى ۆاليۋتانىڭ قۇلدىراۋىن ەۋروپاداعى گاز داعدارىسى مەن رەسەي مەن ۋكراينا اراسىنداعى جانجالمەن بايلانىستىرادى.

ەوب ءقازىردىڭ وزىندە نەسيەلەر بويىنشا مولشەرلەمەنى كوتەرىپ ۇلگەردى. سونداي-اق، ينفلياسيانى ۇستاپ تۇرۋ ءۇشىن ونى قايتا جاساۋدى جوسپارلاپ وتىر. ال اقش فەدەرالدى رەزەرۆتىك جۇيەسى وسىعان ۇقساس شارالاردى ەرتەرەك باستاعان بولاتىن، بۇل دوللاردىڭ نىعايۋىنا سەپتىگىن تيگىزدى.

ساراپشىلار ەۋروپاداعى ەنەرگەتيكالىق داعدارىس ودان ءارى داميتىن بولسا، ەۋرونىڭ قۇلدىراۋى جالعاسادى دەپ سانايدى. جاپوندىق Nomura International بانكىنىڭ ساراپشىلارى ەۋرونىڭ 0،95 دوللارعا دەيىن تومەندەۋىن بولجايدى.