الماتى قالاسى بويىنشا قىلمىستىق اتقارۋ جۇيەسى دەپارتامەنتىنە قاراستى №11 مەكەمەدە جازاسىن وتەپ جاتقان جاسوسپىرىمدەر مەن الماتى قالاسى كوللەدجدەرىنىڭ ستۋدەنتتەرى اراسىندا شاعىن فۋتبولدان جولداستىق كەزدەسۋ ءوتتى.
كولونيانىڭ جاسىل الاڭىندا وتكەن شاعىن فۋتبولعا الماتى تەحنولوگيا جانە فلوريستيكا كوللەدجىنىڭ «اكتيف» كومانداسى، الماتى ءسان جانە ديزاين كوللەدجىنىڭ «اكميسى»، الماتى لوگيستيكا جانە كولىك اكادەمياسى كوللەدجىنىڭ «اLT» كومانداسى جانە بالالار كولونياسىنىڭ قىزمەتكەرلەرى مەن تاربيەلەنۋشىلەرىنەن قۇرالعان «جاستار» قاتىستى.
جارىس تارتىستى ءوتتى. تەڭبىل دوپقا قۇمار جاستار جاسىل الاڭدا قىزىقتى ويىن ورنەگىن كورسەتتى. 2:0 ەسەبىمەن «اLT» كومانداسى باسىم ءتۇسىپ 1-ورىن السا، №11 مەكەمەنىڭ «جاستارى» 2-ورىنعا يە بولدى.
– ءبىز جابىق مەكەمە بولعانىمىزبەن، ءىستى بولىپ، جازاسىن وتەپ جاتقان جاسوسپىرىمدەردىڭ سىرتقى ورتامەن بايلانىسىن مۇلدەم ءۇزىپ تاستامايمىز، وسىنداي سپورتتىق ءىس-شارالاردى دا ءجيى ۇيىمداستىرىپ وتىرامىز. بىزدە سپورتتى سۇيەتىن بالالار وتە كوپ. سوندىقتان ءوزى قۇرالپى جاستاردى ءجيى شاقىرىپ، وسىلاي قويان-قولتىق ارالاستىرۋ، ولاردىڭ بىر-بىرىنە قولداۋ كورسەتۋىنە جاعداي جاساۋ، ۇيىمشىل بولۋدى، بىر-بىرىنەن جاقسى دۇنيەلەردى ۇيرەنۋدى، جاسوسپىرىمدەر اراسىندا سالاۋاتتى ءومىر سالتىن ناسيحاتتاۋ دا – تاربيە قۇرالى، – دەيدى مەكەمە باستىعى ادىلەت پولكوۆنيگى المات سۇلەيمەنوۆ.