حالىقارالىق اۋە كولىگى قاۋىمداستىعىنىڭ (IATA) باعالاۋىنشا، الەم بويىنشا جولاۋشىلاردىڭ 52%-ى تەك قول جۇگىن الىپ ساياحاتتاۋدى ءجون كورسە، 48%-ى تىركەلگەن جولجۇك راسىمدەيدى، دەپ حابارلايدى aqshamnews.kz FlyArystan اۋە كومپانياسىنىڭ باسپا ءسوز قىزمەتىنە سىلتەمە جاسساپ.
اتاپ وتىلگەن ماڭىزدى جايتتاردىڭ ءبىرى: قول جۇگىن جۇك سورەلەرىندە ورنالاستىرۋ جولاۋشىنىڭ جاۋاپكەرشىلىگى سانالادى.
بورتسەرىكتەر بوس ورىندار جايلى حابارلاپ، سالون ىشىندە باعىت بەرۋگە كومەكتەسە الادى، الايدا قول جۇگىن كوتەرىپ قويۋ نەمەسە ونى ورىن اۋىستىرىپ ورنالاستىرۋ قىزمەتىن ورىندامايدى.
جولاۋشىلاردىڭ جايلىلىعىن قامتاماسىز ەتۋ ءۇشىن اۋە كومپانياسى بىرنەشە كەڭەس تە ۇسىندى.
جۇك سورەلەرى – سالونداعى ورتاق كەڭىستىك
جۇك سورەلەرىندەگى ورىن ناقتى ءبىر جولاۋشىعا نەمەسە ورىنعا بەكىتىلمەيدى. بۇل – ەۋروپا مەن ازياداعى ءىرى لوۋكوستەرلەر ۇستاناتىن حالىقارالىق اۆياسيالىق ستاندارت.
قول جۇگىن ورنالاستىرۋ قاعيداسى: "كەز كەلگەن بوس سورەنى كەز كەلگەن جولاۋشى پايدالانا الادى".
ەگەر ورنىڭىزدىڭ ۇستىڭىزدەگى سورە باسقا جولاۋشىلاردىڭ قول جۇگىنەن نەمەسە ماۋسىمدىق كيىمدەرىنەن تولىپ قالسا، ءسىز كورشى باسقا كەز كەلگەن بوس سورەلەردى، سونداي-اق سالوننىڭ ورتالىق بولىگىندەگى بوس سورەلەردى پايدالانا الاسىز. بۇل – كەڭىستىكتى بىركەلكى بولۋگە جانە بارلىق جولاۋشىلاردىڭ جايلىلىعىن ساقتاۋعا ارنالعان قالىپتى، جوسپارلى تاجىريبە.
الدىڭعى ورىندىق استىنداعى كەڭىستىكتى پايدالانۋ
الدىڭعى ورىندىقتىڭ استىنداعى كەڭىستىك – جەكە زاتتارىڭىزدى، شاعىن سومكە نەمەسە ارقا- سومكەنى ورنالاستىرۋعا ارنالعان ايماق. اسىرەسە، ارقا-سومكەلەردى مۇندا قويۋ وتە ىڭعايلى: ولار جاقسى سيادى، ءپىشىنىن ساقتايدى جانە جۇك سورەسىنەن ورنىن المايدى. بۇل ايماقتى پايدالانۋ كەڭىستىكتى ءتيىمدى بولۋگە جانە وتىرعىزۋ پروسەسىن جىلدامىراق ءارى تارتىپپەن وتكىزۋگە كومەكتەسەدى.
ماڭىزدى ەرەكشەلىك: اپاتتىق شىعۋ قاتارلارىندا (FlyArystan-دە 12–13 قاتار) وتىرعان جولاۋشىلار زاتتارىن ورىندىق استىنا قويا المايدى، سەبەبى شىعۋعا ءوتۋ جولى قاۋىپسىزدىك تالاپتارىنا ساي تولىقتاي بوس بولۋى ءتيىس.
زات كولەمى ارتقاندا قولجەتىمدى قوسىمشا قىزمەتتەر
ساياحات فورماتىنا بايلانىستى زات كولەمى دە وزگەرەتىنى تۇسىنىكتى. سوندىقتان FlyArystan جولاۋشىلارعا الدىن الا قولايلى نۇسقالاردى تاڭداۋدى ۇسىنادى:
"10 كگ قول جۇگى" قىزمەتى – سالماق نورماسىن ارتتىرۋعا مۇمكىندىك بەرەدى.بۇل جەكە زاتتارىن جۇك بولىمىنە تاپسىرماي ساياحاتتاعىسى كەلەتىندەر ءۇشىن قولايلى. بۇل رەتتە، ولشەمدەر وزگەرمەيدى (56 × 23 × 36 سم)، سول ارقىلى سورەلەردىڭ سىيىمدىلىعىن ساقتاۋعا مۇمكىندىك بەرەدى.
ەگەر زات كولەمى قول جۇگىنىڭ بازالىق نورماسىنان كوپ نەمەسە ءىرى بولسا، تىركەلگەن جولجۇك راسىمدەۋ ۇسىنىلادى.
ەكى قىزمەتتى دە بيلەتتى ساتىپ الۋ كەزىندە نەمەسە سايتتاعى/قوسىمشاداعى جەكە كابينەت ارقىلى الدىن الا راسىمدەگەن ىڭعايلى.
ساياحاتتاۋشىلار ءۇشىن پراكتيكالىق كەڭەستەر
ۇشاقتا قاجەت بولاتىن زاتتاردى الدىن الا شىعارىپ قويعان دۇرىس. بۇل كەيىننەن ولاردى ىزدەپ، ءوتۋ جولىن نەمەسە سورەنى بوگەپ قالماۋعا كومەكتەسەدى.
ەگەر قول جۇگىڭىز جۇمساق بولسا، مۇمكىندىگىنشە ونى تىك قويىڭىز — بۇل سورەنىڭ ەنى بويىنشا كوبىرەك ورىن ۇنەمدەۋگە مۇمكىندىك بەرەدى.
ۇستىڭگى كيىمدى الدىڭعى ورىندىقتارداعى ىلگىشتەرگە ورنالاستىرعان ءجون (اپاتتىق شىعۋ قاتارلارىنان باسقا).
قاتتى كورپۋستى شاباداندار كوبىرەك ورىن الادى، سوندىقتان مۇمكىن بولسا، جۇمساق سومكە نەمەسە ارقا-سومكەسىن تاڭداڭىز.
اۋىر زاتتاردى سومكەنىڭ تومەنگى بولىگىنە قويۋعا تىرىسىڭىز. بۇل قول جۇگىنىڭ ىقشام ءپىشىنىن ساقتاپ، ونى سورەگە ورنالاستىرۋدى جەڭىلدەتەدى.
ەگەر وتباسىمەن نەمەسە توپپەن ساياحاتتاساڭىز، قولجەتىمدى كەڭىستىكتى بارىنشا ءتيىمدى پايدالانۋ ءۇشىن زاتتاردى سورەلەرگە ۇتىمدى ءبولىپ ورنالاستىرىڭىز.