Instagram-دا 5G جەلىلەرىنىڭ زيانى تۋرالى ۆيدەو شىقتى. وندا تەحنولوگيا دەنساۋلىققا زيان كەلتىرىپ قانا قويماي، COVID-19 بولاتىن ءولىم-جىتىمدى باقىلاۋعا دا مۇمكىندىك بەرەدى دەلىنگەن. بۇل شىندىققا جالعان، دەپ حابارلايدى almaty-akshamy.kz stopfake.kz سىلتەمە جاساپ.
- 5G اسەرىنەن قۇستار ءولىپ جەرگە قۇلايدى
بۇل راديوفوبتار ءجيى قولداناتىن تانىمال فەيك. شىن مانىندە، 5G جەلىلەرى قۇستار مەن جانۋارلارعا مۇلدەم اسەر ەتپەيتىنى عىلىمي دالەلدەنگەن. قۇستاردىڭ كەنەتتەن جاپپاي قىرىلۋ جاعدايلارى اۋرۋلارمەن نەمەسە اۋا رايى جاعدايىمەن تۇسىندىرىلەدى.
- انگليادا 5G اسەرىنەن بالالاردىڭ مۇرىننان جانە قۇلاعىنان قان كەتتى.
بۇل وتىرىك. بىرىنشىدەن، انگليادا دا، باسقا جەردە دە مۇنداي جاعدايلار تىركەلگەن جوق. ەكىنشىدەن. بۇگىنگى تاڭدا 5G جەلىلەرى الەمنىڭ مىڭداعان قالاسىندا ورناتىلعان جانە تۇرعىندار ۇيالى بايلانىس باعانالارىنا جاقىنداعان كەزدە وزدىگىنەن قان كەتپەيدى. 5G جەلىلەرى قازاقستاندا دا قولجەتىمدى. ولار الماتى، استانا، شىمكەنت، اقتوبە جانە اقتاۋدىڭ كەيبىر اۋداندارىندا ورناتىلعان.
- 5G جەلىلەرىن قايتا كۇيگە كەلتىرگەن سوڭ COVID-19 ەكىنشى تولقىنى باستالادى جانە ادامدار كوشەدە ولەدى.
بۇل تەزيس جالعان. بىرىنشىدەن، الەمدە COVID-19-دىڭ ەكىنشى تولقىنى بولدى. كەيبىر ەلدەردە ونىڭ سالدارىنان قايتىس بولعاندار سانى ءبىرىنشى تولقىنعا قاراعاندا الدەقايدا كوپ بولدى، ءبىراق بۇل 5G تەحنولوگياسىمەن بايلانىستى ەمەس. سونىمەن قاتار COVID-19 جۇقتىرعان ادامدار كوشەدە ولگەن جوق. COVID-19 5G جەلىلەرىمەن بايلانىستى دەگەن تەوريالار – دالەلسىز جانە قاستاندىق تەوريالارى مەن پسيەۆدوعىلىمي مالىمدەمەلەرگە نەگىزدەلگەن. فاكچەكەرلەر بۇل تۋرالى بىرنەشە رەت جازعان.
- 5G – بۇل ادامداردى باسقارۋعا ارنالعان قۇرال.
بۇل تەزيسكە سايكەس ادامدارعا ۆاكسيناسيا تۇرىندە ەلەكتروندى چيپتەر ەنگىزىلۋگە ءتيىس. سوندا 5G جەلىلەرىن قولدانا وتىرىپ، ادامداردىڭ يممۋنيتەتىن «قوسۋعا» جانە «وشىرۋگە» بولادى. مۇنىڭ ءبارى مۇمكىن ەمەس. سيپاتتالعان تەحنولوگيالار جوق. ونىڭ ۇستىنە COVID-19 قارسى ۆاكسينانىڭ ءبىر قۇتىسىندا بىرنەشە دوزا بولادى. مىسالى، Pfizer شىعارعان ۆاكسينادا التى دوزا بار. ياعني، تەوريالىق تۇرعىدان قۇتىدا التى ميكروسكوپيالىق چيپ بولۋى كەرەك جانە پرەپاراتتى العان كەزدە ولاردىڭ بىرەۋى عانا ينەگە ەنەدى. ارينە، بۇل مۇمكىن ەمەس، ويتكەنى شپريسپەن ۆاكسينا ميكروسكوپسىز الىنادى.
دەمەك، تارالعان ۆيدەودا ۇسىنىلعان اقپارات وتىرىك، كونسپيرولوگيا جانە پسيەۆدوعىلىمي. 5 G جەلىلەرىنىڭ قاۋىپسىزدىگى يونداۋشى ەمەس ساۋلەلەنۋدەن قورعاۋ جونىندەگى حالىقارالىق كوميسسيانىڭ (ICNIRP) جانە ەۋروپالىق پارلامەنتتىڭ قورىتىندىلارىمەن راستالدى. تەحنولوگيانىڭ قاۋىپسىزدىگىن راستايتىن تاۋەلسىز عىلىمي زەرتتەۋلەر دە بار.
ولاي بوسلا، تارالعان روليككە سەنبەگەن ءجون.