ويتامشى
شەبەرحاناعا تاياعىنا سۇيەنىپ قالت-قۇلت ەتكەن قاريا كىردى.
– ءيا، ايتا بەرىڭىز، اتا!
– بالام، مىنا ۇيالى تەلەفونىمدى جوندەپ بەرە عويشى، تالايدان بەرى ءۇنسىز، شىرىلدامايدى.
اتانىڭ تەلەفونىن ۇستاعاننان-اق ونىڭ بۇزىلماعانىن بىلگەن شەبەر:
– اتا، ىستەپ تۇر ەكەن عوي، ەش جەرىندە اقاۋ جوق، – دەپ كەرى قايتارعاندا، الگى قاريا:
– ەندەشە، بالام نەگە حابارلاسپاي جاتىر ەكەن، كوپ بولدى، تەلەفون سوقپادى..، – دەپ كەمسەڭدەي جىلاپ جىبەرگەن ەكەن.
WhatsApp جاعالاپ جۇرگەن بۇل اڭگىمە بالكىم ءسىزدىڭ دە كوزىڭىزگە تۇسكەن بولار، استارلى، ويلى دۇنيە، ءا؟
جۇمىسىڭىز قانشا جەردەن قاۋىرت بولسا دا، جاقىندارىڭىزعا قوڭىراۋ شالۋعا بار-جوعى ەكى مينۋت جەتىپ جاتىر. كۇيكى تىرلىك ەشقاشان بىتپەيدى. ءتىپتى، Facebook، Instagram، TikTok بەتىندە دە ساعاتتاپ وتىرۋعا بارمىز. سونىڭ اراسىنان ەكى-ۇش مينۋت ۋاقىت تابۋعا بولادى. نيەت كەرەك ول ءۇشىن.
مەن، ماسەلەن، ءقازىر عانا وسى جازبانى WhatsApp-تان وقي سالىپ، ءبىرازدان بەرى سويلەسپەي كەتكەن تانىسىما تەلەفون شالىپ، جاعدايىن ءبىلدىم، اناسىنىڭ، اۋىرىڭقىراپ جۇرگەن كۇيەۋىنىڭ دەنساۋلىعىن سۇرادىم. قۋانىپ قالدى. ءوزىڭ دە ۇلكەن ءىس تىندىرعانداي جەڭىلدەپ، جادىراپ قالاسىڭ. «كوڭىل كوڭىلدەن سۋ ىشەدى» دەگەن راس ءسوز نەگىزى.
ەستەرىڭىزدە مە، تانىمال تەلەجۋرناليست بەيسەن قۇرانبەك كوز جۇمارىنىڭ الدىندا فەيسبۋك پاراقشاسىنا ءبىر جازبا جاريالاعان بولاتىن. «نەگە ەكەنىن بىلمەي̆ءمىن، كەشىرىم سۇراعىم كەلدى. قاربالاسپەن ءجۇرىپ تالاي̆ جاقىن ادامىمنىڭ، دوستاردىڭ، تۋىستاردىڭ تانىستاردىڭ كوڭىلىن قالدىردىم. قۋانىشىنا بارا المادىم، قاي̆عىدا قاسىندا بولا المادىم. ءقازىر وي̆لاپ وتىرسام، سونىڭ بارىندە ءوزىمدى «جۇمىستان قول بوساماي̆ جاتىر عوي̆» دەپ اقتاپ الىپپىن. كوڭىل دەي̆ءتىن وتە نازىك، ادام دەگەن وتە قىمبات، ءومىر دەگەن وتە قىسقا دۇنيە ەكەنىن ۇمىتا جازداپپىن... كەشىرىڭىزدەر!»، – دەگەن ماتىندە.
بەيسەن ارىپتەسىمىز ۇزىلەتىنىن سەزگەن بولار، ەلمەن باقۇلداسقانى بولار. ال «ەرتەڭ، ەرتەڭمەن» ءجۇرىپ قاريامىزعا حابارلاسا الماي، ول كىسى ءۇزىلىپ كەتسە، وكىنىشتىڭ ەڭ ۇلكەنى سول بولماق.
وسى جەردە تاقىرىپقا قاتىسى بار باسقا ءبىر ماسەلەنىڭ شەتى شىعىپ تۇرعانى. ءقازىر «تەلەفون الاياقتارى»، ياعني ونلاين وتىرىپ تا قالتاڭىزدى ۇپتەپ كەتەتىندەر قاپتادى. ولار كوبىنە بەيمەزگىل ۋاقىتتا قوڭىراۋ سوعادى. تۇتقانى الگىندەي تەلمىرىپ بالاسىنان ءبىر حابار كۇتىپ جۇرگەن قاريا كوتەرسە، ءبىتتى دەي بەرىڭىز.
ءتۇن جارىمىندا تەلەفوننىڭ ارعى جاعىنان بىرەۋ «اكە، مەن عوي، ۇلىڭىز! جول اپاتىنا ءتۇسىپ قالدىم. قابىرعام سىندى. تەز اقشا كەرەك بولىپ جاتىر»، – دەپ بوزداپ قويا بەرگەندە، ۇيقىلى-وياۋ قارت كىسى قاپەلىمدە نە ىستەرىن بىلمەي، ونسىز دا جۇرەگىندە الاڭ بار، تۇتقانىڭ ارعى جاعىندا تۇرعان ادامنىڭ ايتقانىن ىستەپ، قالتاسىنداعى بارىن سالىپ جىبەرەدى.
ەڭ قىزىعى سول، ءقازىر جاساندى ينتەللەكتىنىڭ كومەگىمەن جاقىندارىڭىزدىڭ داۋسىمەن قوڭىراۋ شالاتىندار دا كوبەيگەن كورىنەدى. سوندىقتان اسىرەسە، اتا-انامىزدىڭ، قارتتاردىڭ حال-جاعدايىن ءجيى ءبىلىپ تۇرايىق. جانە دە تانىس ەمەس نومىردەن الاياقتار ءتۇرلى وقيعالاردى ويدان قۇراستىرىپ حابارلاساتىنىن، ونداي كەزدە مەيلىنشە سالقىنقاندى بولۋ كەرەكتىگىن ايتىپ قويعان ءجون. ال ەگەر بوتەن بىرەۋ قوڭىراۋ سوقسا، الدىمەن ۇلعا، قىزىنا نەمەسە نەمەرەسىنە حابارلاسىپ، ءمان-جايدى ءبىلىپ العانى ابزال.
اڭگىمەمىزدىڭ باسىنداعى تاقىرىپقا قايتا ورالساق، ءسىز بۇگىن تەلەفونمەن قانشا اداممەن سويلەستىڭىز؟