قولتىراۋىننىڭ "قۇرىعىنان" قۇتىلعان قۇرىلىسشى

ەر ادام قولتىراۋىننىڭ شابۋىلىنا تويتارىس بەردى

اۋستراليالىق فەرمەر كولين ديەۆەرو ۇشمەترلىك تەڭىز قولتىراۋىنىنىڭ شابۋىلىنان امان قالدى، - دەپ حابارلايدى اlmaty-akshamy.kz ABC News باسىلىمىنا سىلتەمە جاساپ.

وقيعا وتكەن ايدا ورىن العان. كولين اۋسترالياداعى فيننيسس وزەنىنىڭ ماڭىندا قۇرىلىس جۇرگىزبەك بولىپ، قورشاۋ جاساۋعا دايىندالىپ جاتقان. ول باتپاقتا (بولوتو) بالىقتىڭ جۇزگەنىن كورىپ، توقتاعان.

"ەكى قادام جاساي بەرگەنىم سول ەدى، قولتىراۋىن وڭ اياعىمنان باس سالدى. ونىڭ تىستەرى سىرەسىپ قالعانى سونشالىق، مەنى جۇلقىلاي باستادى، سوسىن سۋعا قاراي تارتتى"، - دەيدى ديەۆەرو.

60 جاستاعى ەر ادام بوس سول قولىمەن ۇرىپ كورگەن، ءتىپتى جىرتقىشتى تىستەپ كورگەن.

"مەن ىڭعايسىز پوزيسيادا تۇرىپ قالدىم، الايدا جولىم بولىپ، ونىڭ قاباعىنان تىستەدىم. ول قالىڭ بولسادا، تىستەپ تۇرىپ تارتىپ قالىپ ەم، جىرتقىش مەنى جىبەرە سالدى. لەزدە جاعاعا شىعىپ، كولىگىمە جۇگىردىم. ارتىمنان قۋا باستادى، ءبىر كەزدە توقتاپ قالدى"، - دەيدى ەر ادام.

فەرمەر ورامال مەن ءجىپتى قولدانىپ، قان اعۋدى توقتاتقان. سوسىن ونىڭ باۋىرى ەڭ جاقىن جەردەگى (وقيعا بولعان جەردەن 130 شاقىرىم) اۋرۋحاناعا جەتكىزگەن. ءقازىر ول ەم الىپ جاتىر ەكەن.

باستى ماسەلە جارادان ءقاۋىپتى باكتەريالاردى جويۋ بولعان ەكەن.

"اياعىمنىڭ تالقانى شىقتى، ءتىپتى 10 كۇننەن اسا ونى تازالاپ، جۋىپ وتىردى"، - دەيدى اۋستراليالىق.

وسى ايدا وعان تەرىنى اۋىستىرىپ ورنالاستىرۋ وتاسى جاسالعان. ەر ادام اياعىنداعى ساۋساقتارىن سەزەتىنىن ايتادى، دارىگەرلەر ونى وسى اپتادا اۋرۋحانادان شىعادى دەپ بولجايدى.

"بارلىعى سەگىز سەكۋندتا بولدى. ەگەر قولتىراۋىن مەنىڭ باسقا جەرىمنەن تىستەگەندە، جاعداي باسقاشا بولار ەدى. بۇل مەنىڭ ءومىرىمدى وزگەرتۋ كەرەك دەگەن بەلگى. مەن سول باتپاقتى ايماقتا كوپ ءجۇردىم، قورشاۋلاردى جوندەدىم، ءومىرىمدى سۇرە بەردىم. ءبىراق مىنا جاعداي مەنىك كوزىمدى اشتى"، - دەيدى ول.

ديەۆەرونىڭ ايتۋىنشا، وزىنە شابۋىل جاساعان قولتىراۋىننىڭ كوزى جويىلعان ەكەن.