The New York Times باسىلىمى اقش-تىڭ پرەزيدەنتى دونالد ترامپتىڭ ۋكرايناداعى سوعىسقا قاتىستى جاڭا ۇستانىمىن بەردى. سايلاۋالدى ناۋقان كەزىندە ترامپ رەسەي مەن ۋكراينا اراسىنداعى سوعىستى 24 ساعات ىشىندە توقتاتۋعا ۋادە بەرگەن ترامپ ءقازىر نە دەيدى؟ تولىعىراق aqshamnews.kz ماتەريالىندا.
The New York Times باسىلىمى دونالد ترامپ ۆلاديمير پۋتينمەن اڭگىمەلەسكەن سوڭ كەلىسسوزدەر پروسەسىنەن شىعۋعا نيەتتەنگەنىن ايتتى.
باسىلىم مالىمەتىنشە، ترامپ ۋكراينا پرەزيدەنتى ۆلاديمير زەلەنسكييگە جانە باسقا دا ەۋروپالىق كوشباسشىلارعا رەسەي مەن ۋكراينا سوعىسىن اياقتاۋدىڭ جولىن وزدەرى تابۋعا ءتيىس ەكەنىن ايتقان. تالقىلاۋ بارىسىمەن تانىس التى شەنەۋنىك ترامپ رەسەيگە قارسى جاڭا سانكسيالاردى قامتيتىن ەۋروپالىق قىسىم ناۋقانىنا قوسىلامىن دەگەنىنەن باس تارتقان.
"ترامپ اكىمشىلىگى جۇمىسىنىڭ باسىنان باستاپ جۇرگىزگەن ساياساتى – اگرەسسور رەسەيگە ەمەس، قۇربان ۋكرايناعا قىسىم جاساۋ"، – دەپ جازدى كييەۆتەن ساۋىردە كەتكەن بۇرىنعى ەلشى ءارى تاجىريبەلى ديپلومات بريدجەت برينك.
ترامپ ءوز پىكىرلەرىندە پۋتينمەن بولعان اڭگىمە قانداي دا ءبىر سەرپىلىس اكەلگەنىن تۇسپالداپ ايتتى.
ەسكە سالايىق، سايلاۋالدى ناۋقان كەزىندە ترامپ رەسەي مەن ۋكراينا اراسىنداعى سوعىستى 24 ساعات ىشىندە توقتاتۋعا ۋادە بەرگەن ەدى. الايدا سودان بەرى بۇل ماسەلە كەرىسىنشە الدەقايدا كۇردەلەنە ءتۇستى.
دۇيسەنبىدە جاريالاعان جازباسىندا ول اقش-تى بۇل تالقىلاۋدان شىعارىپ، رەسەيمەن ىسكەرلىك مامىلەلەرگە كوشۋ نيەتىن اشىق ءبىلدىردى. سوعىستى توقتاتۋ شارتتارىن "ەكى تاراپ ءوزارا تالقىلايدى، ويتكەنى كەلىسسوزدەردىڭ ەگجەي-تەگجەيىن تەك سولار بىلەدى" دەپ جازدى ترامپ.
ساياساتتانۋشى نە دەيدى؟
ساياساتتانۋشى پەردەحان شامشييەۆ ترامپتىڭ ىسىنە پىكىر ءبىلدىردى. ونىڭ ايتۋىنشا، ساياسات بيزنەس ەمەس، وندا ۇلتتىق مۇددەلەر قاقتىعىسادى.
"ترامپ بيلىككە كەلگەلى بەرى مەملەكەتتەر اراسىنداعى قاقتىعىستاردى شەشۋشى ادام رەتىندە كورىنگىسى كەلەدى. ءبىراق ساياسات بيزنەس ەمەس، ۇلتتىق مۇددەلەر قاقتىعىسى ەكەنىن ەندى ءتۇسىنىپ كەلە جاتقان سياقتى. مۇنى رەسەي مەن ۋكراينا اراسىنداعى ماسەلەنى شەشۋگە تالپىنىسى، ۇستانىمى مەن مالىمدەمەلەرىنىڭ ءجيى وزگەرۋىنەن بايقايمىز"، - دەيدى ول.
ساياساتتانۋشى ترامپ رەسەي مەن ۋكراينا اراسىنداعى سوعىستى نەگە توقتاتا الماي جاتقانىن ءتۇسىندىردى.
"ءيا، ول ءۇندىستان مەن پاكىستان اراسىنداعى كيكىلجىڭگە ارالاسىپ، قاقتىعىستى توقتاتتى. سەبەبى مۇندا قاقتىعىس ەندى باستالعان بولاتىن. ال رەسەي مەن ۋكراينا اراسىنداعى قاقتىعىس شارىقتاۋ شەگىنە ءالى جەتە قويمادى. سەبەبى ارادا ەكى ەلدىڭ ۇلتتىق مۇددەسى تۇر. سوندىقتان ترامپتىڭ قاقتىعىستى بيزنەستىڭ تاسىلىمەن شەشۋ ارەكەتتەرى ساتسىزدىككە ۇشىراپ كەلەدى. سەبەبى بيزنەستە "سەن ماعان مىنانى، مەن ساعان باسقاسىن بەرەمىن" دەگەن قاعيدا ىسكە اسقانىمەن، ساياساتتا ءبىر ءتىلىم جەر دە ايىرباسقا تۇسپەيدى"، - دەپ قورىتىندىلادى ول.