قۇربان ايت مەرەكەسىنە ەكى كۇن قالدى.
مۇسىلماندار ءۇشىن جىلىنا ءبىر كەلەتىن ۇلىق مەرەكەدە قۇرباندىققا نەگىزىنەن قوي مالى شالىنادى. سول سەبەپتى نارىقتاعى قوي باعاسى قانشا ەكەنىن باعامداپ كورۋگە تىرىستىق.
Olx.kz-تەگى حابارلاندىرۋلارعا كوز جۇگىرتسەك، بۇگىنگى كۇنى الماتى قالاسى بويىنشا قويدىڭ ەڭ ارزان دەگەنى 35000-نان باستالادى ەكەن. باعالار مالدىڭ كۇيىنە قاراي ءار ءتۇرلى. جارناما پلاتفورماسىندا ءبىز بايقاعان ەڭ جوعارى باعا - 80000 تەڭگە كولەمىندە. بۇل جەردە قويدى العان جەردەن قالا ىشىنە جەتكىزىپ بەرۋ قىزمەتى دە كىرەدى ەكەن.
ال ەلىمىزدىڭ باس قالاسى - استانادا ءدال وسى پلاتفورماسىندا قوي باعاسىنىڭ ەڭ تومەنى 35000-نان باستالىپ، ەڭ جوعارى باعا 200 مىڭعا دەيىن جالعاسا بەرەدى ەكەن. مۇنداعى نەگىزگى ورتاشا باعا 55000 مەن 65000 تەڭگە كولەمىندە.
وسى رەتتە، قۇرباندىققا شالىناتىن مالدىڭ قانداي بولۋى شارت دەگەن اقپاراتتى نازارلارىڭىزعا ۇسىنامىز:
قمدب شاريعات جانە ءپاتۋا ءبولىمىنىڭ شىعارعان ءپاتۋاسىنا ساي، قۇرباندىققا تاڭداپ الىنعان مالدىڭ ساۋ، ءمىنسىز بولۋى تالاپ ەتىلەدى.
بىرىنشىدەن، بۇل پەندەنىڭ جاراتۋشى يەسىنە دەگەن جوعارى دەڭگەيدەگى ادەپتىلىك قارىم-قاتىناسىن كورسەتەدى. قۇرباندىقتىڭ ەتى دە، قانى دا اللا تاعالاعا قاجەت ەمەستىگى، وعان تەك پەندەنىڭ تاقۋالىعى عانا جەتىپ باراتىنى بەلگىلى. وسى ورايدا پەندە قۇرباندىق ءۇشىن ساۋ، ايىپسىز مالدى ىزدەپ تابۋ ارقىلى تاقۋالىققا ارەكەت ەتەدى.
ەكىنشىدەن، وسى ارقىلى كەدەيلەردىڭ جابىرقاڭقى كوڭىلدەرى كوتەرىلەدى. ولارعا جارامسىز، كەمشىلىگى بار مالدىڭ ەتىن ەمەس، ەڭ ادەمى مالدىڭ ەتىن سىيعا تارتۋ جاقسى ءىس سانالادى. ولار وزدەرىن قۇرمەتتى ادام رەتىندە سەزىنە باستايدى.
- قۇرباندىققا قوي، ەشكى، ءىرى قارا نەمەسە تۇيە شالۋ. مالدىڭ ەركەگى دە، ۇرعاشىسى دا جارايدى. ەتى كوپ، ءدامى جاقسى بولعانى ابزال.
قوي مەن ەشكى ءبىر ادامنىڭ اتىنان باۋىزدالادى. ءبىر ادام ەكى قوي باۋىزداسا، ەكەۋى دە قۇرباندىق بولادى جانە ەكى قۇرباندىقتىڭ ساۋابىن الادى. ال، تۇيە مەن ءىرى قارانى ءبىر ادامنان جەتى ادامعا دەيىن شالۋعا بولادى. بۇعان ءجابيردىڭ (ودان اللا رازى بولسىن) «اللا ەلشىسىمەن بىرگە حۋدايبيادا ءبىر تۇيەنى جەتى ادامنىڭ اتىنان جانە ءبىر قارامالدى جەتى ادامنىڭ اتىنان باۋىزدادىق»[1] دەپ ايتقان ءسوزى دالەل. مۇندا جەتى ادامنىڭ دا نيەتى قۇرباندىق شالۋ نەمەسە ەتىن ساداقا ەتۋ بولۋ كەرەك.
- اقاۋى جوق، ءمىنسىز مالدى قۇرباندىققا شالۋ. كوزى كورمەيتىن، ءبىر كوزى جوق، اقساق، تىم ارىق، تىستەرى جوق، قۇلاعى كەسىلگەن، جەلىنى كەپكەن، قۇيرىعى نەمەسە قۇلاعىنىڭ ۇشتەن ءبىر بولىگىنەن كوبى كەسىلگەن مالدى قۇرباندىققا شالۋ دۇرىس ەمەس. پايعامبارىمىز (وعان اللانىڭ سالاۋاتى مەن سالەمى بولسىن):
«ءتورت مال قۇرباندىققا جارامايدى: قىليلىعى ايقىن، اۋرۋى انىق، اقساقتىعى ءمالىم، جىلىك مايى تاۋسىلعان (تىم ارىق) مالدار»، – دەگەن
ءمۇيىزى جوق نەمەسە ءمۇيىزى سىنعان، قۇلاعى جارىلعان نەمەسە قۇلاعى تەسىلگەن مالدى قۇرباندىققا شالۋعا بولادى. سونىمەن قاتار، پىشتىرىلگەن مالدى دا قۇرباندىققا شالا بەرەدى. ونداي مالدىڭ ەتى مول ءارى ءدامى ءتاتتى بولادى جانە ول ايىپ بولىپ ەسەپتەلمەيدى[3].
ساتىپ العان قۇرباندىق مالى ايىپتى بولىپ قالسا، ونى ساۋ مالعا اۋىستىرادى. مالدى باۋىزدايتىن كەزدە نە باۋىزداۋ سەبەبىمەن كوزىن شۇقىپ السا نەمەسە سويۋعا اپارا جاتىپ اياعىن سىندىرىپ السا، ونىڭ وقاسى جوق.
- بەلگىلى جاسقا جەتكەن مالدى قۇرباندىققا شالۋ. قوي مەن ەشكى ءبىر جاسقا جەتۋ كەرەك. ال، ءىرى قارا ەكى جاسقا، تۇيە بەس جاسقا تولۋى شارت[4]. ءبىر جاسقا تولماعان سەمىز ءارى ءىرى قويدى دا قۇرباندىققا شالۋعا رۇقسات ەتىلەدى. دەگەنمەن، ساقتىق رەتىندە ءبىر جاسقا تولعان قويدى شالعان ابزال.